1 E tasi le tausaga o le nofoa‘iga a Saulo, a o le tausaga e lua na fai ai o ia ma tupu ‘iā Isaraelu,
2 ‘Ona filifilia lea e Saulo tagata o Isaraelu e tolu afe; sa ‘iā Saulo afe e lua i Mekemase ma le mauga o Peteli; sa ‘iā Ionatana le afe e tasi i Kipea o Peniamina; a o le nu‘u ‘ua totoe ‘ua ia ‘a‘auina atu i latou ‘ia ta‘itasi ma alu i lona fale ‘ie.
3 ‘Ua fasia e Ionatana le leoleoga a Filisitia sa i Kipea ‘ua fa‘alogo i ai Filisitia. ‘Ona ili ai lea o le pū e Saulo i le nu‘u uma, ‘ua fa‘apea ane o ia, “‘Ia fa‘alogo ai sa Eperū.”
4 ‘Ua fa‘alogo ai Isaraelu uma, ‘ua fasia e Saulo le leoleoga a Filisitia; ‘ua ‘inosia ai fo‘i Isaraelu e Filisitia. ‘Ona fa‘apotopoto ai lea o le nu‘u ‘iā Saulo i Kilikala.
5 ‘Ua fa‘apotopoto Filisitia e tau ma Isaraelu, e tolu sefulu afe o kariota, e ono afe o ē ti‘eti‘e i solofanua ma tagata pei o le oneone i le matāfaga ‘ona to‘atele; ‘ua latou ō a‘e ma tolauapi i Mekemase i sasa‘e o Petavene.
6 ‘Ua iloa e tagata o Isaraelu ‘ua pagātia i latou, (auā ‘ua atuatuvale le nu‘u,) ‘ona lalafi ai lea o le nu‘u i ana ma le vao talatala, ma gaoā, ma ‘olo maualuga ma lua.
7 ‘Ua sopo‘ia atu fo‘i Ioritana e Eperu, ‘ua o‘o i le nu‘u o Kato ma Kiliata; ‘ae nofo pea Saulo i Kilikala, o lo‘o mulimuli ‘iā te ia le nu‘u uma ma le tetemū.
8 ‘Ua fa‘atali o ia i aso e fitu, o aso ia na ‘atofa atu ai e Samuelu; ‘ae le‘i alu atu Samuelu i Kilikala, ‘ua ta‘ape fo‘i le nu‘u sa ‘iā te ia.
9 ‘Ona fai ane lea o Saulo, “‘Aumai ‘iā te a‘u se taulaga mū ma se taulaga fa‘afetai;” ‘ona fai ai lea e ia o le taulaga mū.
10 ‘Ua o‘o ‘ina a uma ‘ona faia e ia o le taulaga mū, fa‘auta ‘iā Samuelu, ‘ua alu atu; ‘ona alu ane lea o Saulo e fa‘afetaia‘i ma ofo atu ‘iā te ia.
11 ‘Ua fai mai Samuelu, “Se a lau mea ‘ua fai?”‘Ua tali atu Saulo, “Na ‘ou va‘ai, ‘ua ta‘ape le nu‘u sa ‘iā te a‘u ma oe fo‘i ‘ua e lē sau i aso na ‘atofaina mai, ma ‘ua fa‘apotopoto Filisitia i Mekemase,
12 o le mea lea na ‘ou fa‘apea ai, ‘‘Anei e fa‘aifo mai Filisitia ‘iā te a‘u i Kilikala, a na ‘ou lē fa‘atoga atu i le ALI‘I;’ ‘ona ‘ou fa‘amalosi lea ma ‘ou faia le taulaga mū.”
13 ‘Ona fai atu lea o Samuelu ‘iā Saulo, “‘Ua e valea i le mea ‘ua e faia, ‘ua e lē tausia le poloa‘iga a le ALI‘I lou Atua na ia poloa‘i atu ai ‘iā te oe; auā na fai a fa‘atumauina e le ALI‘I o lou mālō ‘iā Isaraelu e fa‘avavau.
14 A o lenei, e lē tumau lou mālō; ‘ua sā‘ilia e le ALI‘I se tagata mōna e tatau ma lona finagalo, ‘ua poloa‘i le ALI‘I ‘iā te ia e fai ma ali‘i o lona nu‘u, auā ‘ua e lē tausia le mea na poloa‘i mai ai le ALI‘I ‘iā te oe.”
15 ‘Ua tula‘i Samuelu, ‘ua alu a‘e nai Kilikala i Kipea o Peniamina; ‘ona faitau lea e Saulo o le nu‘u, o ē na i ai ‘iā te ia, pe ‘atoa se ono selau o tagata.
16 O Saulo fo‘i, ma Ionatana lona atali‘i, ma le nu‘u sa ‘iā te i lā‘ua, ‘ua latou nonofo i Kipea o Peniamina; a ‘ua tolauapi Filisitia i Mekemase.
17 ‘Ua ō ane o ē fa‘atafuna nai le togālauapi o Filisitia i ‘au e tolu; ‘ua fa‘asaga atu le tasi ‘au i le ala o Ofira i le nu‘u o Suala;
18 ‘Ua fa‘asaga atu le tasi ‘au i le ala o Peteorana, ‘ua fa‘asaga atu le tasi ‘au i le ala o le fanua e feagai ma le vanu o Sepoima i tala ane o le vao.
19 ‘Ua leai fo‘i se tufuga fai u‘amea i le nu‘u uma o Isaraelu, auā na fa‘apea ane Filisitia, “Ne‘i gaosi e Eperu se pelu po o se tao.”
20 Na alu ifo Isaraelu uma ‘iā Filisitia e ta‘itasi ma fa‘amata ai lona ‘oso u‘amea, ma le u‘amea o lana suōtosina, ma lana to‘i, ma lana selesaito.
21 A ‘ua ‘iā te i latou le ‘ili mo selesaito ma u‘amea suōtoso, ma tui mata tolu, ma to‘i, e fa‘amata a‘i fo‘i tui povi.
22 O le mea lea na leai ai se pelu po o se tao i lima o le nu‘u uma sa ‘iā Saulo ma Ionatana i le aso na tau ai le tau‘a; ‘ua na o Saulo ma Ionatana lona atali‘i sa i ai.
23 ‘Ua alu atu le leoleoga a Filisitia i le ala o Mekemase.#