1 Na a‘u iloa fo‘i le agelu ‘ua alu ifo i le lagi, ‘ua ‘iā te ia le ki o le tō e lē gata, ‘ua i lona lima fo‘i le maea u‘amea tele.
2 ‘Ua pu‘e fo‘i e ia le tarako, o le gata tuai, o le tiapolo lea ma Satani, ‘ua ia fusifusi fo‘i ‘iā te ia i tausaga e afe.
3 ‘Ua ia lafo fo‘i ‘iā te ia i le tō e lē gata, ‘ua pupuni fo‘i ‘iā te ia, ma tu‘uina atu le fa‘amaufa‘ailoga i ona luga, ‘ina ‘ia lē toe fa‘asesēina e ia o nu‘u, se‘ia ‘atoa ia tausaga e afe; a mavae fo‘i ia, e tatau ‘ona tatalaina o ia i nai aso.
4 Na a‘u iloa fo‘i nofoāli‘i, ma i latou ti‘eti‘e ai, ‘ua tu‘uina atu fo‘i le fa‘amasinoga ‘iā te i latou; na a‘u iloa fo‘i agaga o ē ‘ua vavae‘eseina o latou ulu ‘ona o le mau ‘iā Iesu ma le afioga a le Atua, o ē na lē ifo i le manu fe‘ai po o lona fa‘atagata, na lē talia fo‘i le fa‘ailoga i o latou muaulu po o latou lima; ‘ua latou ola fo‘i, ma ‘ua fai ma tupu fa‘atasi ma Keriso i tausaga e afe.
5 A o ē totoe o ē ‘ua oti, e le‘i toe ola i latou se‘ia ‘atoa ia tausaga e afe. O le ulua‘i toetū lenā.
6 ‘Amu‘ia mōna ‘ua pa‘ia lē ‘ua i ai se tofi i le ulua‘i toetū; e lē o‘o fo‘i le pule a le oti fa‘alua ‘iā te i latou, ‘ae ‘avea i latou ma ositaulaga a le Atua ma Keriso, latou te fai ma tupu fo‘i fa‘atasi ma ia i tausaga e afe.
7 Pe a ‘atoa fo‘i ia tausaga e afe, ‘ona tatalaina lea o Satani a‘i le mea na puipuiina ai o ia.
8 E alu atu fo‘i o ia e fa‘asesē i nu‘u o i itū e fa o le lalolagi, o Koku ma Makoku, e fa‘apotopoto ‘iā te i latou i le tau‘a, ‘ua pei o le oneone o le sami i latou ‘ona to‘atele.
9 ‘Ua ō a‘e fo‘i i latou i le mafolafola o le lalolagi, ‘ua latou si‘omia fo‘i le toagalauapi a le ‘au pa‘ia ma le ‘a‘ai ‘ua fa‘apelepeleina; ‘ona alu ifo lea o le afi mai le Atua i le lagi, ‘ua susunu ai ‘iā te i latou.
10 O le tiapolo fo‘i o lē na fa‘asesē ‘iā te i latou, ‘ua lafoina o ia i le lepa afi ma le teiō, o i ai le manu fe‘ai le perofeta pepelo; e puapuagāina ai i latou i le ao ma le pō e fa‘avavau fa‘avavau lava.
11 Na a‘u iloa fo‘i le nofoāli‘i tele e sinasina, ma lē o ti‘eti‘e ai, ‘ua sōsōla ‘ese le lalolagi ma le lagi i ona luma, e lē iloa fo‘i se mea e tu ai i lā‘ua.
12 Na a‘u iloa fo‘i o ē na oti, o tagatanu‘u ‘atoa ma ali‘i, o tutū i luma o le Atua, ‘ona fofola lea o tusi; ‘ua fofola fo‘i ma le tasi tusi, o le tusi lea o le ola; ‘ona fa‘amasinoina ai lea o ē na oti i mea ‘ua tusia i tusi, e tusa ma a latou amio.
13 ‘Ua ‘ava‘e fo‘i e le sami o ē na oti sa i ai, ‘ua ‘ava‘e fo‘i e le oti ma seoli o ē na oti sa i ai; e ta‘itasi fo‘i o i latou ma fa‘amasinoina e tusa ma a latou amio.
14 ‘Ua lafoina fo‘i le oti ma seoli i le lepa afi; o le oti fa‘alua lea, o le lepa afi lea.
15 ‘Ai se tasi ‘ua iloa ‘ua lē tusia i le tusi o le ola, ‘ua lafoina lea i le lepa afi.