1 ‘Ona a‘u iloa ai lea o le manu fe‘ai ‘ua alu a‘e nai le sami, e fitu ona ulu ma ona nifo e sefulu; ‘ua i ona nifo fo‘i o paleali‘i e sefulu, ‘ua i ona ulu fo‘i o le igoa fāifai.
2 O le manu fe‘ai fo‘i na ‘ou iloa, e pei o le nameri, o ona vae fo‘i e pei o vae o le urosa, ma lona gutu e pei o le gutu o le leona. ‘Ua tu‘uina atu fo‘i ‘iā te ia e le tarako lona malosi, ma lona nofoāli‘i, ma le pule tele.
3 Na a‘u iloa fo‘i le tasi o ona ulu e peiseaī ‘ua foa a mate; a o lona foa na fai a mate ai ‘ua mafu, ‘ona ofo ai lea o le lalolagi uma ma latou mulimuli atu i le manu fe‘ai.
4 ‘Ua latou ifo fo‘i i le tarako o lē na tu‘uina atu le pule i le manu fe‘ai, ‘ua latou ifo fo‘i i le manu fe‘ai, ‘ua fa‘apea atu, “O ai sē tusa ma le manu fe‘ai? O ai sē na te mafaia ‘ona tau ma ia?”
5 ‘Ua avatu fo‘i ‘iā te ia le gutu e tautala ai i ‘upu fa‘asausili ma ‘upu fāifai; ‘ua tu‘uina atu fo‘i ‘iā te ia le pule e tau ai le ta‘ua i masina e fagafulu ma le lua.
6 ‘Ona tautala lea o ia ‘ua ‘upu leaga i le Atua, ‘ua ia ‘upu leaga i lona suafa, ma lona afio‘aga, o i latou ia o ē ‘ua nonofo i le lagi.
7 ‘Ua tu‘uina atu fo‘i ‘iā te ia ‘ia tau le tau‘a ma le ‘au pa‘ia, ‘ina ‘ia manumālō ‘iā te i latou. ‘Ua tu‘uina atu fo‘i ‘iā te ia e pule i itū‘āiga uma, ma gagana ‘ese‘ese, ma nu‘u.
8 ‘Ua ifo fo‘i ‘iā te ia o i latou uma o ē nonofo i le lalolagi, ‘ua lē tusia o latou igoa talu ‘ona fa‘avaeina o le lalolagi, i le tusi o le ola a le Tama‘i Mamoe na fasia.
9 ‘Ai se tasi ‘ua i ai taliga, ‘inā fa‘alogo mai ia o ia:
10 ‘Ai sē na te ta‘ita‘iina nisi fa‘atagataotau‘a,e alu lava ia fa‘atagataotau‘a;‘ai sē na te fasiotia i le pelu,e tusa ‘ona fasiotia o ia i le pelu.O le mea ‘ua fia maua ai le ‘onosa‘i ma le fa‘atuatua o le ‘au pa‘ia.
11 Na a‘u iloa fo‘i le tasi manu fe‘ai ‘ua alu a‘e nai le fanua, ‘ua i ai fo‘i ona nifo e lua pei o nifo o se tama‘i mamoe, a ‘ua tautala ia pei o se tarako.
12 ‘Ua fai fo‘i e ia le pule uma a le ulua‘i manu fe‘ai i ona luma; ma ‘ua faia e ia ‘ona ia ifo o le lalolagi ma ē ‘ua nonofo ai i le ulua‘i manu fe‘ai, o le ‘ua mafu lona foa na fai a mate ai.
13 ‘Ua faia fo‘i e ia fa‘ailoga tetele, o lea ‘ua fai ai e ia ‘ina ‘ia alu ifo le afi mai le lagi i le lalolagi i luma o tagata.
14 ‘Ua ia fa‘asesē fo‘i i ē ‘ua nonofo i le lalolagi ‘ona o ia fa‘ailoga ‘ua tu‘uina atu ‘iā te ia na te faia i luma o le manu fe‘ai, o lo‘o fai atu ia i ē na nonofo i le lalolagi, latou te faia se fa‘atagata o le manu fe‘ai e ona le manu‘a i le pelu a ‘ua ola.
15 ‘Ua tu‘uina atu fo‘i ‘iā te ia na te avatua le mānava i le fa‘atagata o le manu fe‘ai, ‘ina ‘ia tautala le fa‘atagata o le manu fe‘ai, ma ‘ia faia ‘ina ‘ia fasiotia i latou uma o ē lē ifo atu i le fa‘atagata o le manu fe‘ai.
16 ‘Ua faia fo‘i e ia ‘ona ia fa‘ailogaina o tagata uma, o tagata nu‘u ‘atoa ma ali‘i, o ē mau‘oa ma ē matitiva, o ē sa‘oloto ma ē pologa, ‘ia fa‘ailogaina i latou i o latou lima taumatau, po o latou muaulu.
17 ‘Ina ‘ia lē mafaia ‘ona fa‘atau mai pe fa‘atau atu e se tasi, tau lava o ē ‘ua i ai le fa‘ailoga, po o le igoa o le manu fe‘ai, po o le faitau aofa‘i o lona igoa.
18 O le mea lenei e ao ‘ina i ai le poto. O lē ‘ua i ai le mafaufau ‘inā faitau ia o ia i le faitau aofa‘i o le manu fe‘ai; auā o le faitau aofa‘i lea o le tagata; o lona faitau aofa‘i fo‘i, E ono selau ma le onogafulu ma le ono. #