1 ‘Ona a‘u iloa lea o le lagi fou ma le lalolagi fou; auā ‘ua mavae atu le ulua‘i lagi, ma le ulua‘i lalolagi, ‘ua leai fo‘i se toe sami.
2 Na ‘ou iloa fo‘i le ‘a‘ai pa‘ia, o Ierusalema fou, ‘ua alu ifo mai le Atua i le lagi, ‘ua saunia pei o se fa‘ato‘ānofotane ‘ua teuteuina mo lana tane.
3 Na ‘ou fa‘alogo fo‘i i le leo tele mai le lagi, ‘ua fa‘apea mai, “Fa‘auta, ‘ua i ai le afio‘aga o le Atua fa‘atasi ma tagata e mau fo‘i o ia ma i latou; e fai fo‘i i latou mōna nu‘u, e ‘iā te i latou le Atua lava.
4 E sōloi‘esea fo‘i e le Atua loimata uma i o latou mata, e leai fo‘i se toe oti, po o se fa‘anoanoa, po o se auē, e leai fo‘i se toe puapuagā auā ‘ua mavae atu mea muamua.”
5 ‘Ua fetalai mai fo‘i lē ti‘eti‘e i le nofoāli‘i, “Fa‘auta, ‘ou te faia ‘ia fou mea uma lava.” ‘Ua fetalai mai fo‘i o ia ‘iā te a‘u, “‘Ia e tusi; auā o ‘upu nei e moni ma le fa‘amaoni ia.”
6 ‘Ua fetalai mai fo‘i o ia ‘iā te a‘u, “‘Ua uma ‘ona fai. O a‘u le Alefa ma le Omeka, o le amataga ma le gata‘aga. O lē ‘ua fia inu ‘ou te foa‘ifuaina atu ‘iā te ia a‘i le puna o le vai ola.
7 O lē manumālō e maua e ia mea uma, e fai fo‘i a‘u mōna Atua, e fai fo‘i o ia mo‘u atali‘i.
8 A o ē loto vaivai, ma ē lē fa‘atuatua, ma ē fai mea e ‘inosia, ma ē fasioti tagata, ma ē faita‘aga, ma ē fa‘ataulāitu, ma ē ifo i tupua, ‘atoa ma ē tala pepelo uma, e fai o latou tofi i le lepa e mū i le afi ma le teiō, o le oti fa‘alua lea.”
9 ‘Ua alu ane fo‘i ‘iā te a‘u le tasi o ia agelu e to‘afitu o ē sa i ai ipu e fitu na tūtūmu i mala e fitu e gata ai, ‘ua tautala mai fo‘i o ia ‘iā te a‘u na fa‘apea mai, “Sau ia, ‘ou te fa‘aali atu ‘iā te oe le fa‘ato‘ānofotane, o le faletua lea o le Tama‘i Mamoe.”
10 ‘Ua ia ‘avea fo‘i a‘u i le Agaga i le mauga tele ma le maualuga, ‘ua ia fa‘aali fo‘i ‘iā te a‘u Ierusalema, o le ‘a‘ai tele ma le pa‘ia, o lo‘o alu ifo i le lagi mai le Atua.
11 ‘Ua i ai le pupula o le Atua; o lona pupula fo‘i e pei o se ma‘a tāua lava, e pei o se ma‘a iasepi i lona fa‘atioata mai.
12 ‘Ua i ai fo‘i le pā tele ma le maualuga ‘ua i ai puipui e sefulu ma le lua, ‘ua i puipui fo‘i agelu e to‘asefulu ma le to‘alua, ‘ua tusia ai fo‘i igoa, o igoa ia o itū‘āiga e sefulu ma le lua o le fānauga a Isaraelu.
13 ‘Ua i sasa‘e o puipui e tolu, ma i le itū i matū o puipui e tolu, ‘ua i le itū i saute o puipui e tolu, ‘ua i sisifo o puipui e tolu.
14 ‘Ua i le pā fo‘i o le ‘a‘ai o fa‘avae e sefulu ma le lua, ‘ua i ai fo‘i igoa o le ‘au ‘aposetolo a le Tama‘i Mamoe e to‘asefulu ma le to‘alua.
15 O lē na tautala ma a‘u sa i ai le u auro e fua a‘i e ia le ‘a‘ai, ma ona puipui, ‘atoa ma ona pā.
16 ‘Ua fa‘atū fa‘atafafā fo‘i le ‘a‘ai, o lona umi ‘ua tusa ma lona lautele; ‘ua fuatia fo‘i e ia o le ‘a‘ai i le u, e sefulu afe ma afe e lua o setatio; o lona umi, ma le lautele, ma le maualuga, ‘ua tutusa lava ia.
17 ‘Ua fuatia fo‘i e ia lona pā, e tasi le selau ma le fagafulu ma le fa o kupita, o le fua a le tagata, o a le agelu lea.
18 ‘Ua ati fo‘i lona pā i ma‘a iasepi; o le ‘a‘ai o le auro lelei lea, ‘ua pei o le tioata manino.
19 ‘Ua teteu fo‘i noopa o le ‘a‘ai i ma‘a tāua uma; o le noopa muamua o le iasepi lea, o lona lua o le safaira lea, o lona tolu o le kakito lea, o lona fa o le samaraki lea;
20 o lona lima o le saritonu lea, o lona ono o le salikea lea, o lona fitu o le tasesa lea, o lona valu o le soama lea, o lona iva o le topasi lea, o lona sefulu o le kuasopera lea, o lona sefulu ma le tasi o le uakini lea o lona sefulu ma le lua o le aselama lea.
21 O puipui fo‘i e sefulu ma le lua o penina ia e sefulu ma le lua; ta‘itasi le puipui ma le penina e tasi na fai a‘i; o le ala tele fo‘i o le ‘a‘ai o le auro lelei lea, e pei o le tioata manino.
22 ‘Ou te le‘i iloa ai fo‘i se malumalu; auā o lona malumalu o le Ali‘i le Atua lea, e ona le malosi uma lava, ‘atoa ma le Tama‘i Mamoe.
23 E lē aogā fo‘i i le ‘a‘ai ‘ona pupula i ai o le lā, po o le masina; auā o le pupula o le Atua ‘ua fa‘amalamalamaina ai ia, o le Tama‘i Mamoe fo‘i o lona molī lea.
24 O nu‘u fo‘i o ē ‘ua fa‘aolaina latou te sāvavali i lona malamalama; o tupu fo‘i o le lalolagi latou te ‘aumai i ai o latou mamalu ma vi‘iga.
25 O ona puipui fo‘i e lē punitia lava i le ao; auā e leai se po i lea mea.
26 Latou te ‘aumai fo‘i i ai le mamalu ma le vi‘iga o nu‘u.
27 E lē sao atu lava i ai se mea leaga e tasi, po o sē na te faia se mea ‘inosia, po o sē pepelo; na o i latou lava ē ‘ua tusia i le tusi o le ola a le Tama‘i Mamoe.#