1 ‘Ua alu atu Isaraelu e tau ma Filisitia; ‘ua latou tolauapi i Epenesa, a o Filisitia ‘ua tolauapi i latou i Afeka.
2 ‘Ua tofi le tau‘a e Filisitia, ‘ua fa‘asaga mai ‘iā Isaraelu; ‘ua tau solo le tau‘a, ‘ona fasia lea o Isaraelu e Filisitia; ‘ua latou fafasi ‘au o le tau‘a i le tafā, pe ‘atoa le fa o afe o tagata.
3 ‘Ua fo‘i atu le nu‘u i le togālauapi, ‘ona fai ane lea o toeaina o Isaraelu, “O le a le mea ‘ua fasia ai tatou e le ALI‘I i le asō i luma o Filisitia? ‘Inā tatou ‘aumai ia le ‘atola‘au o le feagaiga a le ALI‘I mai Sailo ‘iā te i latou, a o‘o mai ‘iā te i tatou, ‘ona fa‘aolaina ai lea o i tatou a‘i lima o le itūtau‘a.”
4 ‘Ua alu le fe‘au a le nu‘u i Sailo e ‘aumai ai le ‘atola‘au o le feagaiga a le ALI‘I o ‘au o lo‘o afio i le vā o kerupi. Sa i ai fo‘i ma le ‘atola‘au o le feagaiga a le Atua o atali‘i e to‘alua o Eli, o Hofeni ma, Fineaso.
5 ‘Ua o‘o atu le ‘atola‘au o le feagaiga a le ALI‘I i le togālauapi, ‘ona ‘alalaga ai lea o Isaraelu uma ma le ‘alaga tele, ‘ua u ai le ‘ele‘ele.
6 ‘Ua lagona e Filisitia le ta‘alili o le ‘alaga, ‘ona fai ane lea, “Se a lenā ‘alaga tele ‘ua ta‘alili mai i le togālauapi a Eperu?” ‘Ona latou iloa lea o le ‘atola‘au a le ALI‘I ‘ua ‘aumai i le togālauapi.
7 ‘Ua fefefe fo‘i Filisitia, auā ‘ua fa‘apea i latou, “‘Ua o‘o ane le Atua i le togālauapi;” ‘ua latou fai ane fo‘i, “O i talofa ‘iā te i tatou, auā e le‘i fa‘apea anamua.
8 O i talofa ‘iā te i tatou, o ai sē lavea‘i ‘iā te i tatou a‘i lima o ia atua mamana? O atua ia na latou fasia Aikupito i fasiga uma i le vao.
9 Filisitia e, ‘inā fa‘amalolosi ia, ‘ia ‘outou fa‘atamatane, ne‘i fai i tatou ma pologa ‘iā Eperu, fa‘apei ‘ona fai i latou ma pologa ‘iā te ‘outou; ‘ia ‘outou fa‘atamatane, ma ‘ia ‘outou tau ma i latou.”
10 ‘Ua tau Filisitia ma i latou; ‘ua fasia Isaraelu, ‘ua ta‘itasi ma sola i lona fale ‘ie, sa tele lava le fasi; o Isaraelu na fasia e tolugafulu o afe o i latou o ‘au e sāvavali.
11 ‘Ua ‘avea fo‘i le ‘atola‘au le Atua; e atali‘i e to‘alua o Eli Hofeni ma Fineaso, ‘ua oti i lā‘ua.
12 ‘Ua momo‘e mai le tagata Peniamina nai le tau‘a, ‘ua o‘o i Sailo i lea lava aso; ‘ua saeia ona ‘ofu ma le ‘ele‘ele ‘ua i luga o lona ulu.
13 ‘Ua alu ane ia, fa‘auta fo‘i, ‘ua ti‘eti‘e Eli i le nofoa i le itū ala, o lo‘o fa‘atalitali ai, auā ‘ua gatete lona loto i le ‘atola‘au a le Atua; ‘ua sau le tagata, ‘ua ta‘u mai i le nu‘u, ‘ona ‘alalaga ai lea o le nu‘u uma.
14 ‘Ua fa‘alogo Eli i le leo o le ‘alaga, ‘ona fai ane lea o ia, “O le a lenā ta‘alili?” ‘Ona fa‘ata‘alise lea le tagata, ‘ua sau ma fa‘ailoa mai ai ‘iā Eli.
15 A o Eli ‘ua ivagafulu ma le valu ona tausaga, ‘ua tōmātūina ona mata, ‘ua lē mava‘ai.
16 ‘Ua fai mai le tagata ‘iā Eli, “O a‘u nei na ‘ou sau mai le tau‘a; na ‘ou sola mai le tau‘a i le aso nei.”‘Ua fai atu o ia, “Sole se a ‘ea lau tala?”
17 ‘Ua tali mai lē na ‘aumai le tala, ‘ua fa‘apea mai, “‘Ua sōsōla Isaraelu i luma o Filisitia, ma ‘ua tele le fasi o le nu‘u; ‘ua maliliu fo‘i ou atali‘i e to‘alua, o Hofeni ma Fineaso; ‘ua ‘avea fo‘i le ‘atola‘au a le Atua.”
18 ‘Ua o‘o ‘ina ta‘ua mai e ia o le ‘atola‘au a le Atua, ‘ona pa‘ū ai lea o ia i tua nai luga o le nofoa i tafatafa o le faitoto‘a, ‘ua gau lona ua, ‘ua oti ai, auā o le toeaina, ‘ua mamafa fo‘i ia. Na ia fa‘amasino ‘iā Isaraelu i tausaga e fagafulu.
19 O le avā a lona atali‘i o Fineaso, ‘ua latalata ‘ona fānau; ‘ua fa‘alogo o ia i le tala, ‘ua ‘avea le ‘atola‘au a le Atua, ‘ua oti fo‘i le tamā o lana tane ‘atoa ma lana tane, ‘ona to‘otuli ai lea o ia ‘ua fānau, auā ‘ua fa‘afuase‘i ‘ona fa‘atigā o ia.
20 ‘Ua o‘o ‘ina a oti o ia, ‘ua fai mai fafine ē na tutū ai ‘iā te ia, “‘Aua le fefe, ‘ua e fānau mai sau tama tane;” a ‘ua lē tali atu o ia, ‘ua lē tu‘u i ai fo‘i i lona loto.
21 ‘Ua ia fa‘aigoa i le tama, o Ikapoti, o lo‘o fa‘apea ‘ia, “‘Ua ‘avea le mamalu nai ‘iā Isaraelu;” ‘ina ‘ua ‘avea le ‘atola‘au a le Atua, ‘ona o le tamā fo‘i o lana tane, ‘atoa ma lana tane.
22 ‘Ua fai ane o ia, “‘Ua ‘avea le mamalu nai ‘iā Isaraelu, auā ‘ua ‘avea le ‘atola‘au a le Atua.”