1 ‘Ua ili fo‘i e lona to‘alima o agelu le pū, ‘ona ‘ou iloa ai lea o le fetū ‘ua pa‘ū nai le lagi i le lalolagi; ‘ua tu‘uina atu fo‘i ‘iā te ia le ki o le tō e lē gata.
2 ‘Ua tatala fo‘i e ia le tō e le gata; ‘ona alu a‘e ai lea o le asu a‘i le tō e pei o le asu o se umu tele, ‘ua fa‘apouliuligia ai le lā ma le lagi ‘ona o le asu o le tō.
3 ‘Ua ō atu fo‘i sē akerise nai le asu i luga o le lau‘ele‘ele; ‘ua tu‘uina atu ‘iā te i latou le malosi e pei o le malosi o akarava o le vao.
4 ‘Ua fai atu fo‘i ‘iā te i latou ‘aua ne‘i latou fa‘aleaga i vao iti o le fanua, po o se mea lauolaola e tasi, po o se la‘au e tasi, tau lava o tagata ‘ua lē i ai i o latou muaulu le fa‘amaufa‘ailoga a le Atua.
5 ‘Ua tu‘uina atu ‘iā te i latou ‘aua ne‘i fasiotia i latou, tau lava ‘ina fa‘atigāina i masina e lima; o latou tigā fo‘i e pei o le tigā o le tagata pe a tuia e le akarava.
6 O ona pō ia e sā‘ili ai e tagata le oti, ‘ae latou te lē maua; e naunau fo‘i i latou ‘ina ‘ia oti, ‘ae sola ‘ese le oti ‘iā te i latou.
7 O sē akerise fo‘i ‘ua tino mai e pei o solofanua ‘ua saunia i le tau‘a; o latou ulu fo‘i ‘ua peiseaī ‘ua i ai paleali‘i e pei o auro, ma o latou mata e pei o mata o tagata.
8 ‘Ua ‘iā te i latou fo‘i lauulu e pei o lauulu o fafine, ma o latou nifo e pei o nifo o leona.
9 ‘Ua ‘iā te i latou fo‘i ufifatafata e pei o ufifatafata u‘amea; ‘ua palalū fo‘i o latou ‘apa‘au e pei o le ta‘alili o kariota ma solofanua e tele pe a taufetuli e tau.
10 ‘Ua ‘iā te i latou o i‘u e pei o i‘u o akarava, ‘ua i ai fo‘i tui i o latou i‘u; ma ‘ua ‘iā te i latou le malosi e fa‘aleaga ai tagata i masina e lima.
11 ‘Ua ‘iā te i latou fo‘i le tupu, o le agelu lea o le tō e lē gata; o lona igoa i le ‘upu Eperu o Avatonu, a o lona igoa i le ‘upu Eleni o Apoluonu.
12 ‘Ua mavae atu le auē e tasi; fa‘auta, ‘ua totoe auē e lua e mulimuli ane i le o‘o mai.
13 ‘Ua ili fo‘i e lona to‘aono o agelu le pū, ‘ona ‘ou fa‘alogo ai lea i le leo mai nifo e fa o le fata auro o i luma o le Atua.
14 ‘Ua fa‘apea atu i lona to‘aono o agelu ‘ua i ai le pū, “Tatala ia agelu e to‘afa o ē ‘ua fusifusia i le vaitafe tele o Eufirate.”
15 ‘Ona talatalaina ai lea o ia agelu e to‘afa o ē ‘ua saunia i le itū aso, ma le aso, ma le masina, ma le tausaga, ‘ina ‘ia latou fasiotia lona tolu o vaega o tagata.
16 O le faitau aofa‘i o le ‘au tau o ē ‘ua ti‘eti‘e i solofanua e lua mano o mano; ‘ua ‘ou fa‘alogo fo‘i i le faitau aofa‘i o i latou.
17 E fa‘apea fo‘i ‘ona a‘u iloa o solofanua i le mea na va‘aia, o ē ‘ua ti‘eti‘e ai, ‘ua i ai ufifatafata afi, ma le uakini, ma le teiō; o ulu fo‘i o solofanua e pei o ulu o leona, ‘ua alu atu nai o latou gutu le afi, ma le asu, ma le teiō.
18 O mea ia e tolu na fasiotia ai lona tolu o vaega o tagata, o le afi, ma le asu, ma le teiō na alu atu nai o latou gutu.
19 Auā ‘ua i o latou gutu ma o latou i‘u lo latou malosi auā o latou i‘u e pei o gata ia: ‘ua i ai ulu, o mea fo‘i ia latou te fa‘aleaga ai tagata.
20 O tagata fo‘i na totoe o ē le‘i fasiotia i nei mala, latou te le‘i salamō i galuega a o latou lima, o lo latou ifo i temoni, ma tupua auro ma ario, ma ‘apamemea, ma ma‘a, ma la‘au, o mea ia e lē mafaia ‘ona va‘ai, pe fa‘alogo, pe sāvavali.
21 Latou te le‘i salamō fo‘i i o latou fasioti tagata ma a latou togafiti fa‘ataulāitu, ma la latou faita‘aga, ma o latou gaoi.#