1 ‘Ona sola ai lea o Tavita nai Naiota i Rama, ‘ua alu ma fai atu i luma o Ionatana, “Se a le mea ‘ua ‘ou faia? o le a fo‘i la‘u agasala, po o le a lo‘u sesē i luma o lou Tamā, ‘ina ‘ua ia sā‘ili e fasioti ‘iā te a‘u?”
2 ‘Ona fai mai lea o ‘iā te ia, “‘Ia mamao lava lea; ‘e te lē oti lava; fa‘auta, e lē faia e lo‘u tama se mea tele po o se mea itiiti, ‘ae mua‘i ta‘u mai i o‘u taliga; e nanā ‘ea i se a e lo‘u tamā lenei mea ‘iā te a‘u? E lē o fa‘apea lava.”
3 A ‘ua tautō lava Tavita, ‘ua fai atu, “‘Ua iloa lava e lou tamā ‘ua alofagia a‘u e oe, ‘ua fa‘apea ane o ia, ‘‘Aua ne‘i iloa le mea nei e Ionatana ne‘i tigā ai o ia;’ o lo‘o soifua le ALI‘I, ‘ua e soifua fo‘i oe, e moni lava, ‘ua peiseaī o le la‘asaga e tasi i le vā o a‘u ma le oti.”
4 ‘Ona fai mai lea o Ionatana ‘iā Tavita, “O se mea ‘e te mana‘o i ai, ‘ou te faia lava lea mo oe.”
5 ‘Ua fai atu Tavita ‘iā Ionatana, “Fa‘auta, a taeao o le masina fa‘ato‘ā va‘aia e tatau ai ‘ona mā nonofo fa‘atasi ma le tupu, ma te ‘a‘ai ma ia; tu‘u mai ia o a‘u, ‘ou te lafi fo‘i i le vao se‘ia o‘o i le afiafi i e luā;
6 ‘āfai e fesili lou tama ‘iā te a‘u, ‘e te fai atu, ‘Na fa‘anoi mai lava Tavita ‘iā te a‘u, ‘ia momo‘e atu o ia i Peteleema lona nu‘u, auā e i ai le taulaga e fai i tausaga mo lona ‘āiga uma.’
7 ‘Āfai e fa‘apea mai o ia, ‘‘Ua lelei;’ o le manuia lea o lau ‘au‘auna; ‘ae ‘āfai e matuā to‘asā o ia, ‘ona iloa lea ‘ua finagalo vale mai o ia.
8 ‘E te alofa fo‘i i lau ‘au‘auna, auā o le feagaiga a le ALI‘I na e faia ma lau ‘au‘auna; ‘ae ‘āfai o i ai se agasala ‘iā te a‘u, ‘ia e fasioti lava oe ‘iā te a‘u; se a le mea ‘e te avatu ai a‘u i lou tamā?”
9 ‘Ona fai mai lea o Ionatana, “‘Ia mamao ‘iā te oe; auā ana ‘ou iloa lava ‘ua i‘u le filifiliga a lo‘u tamā, o le a o‘o se leaga ‘iā te oe, po ‘ua ‘ou ta‘u atu ‘iā te oe.”
10 ‘Ona fai atu lea o Tavita ‘iā Ionatana, “O ai ‘ea e ta‘u mai ‘iā te a‘u pe ‘āfai e tali mai lou tamā ‘iā te oe ma le ita?”
11 ‘Ua fai mai Ionatana ‘iā Tavita, “Sau ia, ‘inā tā ō atu i le vao;” ‘ona ō lea o i lā‘ua i le vao.
12 ‘Ona fai mai lea o Ionatana ‘iā Tavita, “Le ALI‘I le Atua o Isaraelu, ‘ia sisila mai o ia, a uma ‘ona ‘ou tofotofo i lo‘u tamā e fa‘apenei le aso taeao po o ē luā; fa‘auta fo‘i, ‘āfai e loto lelei o ia ‘iā Tavita, ‘āfai ‘ou te lē ‘auina atu se tasi ‘iā te oe e ta‘u atu ai ‘iā te oe,
13 ‘ia fa‘apea ‘ona faia e le ALI‘I ‘iā Ionatana ma ia fa‘aopoopo i ai; ‘ae ‘āfai e loto lo‘u tamā e agaleaga ‘iā te oe, ‘ou te ta‘u atu lava ‘iā te oe, ma tu‘uina atu ‘iā te oe ia alu ma le filemū; ‘ia ‘iā te oe fo‘i le ALI‘I, e pei ‘ona sa i ai i lo‘u tamā.
14 ‘Āfai ‘ou te ola pea a‘u, ‘ia e faia le alofa o le ALI‘I ‘iā te a‘u, ‘ia a‘u le oti; ‘ae ‘āfai ‘ou te oti,
15 auā le tu‘ua fo‘i lou alofa i lo‘u ‘āiga e fa‘avavau, pe a fa‘aumatia e le ALI‘I nai le fogā‘ele‘ele ta‘itasi uma o ē ita ‘iā Tavita.”
16 ‘Ua osi ai le feagaiga a Ionatana ma le ‘āiga o Tavita, ‘ua fa‘apea, “‘Ia su‘ea e le ALI‘I a‘i lima o ē ita ‘iā Tavita.”
17 ‘Ua fai atu Ionatana, ‘ia toe tautō Tavita ‘ina ‘ua alofa o ia ‘iā te ia; auā ‘ua ia alofa ‘iā te ia, pei o lona alofa ‘iā te ia lava.
18 ‘Ua fai mai Ionatana ‘iā te ia, “O le masina fa‘ato‘ā va‘aia taeao, e silia ai oe, auā e le nofoia lou nofoa.
19 A tolu ni ou aso, ‘ona e alu ifo loa lea, ma alu atu i le mea na e lafi ai i le aso na fai ai le mea, ma e nofo e latalata ane i le ma‘a o Asela.
20 O a‘u fo‘i, ‘ou te fana ni ū e tolu i le tasi ona itū, e peiseaī ‘ou te fana atu ai i se manulautī.
21 Fa‘auta fo‘i, ‘ou te ‘auina atu se tama e alu ma sā‘ili i ū; ‘āfai ‘ou te matuā fai atu i le tama, ‘Fa‘auta, o u o lo‘o i ou tala mai, ‘ia e tago i ai;’ ‘ona e sau ai lea, auā o le a manuia oe, ‘ua leai lava se mea; ‘ua soifua ALI‘I.
22 ‘Ae ‘āfai ‘ou te fai atu fa‘apea i le taule‘ale‘a, ‘Fa‘auta o u o lo‘o i ou tala atu;’ alu ia oe, auā ‘ua ‘auina atu oe e le ALI‘I.
23 A o le mea na tā tautala ai, o a‘u ma oe, fa‘auta, o le ALI‘I e vā a‘i tā‘ua, o oe ma a‘u e fa‘avavau.”
24 ‘Ua lafi Tavita i le vao ‘ua o‘o fo‘i i le masina fa‘ato‘ā va‘aia, ‘ona nofo ai lea o le tupu e fai le taumafataga.
25 ‘Ua nofo le tupu i lona nofoa, pei o isi aso, i le nofoa i tala ane o le pā o le fale; ‘ua tula‘i Ionatana, a ‘ua nofo Apineru i tafatafa o Saulo; ‘ua lē nofoia fo‘i le nofoa o Tavita.
26 A ‘ua lē fai mai e Saulo se ‘upu i lea aso, auā na ia fa‘apea, “‘Ua o‘o se mea ‘iā te ia, ‘ua lē mamā o ia, ai lava e lē mamā o ia.”
27 ‘Ua o‘o i le taeao, (o le aso lua lea o le masina,) ‘ua lē nofoia fo‘i le nofoa o Tavita; ‘ona fai mai lea o Saulo ‘iā Ionatana, lona atali‘i, “Po o le a le mea e lē sau ai le atali‘i o Iese, ananafi ‘atoa ma le asō e ‘ai ai?”
28 ‘Ona tali atu ai lea o Ionatana, ‘iā Saulo, “Na fa‘anoi mai lava Tavita, ‘ia alu o ia i Peteleema;
29 ‘ua fai mai, ‘‘Ia e tu‘u mai a‘u, ‘ou te alu; auā o le taulaga e fai i lo matou ‘āiga i le ‘a‘ai; ‘ua poloa‘i mai fo‘i lo‘u uso ‘iā te a‘u; o lenei, ‘āfai ‘e te alofa mai ‘iā te a‘u, tu‘u mai ia o a‘u ‘ia matou feiloa‘i ma o‘u uso; o le mea lea ‘ua lē sau ai o ia i le la‘o‘ai a le tupu.’”
30 ‘Ona ita ai lea o Saulo ‘iā Ionatana, ‘ua fai mai ‘iā te ia, “Le tama a le fafine amio pi‘opi‘o ma le finau vale ‘ou te le‘i iloa ‘ea ‘ua e filifilia le atali‘i o Iese i lo‘u fa‘amāina, ma le fa‘amāina o le lē lavalavā o lou tinā?
31 Auā o aso uma e ola ai le atali‘i o Iese i le fogā‘ele‘ele e lē fa‘atumauina oe ma lou mālō; o lenei, ‘ia e ‘a‘ami atu ‘iā te ia, ma ‘aumai ‘iā te a‘u, auā e oti lava ia.”
32 ‘Ona tali atu lea o Ionatana, ‘iā Saulo lona tamā, ‘ua fa‘apea atu ‘iā te ia, “E oti i se a? Se a se mea ‘ua faia e ia.?”
33 ‘Ona velo ai lea e Saulo le tao ‘iā te ia e fasi ai ‘iā te ia; ‘ona iloa ai lea e Ionatana, ‘ua tonu i lona tamā ‘ia fasiotia lava Tavita.
34 ‘Ona tula‘i lea o Ionatana nai le la‘o‘ai ma le ita tele, ‘ua lē ‘ai se mea i le aso e lua o le masina, auā ‘ua tigā ‘ona o Tavita, ‘ina ‘ua fa‘aleagaina o ia e lona tamā.
35 ‘Ua o‘o i le taeao, ‘ona ō atu lea o Ionatana, o i lā‘ua ma le tamaitiiti, i le vao i le itū la na la tu‘uina ma Tavita.
36 ‘Ua ia fai atu i lana ‘au‘auna, “Momo‘e atu, ‘inā sā‘ili ū ‘ou te fana atu.” ‘Ua momo‘e le tama, ‘ona fana atu lea le ū i ona tala atu.
37 ‘Ua o‘o atu le tama i le mea ‘ua i ai le ū na fana atu e Ionatana, ‘ona vala‘au atu lea e Ionatana, i le tama, ‘ua fa‘apea, “E lē ‘ua i ou tala atu ‘ea le ū?”
38 ‘Ona vala‘au atu lea e Ionatana, i le tama, “‘Ia tele vave lava, ‘aua ne‘i tu.” ‘Ua ao ū e le tama na ō ma Ionatana, ‘ona ‘aumai lea i lona ali‘i.
39 ‘Ua lē iloa e le tama le mea, na o Ionatana, ma Tavita ‘ua la iloa le mea.
40 ‘Ona tu‘u atu lea e Ionatana o ana ‘au‘upega i le tama sa ‘iā te ia, ‘ua fai atu ‘iā te ia, “Alu ia, ‘inā avatu nei mea i le ‘a‘ai.”
41 ‘Ua alu le tama, ‘ona tula‘i lea o Tavita nai le itū i saute, ‘ua fa‘apa‘ū i le ‘ele‘ele, ‘ua ifo fa‘atolu, ‘ua feasogi fo‘i i lā‘ua, ma fētāgisi i lā‘ua, ‘ua o‘o ‘ina fa‘asili lo Tavita,
42 ‘Ona fai mai lea o Ionatana ‘iā Tavita, “Alu ia ma le manuia, auā ‘ua tautō i tā‘ua ma a‘u i le suafa o le ALI‘I, ‘ua fa‘apea, ‘‘Ia i ai le ALI‘I i le vā o a‘u ma oe, i le vā fo‘i o la‘u fānau ma lau fānau e fa‘avavau.’” ‘Ona tula‘i lea o ia ma alu ‘ese, ‘ae alu Ionatana i le ‘a‘ai.#