1 ‘Ua tatalaina fo‘i e ia o lona fitu o fa‘amaufa‘ailoga, ‘ona lologo ai lea o ē i le lagi pe ‘atoa le vaeluagalemū o le itū aso e tasi.
2 Na a‘u iloa fo‘i agelu e to‘afitu o ē tutū i luma o le Atua, ma avatu fo‘i ‘iā te i latou pū e fitu.
3 ‘Ua sau fo‘i le tasi agelu, ma tu mai i le fatafaitaulaga, ‘ua ‘iā te ia le ipu auro e fa‘amū ai mea manogi; ‘ua avatu ‘iā te ia mea manogi e tele, ‘ina ‘ia avatu ai ‘atoa ma talosaga a le ‘au pa‘ia uma i luga o le fata auro ‘ua i luma o le nofoāli‘i.
4 O le asu fo‘i o le mea manogi ‘ua i le lima o le agelu ‘ua alu a‘e, ‘atoa ma talosaga a le ‘au pa‘ia, i luma o le Atua.
5 ‘Ua tago fo‘i le agelu i le ipu e fa‘amū ai mea manogi, ‘ua ia fa‘atumuina ai i le afi a‘i le fatafaitaulaga, ‘ua lafo ifo ai i le lalolagi; ‘ona i ai lea o leo, ma faititili, ma uila, ma le mafui‘e.
6 O agelu e to‘afitu ‘ua i ai pū e fitu, ‘ua latou sauniuni e ili.
7 ‘Ua ili fo‘i e le agelu muamua le pū, ‘ona i ai lea o le uato‘a ma le afi ‘ua fefiloi ma le toto, ‘ua lafo ifo i le lalolagi; ‘ona susunuina ai lea o lona tolu o vaega o le lalolagi, ma ‘ua susunuina o lona tolu vaega o la‘au, ‘ua susunuina vao iti lauolaola uma lava.
8 ‘Ua ili fo‘i e lona to‘alua o agelu le pū, ‘ona i ai lea peiseaī se mauga tele ‘ua mū i le afi, ‘ua lafo ifo i le sami,
9 ‘ona liu toto lea o lona tolu o vaega o le sami, ‘ona mamate ai lea o lona tolu o vaega o mea ola o i le sami, ‘atoa ma lona tolu o vaega o va‘a ‘ua fa‘aumatia.
10 ‘Ua ili fo‘i e lona to‘atolu o agelu le pū, ‘ona pa‘ū ai lea nai le lagi o le fetū tele, ‘ua mū e pei o se sulu, ma ‘ua pa‘ū ifo i lona tolu o vaega o vaitafe, ‘atoa ma puna o vai.
11 ‘Ua igoa le fetū i le ‘O‘ona; ‘ona fa‘a‘o‘onaina ai lea o lona tolu o vaega o vai, ‘ua oti fo‘i tagata e to‘atele i le vai, ‘ina ‘ua fa‘a‘o‘onaina.
12 ‘Ua ili fo‘i e lona to‘afa o agelu le pū, ‘ona taia ai lea o lona tolu o vaega o le lā, ma lona tolu o vaega o le masina, ‘atoa ma lona tolu o vaega o fetū, ‘ina ‘ia fa‘apouliuligia o lona ta‘itolu o latou vaega, e le‘i malamalama fo‘i o lona tolu o vaega o le ao, ‘ua fa‘apea fo‘i ma le pō.
13 Na ‘ou iloa, ma ‘ou fa‘alogo i le tasi aeto ‘ua lele i le taulotoaiga o le lagi, ‘ua fa‘apea mai ma le leo tele, “Auē, auē, auē i ē o nonofo i le lalolagi, ‘ona o isi iligāpu a agelu e to‘atolu o le a ilia mai.”