1 ‘Ua fetalai mai le ALI‘I ‘iā Samuelu, “‘E te fa‘anoanoa ‘iā Saulo se‘ia afea? Auā o a‘u, ‘ua ‘ou lafoa‘i ‘iā te ia, ‘ina ‘ia lē fai ma tupu o Isaraelu; fa‘atumu ia lau fagu nifo i le suāu‘u, i le e alu, ‘ou te ‘auina atu oe ‘iā Iese le Peteleema. Auā ‘ua ‘ou iloa i ona atali‘i, le tasi ‘ou te faia ma tupu.”
2 ‘Ua fai atu Samuelu, “Pe fa‘apefea ‘ona ‘ou alu atu i ai; a fa‘alogo ai Saulo, ‘ona fasioti ai lea o ia ‘iā te a‘u?”‘Ua fetalai mai le ALI‘I, “‘Ia e avatu se tama‘i povi ma fai ane, ‘‘Ua ‘ou sau e fai le taulaga i le ALI‘I.’
3 ‘E te fai atu fo‘i ‘iā Iese e alu ane i le taulaga; a o a‘u, ‘ou te fa‘ailoa ‘iā te oe le mea ‘e te faia, ‘ona e fa‘au‘u lea i lē ‘ou te fai atu ai ‘iā te oe.”
4 ‘Ona faia lea e Samuelu le mea na fetalai mai ai le ALI‘I; ‘ua alu i Peteleema, ‘ona fefefe ai lea o toeaina o le ‘a‘ai i lona alu atu, ‘ua fai mai, “‘E te maliu mai ‘ea ma le filemū?”
5 ‘Ona tali atu ai lea o ia, “‘Ua ‘ou sau ma le filemū e fai ai taulaga i le ALI‘I; ‘inā fa‘apa‘ia ‘outou ‘iā te ‘outou ma ō mai ‘iā te a‘u e fai le taulaga.” ‘Ua ia fa‘apa‘ia ‘iā Iese ma ona atali‘i, ma fai atu ‘iā te i latou e ō mai i le taulaga.
6 ‘Ua ō mai i latou, ‘ona va‘ai lea o ia ‘iā Eliapo, ‘ua fai ane, “E moni lava, o lo‘o i luma o le ALI‘I lē a fa‘au‘uina e ia.”
7 A ‘ua fetalai mai le ALI‘I ‘iā Samuelu, “‘Aua ‘e te va‘ai i lona tino, po o le maualuga o lona tino, auā ‘ua ‘ou tete‘e ‘iā te ia; auā e lē va‘ai le ALI‘I, pei o le va‘ai a tagata, auā e va‘ai tagata i le tino, ‘ae va‘ai le ALI‘I i le loto.”
8 ‘Ona vala‘au lea o Iese ‘iā Apinatapa, ‘ia alu ane o ia i luma o Samuelu; a ‘ua fai atu o ia, “E le‘i filifilia fo‘i e le ALI‘I lenei tagata.”
9 ‘Ona fai atu lea o Iese ‘ia alu ane o Sama; ‘ua fai atu o ia, “E le‘i filifilia fo‘i e le ALI‘I lenei tagata.”
10 ‘Ua fai atu o Iese ‘ia ō ane ona atali‘i e to‘afitu i luma o Samuelu. ‘Ua fai atu fo‘i Samuelu ‘iā Iese, “E le‘i filifilia e le ALI‘I i latou nei.”
11 ‘Ona fai atu lea o Samuelu ‘iā Iese, “‘Ua ‘atoa mai ‘ea taulele‘a?”‘Ua fai mai o ia, “‘Ua toe lava o le ui‘i; fa‘auta fo‘i, o lo‘o leoleo ia i mamoe.”‘Ona fai atu lea o Samuelu ‘iā Iese, “‘Ia ‘a‘ami atu ‘iā te ia, auā tatou te lē vagavagai le la‘o‘ai se‘ia sau o ia ‘i‘inei.”
12 ‘Ua ia ‘a‘ami atu ‘iā te ia, ‘ona sau ai lea, o ia; o ia fo‘i ‘ua enaenamūmū lona lauulu, ‘ua manaia fo‘i ona mata, ma ‘ua ‘aulelei lava. ‘Ua fetalai mai le ALI‘I, “Tula‘i ia, ‘inā fa‘au‘u ‘iā te ia, auā o ia lava lenā.”
13 ‘Ona tago lea o Samuelu i le fagu nifo o suāu‘u, ‘ua fa‘au‘u a‘i ‘iā te ia i luma o ona uso; ‘ona osofia lea o Tavita e le Agaga o le ALI‘I, na āfua mai i lea lava aso. ‘Ona tula‘i lea o Samuelu, ‘ua alu i Rama.
14 ‘Ua te‘a le Agaga o le ALI‘I ‘iā Saulo, ‘ona osofia lea o ia e le agaga leaga mai le ALI‘I.
15 ‘Ua fai atu ‘au‘auna a Saulo ‘iā te ia, “Fa‘auta mai, ‘ua osofia oe e le agaga leaga mai le Atua;
16 ‘ia fetalai mai nei lo matou ali‘i i au ‘au‘auna i ou luma, matou te sā‘ilia se tagata ‘ua poto e ta i le kitara; i le a o‘o mai le agaga leaga mai le Atua ‘iā te oe, ‘ona ta ai lea e ia i lona lima, ‘e te lelei ai.”
17 ‘Ona fai mai lea o Saulo i ana ‘au‘auna, “Sā‘ili mai ia mo a‘u se tagata poto e ta i le kitara ma ‘outou ‘aumaia o ia ‘iā te a‘u.”
18 ‘Ona tali atu lea o le tasi o le ‘au taulele‘a, ‘ua fa‘apea atu, “Silasila mai ‘ea, ‘ua ‘ou iloa le atali‘i o Iese le Peteleema, ‘ua poto o ia e ta i le kitara; o le tagata malosi tele, ma le toa, ma le mau ‘upu, o le tagata ‘aulelei, o lo‘o ‘iā te ia fo‘i le ALI‘I.”
19 ‘Ona ‘auina atu lea e Saulo o le sāvali ‘iā Iese, ‘ua fai atu ai, “‘Ia e ‘auina mai ‘iā te a‘u lou atali‘i o Tavita, o lo‘o i ai i mamoe.”
20 ‘Ona ‘ave lea e Iese o le asini ma le avega o areto, ma le fagu pa‘u o uaina, ma le tama‘i ‘oti e tasi; ‘ua tu‘u atu ai i le lima o Tavita lona atali‘i na te ‘ave ‘iā Saulo.
21 ‘Ua o‘o atu Tavita ‘iā Saulo, ‘ua tu atu i ona luma; ‘ona alofa tele mai lea o ia ‘iā te ia; ‘ua fai fo‘i o ia ma ona soātau.
22 ‘Ua alu atu fo‘i le fe‘au a Saulo ‘iā Iese, ‘ua fa‘apea, “‘Ia tu Tavita i o‘u luma, auā ‘ou te alofa ‘iā te ia.”
23 A o‘o mai le agaga mai le Atua ‘iā Saulo ‘ona tago ai lea o Tavita i le kitara ‘ua ta i lona lima; ‘ona mapu ai lea o Saulo, ‘ua lelei ai o ia, ‘ua alu ‘ese ai le agaga leaga ‘iā te ia.#