1 ‘Ua mavae atu ia mea, ‘ona ‘ou iloa atu lea, fa‘auta, o le faitoto‘a ‘ua avanoa i le lagi, o le ulua‘i leo fo‘i na ‘ou fa‘alogo ai e pei o le pū ‘ona tautala mai ‘iā te a‘u, ‘ua fa‘apea mai, “‘Inā sau ia i luga nei, ‘ou te fa‘aali atu ai ‘iā te oe mea e tusa ‘ona tutupu amulī.”
2 ‘Ona a‘u i le Agaga loa lea; fa‘auta fo‘i, ‘ua tu mai i le nofoāli‘i i le lagi, ‘ua ti‘eti‘e fo‘i le tasi i le nofoāli‘i.
3 O lē ti‘eti‘e mai fo‘i ‘ua pei o le ma‘a iasepi ma le salikea lona tino mai; ‘ua si‘osi‘oina fo‘i le nofoāli‘i e le nuanua e pei o le samaraki lona tino mai.
4 ‘Ua si‘osi‘oina fo‘i le nofoāli‘i e nofoāli‘i e luafulu ma le fa; na ‘ou iloa fo‘i o toeaina e to‘aluafulu ma le to‘afa o ti‘eti‘e i ia nofoāli‘i, ‘ua ‘o‘ofu i ‘ofu sisina; ‘ua i o latou ulu fo‘i o pale auro.
5 ‘Ua o‘o mai fo‘i uila, ma faititili, ma leo mai le nofoāli‘i; o sulu fo‘i e fitu o mumū fa‘amalamalama i luma o le nofoāli‘i, o Agaga ia e to‘afitu o le Atua.
6 ‘Ua i luma fo‘i o le nofoāli‘i i le sami tioata, e pei o le ma‘a tioata.‘Ua i totonu o le nofoāli‘i ma ‘ua li‘oli‘oina le nofoāli‘i e mea ola e fa ‘ua tūtūmu i mata i luma ‘atoa ma tua.
7 O le mea ola muamua e pei o le leona, o lona lua o mea ola e pei o se povi ta‘anoa, o lona tolu o mea ola e pei o le tagata ona mata, o lona fa fo‘i o mea ola e pei o le aeto ‘ua lele.
8 O mea ola fo‘i e fa e ta‘itasi ma ona ‘apa‘au e ono, ‘ua fa‘ata‘ali‘oli‘o ai, ma ‘ua mata ‘atoa i latou i fafo ma totonu; latou te lē mapu lava i le ao ma le po i le fai atu,“E pa‘ia, e pa‘ia, e pa‘ia le Ali‘i,le Atua e ona le malosi uma lava,o lē na soifua, o lo‘o soifua fo‘i,o le a afio mai.”
9 A vivi‘i fo‘i, ma fa‘ane‘ene‘e, ma fa‘afetai atu mea ola i lē o ti‘eti‘e i le nofoāli‘i, o lē soifua e fa‘avavau e fa‘avavau lava.
10 ‘Ona fa‘apa‘ū ai lea o toeaina e to‘aluafulu ma le to‘afa i luma o lē ti‘eti‘e i le nofoāli‘i, ma ifo atu i lē soifua e fa‘avavau e fa‘avavau lava, ma lafo o latou pale i luma o le nofoāli‘i, o lo‘o fa‘apea atu:
11 “Lo matou Ali‘i e, ma lo matou Atuae tatau lava oe ‘ina ‘ia tu‘u atu ‘iā te oe le vi‘iga,ma le fa‘ane‘ene‘ega ma le mana.Auā na e faia mea uma lava,‘ona o lou finagalo fo‘i e i ai i latou ma ‘ua faia.”