1 Na a‘u iloa atu fo‘i ‘ua tatalaina e le Tama‘i Mamoe le tasi o fa‘amaufa‘ailoga, ‘ona ‘ou fa‘alogo ai lea i le tasi o mea ola e fa, ‘ua leo i le faititili, ‘ua fa‘apea mai, “Sau ia.”
2 ‘Ona ‘ou va‘ai ai lea, fa‘auta fo‘i, o le solofanua sinasina, ‘ua i ai le ‘aufana i lē ti‘eti‘e ai; ‘ua avatu fo‘i ‘iā te ia le paleali‘i; ‘ona alu atu lea o ia, o lo‘o manumālō, o le a manumālō pea ia.
3 ‘Ua tatalaina fo‘i e ia o lona lua o fa‘amaufa‘ailoga, ‘ona ‘ou fa‘alogo ai lea i lona lua o mea ola, o lo‘o fa‘apea mai, “Sau ia.”
4 ‘Ona alu atu lea o le isi solofanua mūmū; ‘ua avatu fo‘i le pule i lē o ti‘eti‘e ai na te ‘ave‘eseina le filemū i le lalolagi, ‘ae latou te fefasia‘i ai; ‘ua avatu fo‘i ‘iā te ia le pelu tele.
5 ‘Ua tatalaina fo‘i e ia o lona tolu o fa‘amaufa‘ailoga, ‘ona ‘ou fa‘alogo ai lea i lona tolu o mea ola, o lo‘o fa‘apea mai, “Sau ia.” ‘Ona ‘ou va‘ai lea, fa‘auta fo‘i, o le solofanua uliuli; ‘ua i le lima o lē o ti‘eti‘e ai le fua fa‘atautau.
6 Na ‘ou fa‘alogo fo‘i i le leo mai le vā o mea ola e fa, ‘ua fa‘apea mai, “O le tau o le kuata o le saito o le tenari lea, o le tau o kuata e tolu o le karite o le tenari fo‘i lea; ‘ae ‘aua ‘e te fa‘aleaga i le suāu‘u ma le uaina.”
7 ‘Ua tatalaina fo‘i e ia o lona fa o fa‘amaufa‘ailoga, ‘ona ‘ou fa‘alogo ai lea i le leo o lona fa o mea ola, ‘ua fa‘apea mai, “Sau ia.”
8 ‘Ona ‘ou va‘ai lea, fa‘auta, o le solofanua samasama, ma lē ti‘eti‘e ai, o lona igoa o le Oti, ‘ua mulimuli atu fo‘i Seoli ‘iā te ia; ‘ua avatu fo‘i ‘iā te i lā‘ua le pule e fasioti i lona fa o vaega o le lalolagi i le pelu, ma le oge, ma le fa‘ama‘i, ‘atoa ma manu fe‘ai o le vao.
9 ‘Ua tatalaina fo‘i e ia o lona lima o fa‘amaufa‘ailoga, ‘ona ‘ou iloa lea o i lalo ifo o le fatafaitaulaga o agaga o ē na fasiotia ‘ona o le afioga a le Atua, ma le mau na latou tāofi mau ai.
10 ‘Ua latou ‘alalaga fo‘i ma le leo tele, ‘ua fa‘apea atu, “Le Ali‘i e, le pa‘ia ma le fa‘amaoni ‘e te lē fa‘amasino ‘ea ma taui i lo matou toto i ē nonofo i le lalolagi se‘ia afea?”
11 ‘Ua foa‘iina atu ‘iā te i latou ta‘ito‘atasi ‘ofu sisina; ‘ua fai atu fo‘i ‘iā te i latou, ‘ia latou fa‘atalitali lemū se‘ia toe itiiti, se‘ia ‘ato‘atoa mai ai o latou uso a ‘au‘auna ‘atoa ma o latou uso, o le a fasiotia pei o i latou lava.
12 Na a‘u iloa atu fo‘i ‘ua tatalaina e ia o lona ono o fa‘amaufa‘ailoga, fa‘auta fo‘i, o le mafui‘e tele, o le lā fo‘i ‘ua liua ‘ua uliuli e pei o le ‘ie fulufulu talatala, o le masina fo‘i ‘ua liua e pei o le toto.
13 O fetū fo‘i o le lagi ‘ua pa‘u‘ū i le lalolagi, e pei o le mati ‘ona to‘ulu o ona fua moto pe a lūlūina e le matagi tetele.
14 Na mavae atu fo‘i le lagi pei o se tusi ‘ua ta‘aia, o mauga ma motu uma fo‘i ‘ua ‘ave‘eseina i mea sa i ai.
15 O tupu fo‘i o le lalolagi, ma ali‘i sili, ma ta‘ita‘i o ‘au, ma ē ‘ua tamao‘āiga, ma ē ‘ua malolosi, ma pologa uma, ‘atoa ma tama a le ‘ele‘ele uma ‘ua latou lalafi i ana ma papa o mauga.
16 ‘Ua latou fai atu fo‘i i mauga ma papa, “Mafuli mai ia ‘iā te i matou, ma tanuma‘i i matou ai le silafaga a lē ti‘eti‘e i le nofoāli‘i, ma le to‘asā o le Tama‘i Mamoe.
17 Auā ‘ua o‘o mai le aso tele o lo latou to‘asā, o ai fo‘i se na te mafaia ‘ona tu atu?”#