1 O le tasi tagata o Ramata-so-fimo i le mauga o Efaraima, o lona igoa o Elekana le atali‘i o Ieroama, o le atali‘i ia o Eliu, o le atali‘i ia o To‘u, o le atali‘i ia o Sufi, o le sa Efaratā.
2 Sa nonofo ana avā e to‘alua, o Hana le igoa o le tasi, o Penina le igoa o le tasi; sa ‘iā Penina le fānau, ‘ae leai se fānau a Hana.
3 Na alu a‘e lea tagata nai lana ‘a‘ai i lea tausaga ma lea tausaga e tapua‘i ma fai taulaga i Sailo i le ALI‘I o ‘au; sa i lea mea fo‘i atali‘i e to‘alua o Eli, o Hofeni ma Fineaso, o ositaulaga a le ALI‘I.
4 A o‘o fo‘i i le aso e fai ai le taulaga a Elekana, ‘ona avatu lea e ia o tufa‘aga ‘iā Penina lana avā, ma ana tama tane uma ‘atoa ma ana tama teine.
5 A ‘ua avatu ‘iā Hana le tufa‘aga e tusa ma tufa‘aga e lua, auā ‘ua ia alofa ‘iā Hana; a o le pule a le ALI‘I na lē fānau ai o ia.
6 ‘Ua fa‘alili fo‘i ‘iā te ia lē na ita mai, ‘ua fa‘a‘ono‘ono fo‘i ‘iā te ia ‘ina se‘ia ita, auā na lē fānau o ia o le pule a le ALI‘I.
7 ‘Ua fa‘apea ‘ona fai e Elekana i lea tausaga ma lea tausaga i le alu a‘e o le fafine i le fale o le ALI‘I; ‘ua fa‘apea ‘ona fa‘alili ‘iā te ia, ‘ona tagi ai lea o ia ma ‘ua lē ‘ai.
8 ‘Ona fai atu lea o Elekana lana tane ‘iā te ia, “Hana e, se a le mea ‘e te tagi ai? Se a fo‘i le mea ‘e te lē ‘ai ai? Se a fo‘i le mea e tigā ai lou loto? E lē ‘ua sili ‘ea ‘ona lelei o a‘u ‘iā te oe i tama tane e to‘atinoagafulu?”
9 ‘Ua uma ‘ona ‘ai, ‘ua uma fo‘i ‘ona inu i Sailo ‘ona tula‘i lea o Hana; sa nofo fo‘i Eli le ositaulaga i le nofoa i le pou o le faitoto‘a o le malumalu o le ALI‘I.
10 A o le fafine, ‘ua tigā lona loto, ‘ua ole atu i le ALI‘I ma ‘ua tagi tele.
11 ‘Ua ia tautō fo‘i, ‘ua fa‘apea atu, “Le ALI‘I o ‘au e, ‘āfai ‘e te silasila mai i le puapuagā o lau ‘au‘auna fafine, ma e manatu mai ‘iā te a‘u, ‘ae lē fa‘agalogalo mai i lau ‘au‘auna fafine, ma e foa‘i mai i lau ‘au‘auna fafine se tama tane, ‘ona ‘ou foa‘i atu lea o ia i le ALI‘I i aso uma o lona ola; e lē o‘o fo‘i se tafi i lona ulu.”
12 ‘Ua fa‘atele lana tatalo i luma o le ALI‘I, a ‘ua va‘ai atu Eli i lona gutu.
13 A o Hana, ‘ua tautala lava ia i lona loto, ‘ua na ‘ona memu o ona laugutu, ‘ae lē lagona lona leo, ‘ua fa‘apea a Eli ‘ua ‘onā o ia.
14 ‘Ona fai mai lea o Eli ‘iā te ia, “‘E te ‘onā se‘ia afea? ‘ia te‘a lou ‘onā i le uaina.”
15 ‘Ua tali atu Hana, ‘ua fa‘apea atu ‘iā te ia, “Le ali‘i e, e leai; o a‘u o le fafine ‘ua tigā le loto, ‘ou te le‘i inu i se uaina po o se ‘ava, a ‘ua ‘ou momoli atu lo‘u loto i le ALI‘I.
16 ‘Aua ‘e te ta‘ufa‘atasia lau ‘au‘auna ma fafine ulavavale; auā o le tele o lo‘u mafaufau ma lo‘u tigā ‘ua ‘ou tautala ai ‘ua o‘o i lenei itū aso.”
17 ‘Ona tali mai ai lea o Eli, ‘ua fa‘apea mai, “Alu ia oe ma le manuia; ‘ia foa‘i mai fo‘i e le Atua o Isaraelu le mea na e fa‘atoga atu ai ‘iā te ia.”
18 ‘Ua fai atu o ia, “‘Ia alofaina lau ‘au‘auna fafine e oe.” ‘Ona alu ai lava lea o le fafine, ‘ua ‘ai o ia ‘ua lē toe mata fa‘anoanoa.
19 ‘Ua latou tutū i le taeao lava ma latou tapua‘i i luma o le ALI‘I; ‘ona latou fo‘i atu lea, ‘ua o‘o i lo latou fale i Rama. Na iloa Elekana ‘ia Hana lana avā, ‘ua manatua fo‘i le ALI‘I ‘iā te ia.
20 ‘Ua o‘o i ona aso na tō ai Hana, ‘ua fānau mai le tama tane; ‘ua ia fa‘aigoa ‘iā te ia, o Samuelu; ‘ua fa‘apea ia, “Auā na ‘ou fa‘atoga i le ALI‘I mo ia.”
21 ‘Ua alu a‘e le tagata lea o Elekana ma lona ‘āiga uma e fai le taulaga i le ALI‘I, o le taulaga e fai i tausaga, ma le mea na ia tautō ai.
22 A ‘ua lē alu a‘e Hana, auā na ia fai atu i lana tane, “Se‘ia te‘a le tama ma le susu, ‘ona ‘ou molia ai lea o ia, ‘ia iloa o ia i luma o le ALI‘I ma ‘ia nofo ai pea lava.”
23 ‘Ona fai mai lea o Elekana lana tane ‘iā te ia, “‘Ia e faia le mea ‘e te loto i ai; ‘inā nofo ia, se‘ia te‘a o ia ma le susu; tau lava ‘ina ‘ia fa‘ataunu‘uina e le ALI‘I lana afioga.” ‘Ona fa‘amuli ai lea o le fafine, ma fa‘asusu i lana tama se‘ia te‘a o ia ma le susu.
24 ‘Ua te‘a o ia ma le susu, ‘ona la ō a‘e lea ma ia, ‘ua ‘ave fo‘i povi po‘a ta‘anoa e tolu, ma le efa e tasi o falaoa ma le fagu pa‘u o uaina, ‘ua momoli atu ‘iā te ia i le fale o le ALI‘I i Sailo, ‘ua itiiti lava le tama.
25 ‘Ua latou fasi le tasi povi, ‘ona avatu ai lea o le tama ‘iā Eli.
26 ‘Ua fai atu fo‘i Hana ‘iā te ia, “Le ali‘i e, ‘ua soifua oe le ali‘i e, o a‘u lava le fafine sa tā ‘i‘inei ma oe; sa ‘ou fa‘atoga atu ai i le ALI‘I;
27 o le tama nei na ‘ou tatalo atu ai; ‘ua foa‘i mai e le ALI‘I ‘iā te a‘u le mea na ‘ou fa‘atoga atu ai ‘iā te ia.
28 O a‘u fo‘i ‘ua ‘ou tu‘uina atu o ia i le ALI‘I, ‘ua tu‘uina atu o ia i le ALI‘I i aso uma e ola ai o ia.”‘Ona ifo ai lea o ia i le ALI‘I i lea mea.