1 ‘Ua uma atu ana ‘upu ‘iā Saulo, ‘ona pi‘i mau lea o le loto o Ionatana i le loto o Tavita, ‘ua alofa Ionatana ‘iā te ia, pei ‘ona alofa o ia ‘iā te ia lava.
2 ‘Ua ‘ave e Saulo ‘iā te ia i lea aso, ‘ua ia lē mafai lava ‘ina ‘ia toe fo‘i i le ‘āiga o lona tamā.
3 ‘Ua osi e Ionatana le feagaiga ma Tavita, auā ‘ua alofa ‘iā te ia, pei ‘ona alofa ia ‘iā te ia lava.
4 ‘Ua tō ‘ese fo‘i Ionatana lona ‘ofu talaloa nai ‘iā te ia, ‘ua foa‘i atu ai ‘iā Tavita, ma lona ‘ofu tino, ‘atoa ma lana pelu, ma lana ‘aufana, ‘atoa ma lona fusi.
5 ‘Ua alu atu Tavita i mea uma na ‘auina ai o ia e Saulo, ‘ua fa‘autauta i lana amio; ‘ua tofia fo‘i o ia e Saulo e pule i ‘au; ‘ua fiafia ‘iā te ia le nu‘u uma, ‘atoa ma ‘au‘auna a Saulo.
6 ‘Ua ō mai i latou ‘ina ‘ua fo‘i mai Tavita nai le fasiga o le Filisitia, ‘ona ō atu ai lea o fafine mai ‘a‘ai uma o Isaraelu ‘ua pepese, ma sisiva, e fa‘afetaia‘i i le tupu o Saulo, ma topa, ma le ‘oli‘oli, ma ‘apa tagitagi.
7 ‘Ua lagi fetalia‘i fafine ‘iā latou siva, ‘ua fai ane,“‘Ua fasia e Saulo ana to‘aafe,a o Tavita ana sefulu o afe.”
8 ‘Ua ita tele ai Saulo, ‘ua leaga ‘iā te ia ia ‘upu; ‘ua fai ane, “‘Ua latou tu‘u atu ‘iā Tavita o sefulu o afe, a o a‘u ‘ua tu‘u mai ‘iā te a‘u na o afe; ‘ua toe lava ‘ona ‘ave ‘iā te ia o le mālō.”
9 Na āfua mai i lea lava aso ‘ona lamalama o Saulo ‘iā Tavita.
10 ‘Ua o‘o i le taeao, ‘ona osofia ai lea o Saulo e le agaga leaga mai le Atua, ‘ua perofeta ane ai o ia i lona fale; a o Tavita, na ta e ia i le kitara i lona lima, pei ‘ona fai i lea aso ma lea aso; sa i ai le tao i le lima o Saulo.
11 ‘Ua velo le tao e Saulo, ‘ua fai ane, “‘Ou te fasi ‘iā Tavita ‘ia tuilua ma le pā o le fale” a ‘ua ‘alo fa‘alua Tavita i ona luma.
12 ‘Ua mata‘u Saulo ‘iā Tavita, auā sa ‘iā te ia le ALI‘I, a ‘ua te‘a ma Saulo.
13 ‘Ona ‘auina atu ai lea o ia e Saulo ‘ia alu ‘ese ‘iā te ia, ma na tofia o ia e fai ma ali‘i o le to‘aafe; ‘ua alu atu o ia ma toe sau i luma o le nu‘u.
14 Sa fa‘autauta fo‘i Tavita i lana amio uma; sa ‘iā te ia fo‘i o le ALI‘I.
15 ‘Ua va‘ai Saulo ‘ua mafuli fa‘autauta o ia, ‘ona fefe ai lea o ia ‘iā te ia.
16 A ‘ua alolofa Isaraelu uma ‘atoa ma Iuta ‘iā Tavita, auā na alu atu o ia ma toe sau i o latou luma.
17 ‘Ua fai mai Saulo ‘iā Tavita, “Fa‘auta, o lo‘u afafine matua, o Merapa, ‘ou te avatu o ia ‘iā te oe e fai mau avā, tau lava ‘ina ‘ia e fitafita mo a‘u, e tau ai i tau‘a o le ALI‘I;” auā ‘ua fa‘apea Saulo, “‘Aua ne‘i o‘o lo‘u lima ‘iā te ia, a ‘ia o‘o i ai lima o Filisitia.”
18 ‘Ua fai atu Tavita ‘iā Saulo, “O ai ‘ea a‘u nei? o lea fo‘i lo‘u ola, ma le ‘āiga o lo‘u tamā i Isaraelu, ‘ina ‘ia ‘ou faiavā i le afafine o le tupu?”
19 ‘Ua o‘o i ona po a avane ai Merapa le afafine o Saulo ‘iā Tavita, a ‘ua avatu o ia ‘iā Atarielu le Meola e fai māna avā.
20 ‘Ua manamea Mekala le afafine o Saulo ‘iā Tavita; ‘ua ta‘u atu ai ‘iā Saulo, ‘ua tatau lava lea mea ‘iā te ia.
21 ‘Ua fai ane Saulo, “‘Ou te avatu o ia ‘iā te ia e fai ma mailei ‘iā te ia, ‘ia o‘o ai lima o Filisitia ‘iā te ia.” ‘Ua fai mai Saulo ‘iā Tavita, “O le tasi o i lā‘ua tā te ‘āiga ai i le asō.”
22 ‘Ua fai atu Saulo i ana ‘au‘auna, “Latou te tautala lemū atu ia Tavita, o lo‘o fa‘apea, ‘Fa‘auta, o lo‘o fiafia le tupu ‘iā te oe, ‘ua alolofa fo‘i ana ‘au‘auna uma ‘iā te oe; o lenei, ‘ia e faiavā i le afafine o le tupu.’”
23 ‘Ua tautala atu ‘au‘auna a Saulo i nei ‘upu i taliga o Tavita; ‘ona fai mai lea o Tavita, “O se mea fa‘atauva‘a ‘ea i lo ‘outou manatu ‘ona faiavā i le afafine o le tupu, o a‘u fo‘i o le tagata mativa ma le fa‘atauva‘a?”
24 ‘Ona ta‘u atu ai lea o ‘au‘auna a Saulo ‘iā te ia, ‘ua fa‘apea, “O ‘upu fa‘apenei ‘ua fai mai ai Tavita.”
25 ‘Ua fai mai Saulo, “‘Ia fa‘apea ‘ona ‘outou fai atu ‘iā Tavita, ‘E lē mana‘o le tupu i se fa‘atau, na o muāpa‘u o Filisitia e selau, ‘ina ‘ia taui atu i fili o le tupu;’” a o le manatu o Saulo ‘ia oti ai Tavita i lima o Filisitia.
26 ‘Ua ta‘u mai ana ‘au‘auna i nei ‘upu ‘iā Tavita; ‘ona tatau lava lea o le ‘upu ‘iā Tavita, ‘ia faiavā o ia i le afafine ole tupu. ‘Ua lē ‘atoa fo‘i ona aso;
27 ‘ona tula‘i lea o Tavita, ‘ua alu atu o ia ‘atoa ma ona tagata; ‘ua fasia tagata o Filisitia e lua selau, ‘ua ‘aumai e Tavita o latou muāpa‘u, ‘ua fa‘a‘atoa mai i le tupu ‘ina ‘ia faiavā o ia i le afafine o le tupu. ‘Ona ‘aumai lea e Saulo o lona afafine o Mekala ‘iā te ia e fai māna avā.
28 ‘Ua va‘ai Saulo, ma ‘ua iloa, ‘ua i ai le ALI‘I ‘iā Tavita; o Mekala fo‘i le afafine o Saulo ‘ua fiafia o ia ‘iā te ia.
29 ‘Ua atili ai ‘ona toe fefe o Saulo ‘iā Tavita; ‘ua fai Tavita ma fili o Saulo i aso uma.
30 Na ō atu ali‘i o Filisitia; o aso uma na ō atu ai i latou, ‘ua sili le fa‘autauta o Tavita i ‘au‘auna uma a Saulo. ‘Ua matuā vi‘ia lona igoa.#