1 ‘Ua fai atu Samuelu ‘iā Isaraelu uma, “Fa‘auta, ‘ua ‘ou fa‘alogo ‘iā ‘outou ‘upu i mea uma na ‘outou fai mai ai ‘iā te a‘u, ‘ua ‘ou tofia le tupu e pule ‘iā te ‘outou.
2 O lenei, fa‘auta, ‘ua savali le tupu i o ‘outou luma; a o a‘u nei, ‘ua toeaina a‘u ma ulusinā; fa‘auta fo‘i, o lo‘o ‘iā te ‘outou o‘u atali‘i; o a‘u fo‘i, ‘ua ‘ou fealua‘i i o ‘outou luma talu ‘ina ou itiiti, ‘ua o‘o mai i le aso nei.
3 Fa‘auta o a‘u, ‘ia ‘outou molia a‘u i luma o le ALI‘I, ma luma o lē ‘ua fa‘au‘uina e ia, se povi a ai ‘ua ‘ou ‘avea po o se asini a ai ‘ua ‘ou ‘avea po o ai ‘ua ‘ou fa‘asauā i ai po o ai ‘ua ‘ou fa‘atigāina? ‘ua ‘ou talia se taui mai ‘iā te ai ‘ina ‘ia ‘ou ufiufi ai o‘u mata ‘iā te ia? ‘ou te toe avatu ai ‘iā te ‘outou.”
4 ‘Ona tali mai ai lea o i latou, “‘Ua e lē fa‘asauā mai ‘iā te i matou, ‘ua e lē fa‘atigā mai ‘iā te i matou, ‘ua e lē talia lava se mea a se tasi.”
5 ‘Ona fai atu lea o ia ‘iā te i latou, “‘Ua silafia e le ALI‘I i lenei aso a ‘outou ‘upu, ‘ua silafia fo‘i le ‘ua fa‘au‘uina e ia, ‘ua ‘outou lē maua se mea ‘iā te a‘u;”‘Ua fai mai i latou, “‘Ua silafia.”
6 ‘Ona fai atu lea o Samuelu i le nu‘u, “O le ALI‘I o ia sa na fa‘atūina Mose ma Arona, o ia fo‘i na ‘aveina a‘e o ‘outou tamā a‘i le nu‘u o Aikupito.
7 O lenei, ‘inā tutū mai ia ‘outou, ‘ou te fa‘amasino ‘iā te ‘outou i luma o le ALI‘I i mea tonu uma a le ALI‘I na ia faia ‘iā te ‘outou ma o ‘outou tamā.
8 Na alu atu Iakopo i Aikupito, ‘ona ‘alalaga ai lea o ‘outou tamā i le ALI‘I; ‘ona ‘a‘auina atu ai lea e le ALI‘I o Mose ma Arona, ‘ua la ‘aumai i o ‘outou tamā nai Aikupito, ‘ua fa‘anonofo ‘iā te i latou i le mea nei.
9 ‘Ua galo ‘iā te i latou le ALI‘I lo latou Atua, ‘ona tu‘uina atu ai lea e ia ‘iā te i latou i le lima o Sesera o le na pule i ‘au a Hasora ma lima o Filisitia ma le lima o le tupu o Moapi, ‘ua latou tau ma i latou.
10 ‘Ona latou ‘alalaga lea i le ALI‘I, ‘ua fa‘apea atu ai ‘‘Ua matou agasala, auā na matou lafoa‘i i le ALI‘I, ‘ae matou ‘au‘auna ‘iā Paala ma Asaira; a o lenei, ‘ia e lavea‘i mai ‘iā te i matou a‘i lima o ē ita mai, ‘ona matou ‘au‘auna lea ‘iā te oe.’
11 ‘Ona ‘a‘auina mai lea e le ALI‘I ‘iā Ierupaala ma Petana ma Iefata ma Samuelu, sa lavea‘i mai ai ‘iā te ‘outou a‘i lima o ē na ita mai ‘iā te ‘outou i itū uma; sa ‘outou nonofo filemū ai.
12 ‘Ona ‘outou va‘ai atu lea ‘ua sau Naasa le tupu o le fānauga a Amoni e tau ma ‘outou, ‘ona ‘outou fai mai lea ‘iā te a‘u, ‘E leai, a ‘ia tofia se tupu e pule ‘iā te i matou; a o le ALI‘I lo ‘outou Atua, o lo ‘outou tupu lava lea.’
13 O lenei, fa‘auta mai ia i le tupu ‘ua ‘outou filifilia, sa ‘outou fa‘atoga mai ai; fa‘auta fo‘i, ‘ua foa‘i mai e le ALI‘I le tupu e pule ‘iā te ‘outou.
14 ‘Āfai tou te matata‘u i le ALI‘I, ma ‘au‘auna ‘iā te ia, ma fa‘alogo i lona si‘ufofoga, ‘ae lē fouvale ‘outou i le afioga a le ALI‘I; ‘ona mulimuli ai lea i le ALI‘I lo ‘outou Atua, o ‘outou, ‘atoa ma lo ‘outou tupu o lo‘o pule ‘iā te ‘outou.
15 ‘Ae ‘āfai tou te lē fa‘alogo i le si‘ufofoga o le ALI‘I, ‘ae fouvale ‘outou i le afioga a le ALI‘I, e o‘o atu le ‘a‘ao o le ALI‘I ‘iā te ‘outou, e pei ‘ona o‘o i o ‘outou tamā.
16 O lenei, ‘inā tutū mai ia ma ‘ia ‘outou va‘ai i lenei mea tele o le a faia nei e le ALI‘I i o ‘outou luma.
17 E lē o ona po nei ‘ea e fai ai le seleselegāsaito? ‘Ou te vala‘au i le ALI‘I, ‘ona tu‘u mai ai lea e ia o faititili ma uaga tou te iloa ai, ma ‘outou lagona ai, ‘ua tele le leaga ‘ua ‘outou faia i luma o le ALI‘I, ‘ina ‘ua ‘outou ole atu ai i se tupu mo ‘outou.”
18 ‘Ona vala‘au ai lea o Samuelu i le ALI‘I, ‘ona tu‘uina mai ai lea e le ALI‘I o faititili ma uaga i lea lava aso, ‘ua fefefe tele ai le nu‘u uma i le ALI‘I ma Samuelu.
19 ‘Ua fai mai le nu‘u uma ‘iā Samuelu, “‘Ia e fautua i le ALI‘I lou Atua mo au ‘au‘auna, ‘ina ‘ia lē oti i matou; auā ‘ua matou fa‘aopoopoina ‘iā matou agasala uma lenei mea leaga, ‘ina ‘ua matou fa‘atoga atu ai i se tupu mo i matou.”
20 ‘Ona fai atu lea o Samuelu i le nu‘u, “‘Aua tou te fefefe, e ui lava ‘ina ‘ua ‘outou faia nei mea leaga uma, tau lava ‘ina lē tu‘ua e ‘outou ‘ona mulimuli atu i le ALI‘I; a ‘ia ‘outou ‘au‘auna i le ALI‘I ma o ‘outou loto ‘atoa.
21 ‘Aua fo‘i tou te ō ‘ese ‘iā te ia; auā a ‘outou ō ‘ese ‘ona mulimuli ai lea ‘outou i mea fa‘atauva‘a ‘ua lē aogā, e lē malavea‘i fo‘i ‘iā te ‘outou, auā e fa‘atauva‘a i latou.
22 Auā e lē lafoa‘i e le ALI‘I i lona nu‘u ‘ona o lona suafa mamalu, auā ‘ua finagalo le ALI‘I e fai ‘outou mōna nu‘u.
23 O a‘u fo‘i ‘ia mamao ‘iā te a‘u ‘ona ‘ou agasala i le ALI‘I i lo‘u tu‘ua o le fautua mo ‘outou; ‘ou te fa‘asino fo‘i ‘iā te ‘outou le ala lelei ma le tonu.
24 Tau lava ‘ina matata‘u ‘outou i le ALI‘I, ma ‘au‘auna ‘iā te ia ma le fa‘amaoni ma o ‘outou loto ‘atoa; auā ‘ia ‘outou mānatunatu i mea tetele ‘ua na faia mo ‘outou.
25 ‘Ae ‘āfai tou te fai amio leaga pea, e fano ‘outou ‘atoa ma lo ‘outou tupu.”#