1 A ‘ou lagona fo‘i le leo tele mai le malumalu, ‘ua fa‘apea atu i agelu e to‘afitu, “Ō ia, ‘inā liligi atu ipu o le to‘asā o le Atua i le lalolagi.”
2 ‘Ona alu atu ai lea o lē muamua, ‘ua liligi ifo lana ipu i le fanua; ‘ona o‘o lea o le papala leaga e tigā ai tagata ‘ua i ai le fa‘ailoga o le manu fe‘ai, ‘atoa ma ē ‘ua ifo i lona fa‘atagata.
3 ‘Ua liligi fo‘i e lona to‘alua o agelu lana ipu i le sami; ‘ona liu toto ai lea e pei o le toto o le tagata oti, ‘ona mamate ai lea o mea ola uma o i le sami.
4 ‘Ua liligi fo‘i e lona to‘atolu o agelu lana ipu i vaitafe ma puna o vai; ‘ona liu toto ai lea.
5 Na ‘ou lagona fo‘i le agelu e pule i vai ‘ua fa‘apea atu, “‘Ua amiotonu oe, auā ‘ua fa‘apea ‘ona e fa‘asalaina, o lē soifua, o lē na soifua, o le Pa‘ia.
6 Auā na latou fa‘amaligiina le toto o tagata pa‘ia ma perofeta, i le ‘ua e avatu ai ‘iā te i latou le toto e inu ai; auā ‘ua tatau lea mo i latou.”
7 Na ‘ou lagona fo‘i i le tasi mai le fatafaitaulaga, ‘ua fa‘apea atu, “E moni, le Ali‘i e, le Atua e ou le malosi uma lava; e fa‘amaoni ma le tonu au fa‘amasinoga.”
8 ‘Ua liligi fo‘i o lona to‘afa o agelu lana ipu i le lā; ‘ua tu‘uina atu i ai ‘ia mū ai tagata i le afi.
9 ‘Ua mū fo‘i tagata i le mū tele, ‘ona latou fāifai lea i le suafa o le Atua e ana le pule i ia mala; a ‘ua lē salamō i latou le avatu ai le vi‘iga ‘iā te ia.
10 ‘Ua liligi fo‘i e lona to‘alima o agelu lana ipu i le nofoāli‘i o le manu fe‘ai; ‘ona fa‘apouliuligia lea o lona mālō; ‘ona latou fē‘ati ai lea o latou laulaufaiva ‘ona o le puapuagā.
11 ‘Ua latou fāifai fo‘i i le Atua o le lagi ‘ona o latou puapuagā ‘atoa ma o latou papala, ‘ua lē salamō fo‘i i latou ‘iā latou amio.
12 ‘Ua liligi fo‘i e lona to‘aono o agelu lana ipu i le vaitafe tele o Eufirate; ‘ona mate ai lea o lona vai, ‘ina ‘ia saunia le ala o tupu mai nu‘u i sasa‘e.
13 ‘Ona ‘ou iloa ai lea o agaga leaga e to‘atolu e pei o rane ‘ua ō mai mai le gutu o le tarako, ma le gutu o le manu fe‘ai, ‘atoa ma le gutu o le perofeta pepelo.
14 Auā o agaga ia o temoni le fai fa‘ailoga, ‘ua latou ō atu i tupu o le lalolagi ma le atu laulau uma, e fa‘apotopoto ‘iā te i latou i le tau‘a i le aso tele o le Atua e ona le malosi uma lava.
15 (“Fa‘auta, ‘ou te alu atu pei o se gaoi; ‘amu‘ia lē mataala, ma tausi i ona ‘ofu, ‘ina ne‘i savali o ia e lē lavalavā, ne‘i latou iloa atu fo‘i lona mā.”)
16 Na ia fa‘apotopoto fo‘i ‘iā te i latou i le mea ‘ua igoa i le gagana Eperu o Amaketo.
17 ‘Ua liligi fo‘i e lona to‘afitu o agelu lana ipu i le matagi; ‘ona tulei mai ai lea o le si‘ufofoga tele mai le malumalu o i le lagi mai le nofoāli‘i, ‘ua fa‘apea mai, “‘Ua uma ‘ona fai.”
18 ‘Ona tutupu ai lea o faititili, ma leo, ma uila, sa i ai fo‘i le mafui‘e tele, e lē fa‘apea ‘ona tele se mafui‘e ‘ua tele na‘uā talu ‘ona i ai o tagata i le lalolagi.
19 ‘Ua vaetoluina fo‘i i le ‘a‘ai tele, ‘ua pa‘u‘ū fo‘i ‘a‘ai o nu‘u; ‘ua manatua Papelonia le ‘a‘ai tele i luma o le Atua, ‘ina ‘ia tu‘uina atu ‘iā te ia o le ipu o le uaina o lona to‘asā mamafa.
20 ‘Ua sōsōla fo‘i motu uma, o mauga fo‘i ‘ua lē iloa.
21 ‘Ua tō mai fo‘i ai le lagi i luga o tagata le uato‘a latetele, e pei o le taleni ‘ona mamafa; ‘ona fāifai ai lea o tagata i le Atua ‘ona o le mala o le uato‘a, auā ‘ua matuā tele lea mala.#