1 ‘Ua ō mai tagata Kiriata-iarima, ‘ua latou ‘ava‘e le ‘atola‘au a le ALI‘I, ma ‘ua avatu ai i le fale o i Apinatapa i le mauga; ‘ua latou fa‘apa‘iaina Eleasaro lona atali‘i e leoleo i le ‘atola‘au a le ALI‘I.
2 O aso sa tu‘u ai le ‘atola‘au i Kiriata-iarima ‘ua tele aso, ‘ua lua sefulu o tausaga; ‘ua fa‘anoanoa fo‘i le ‘āiga uma o Isaraelu i le ALI‘I.
3 ‘Ua fai atu Samuelu i le ‘āiga uma o Isaraelu, ‘ua fa‘apea atu, “‘Āfai tou te fo‘i atu i le ALI‘I ma o ‘outou loto ‘atoa, ‘inā tu‘u ‘ese ia o atua ‘ese ‘iā te ‘outou ‘atoa ma Asaira, ma sauniuni atu o ‘outou loto i le ALI‘I, na o ia tou te ‘au‘auna i ai; ‘ona lavea‘i lea o ia ‘iā te ‘outou a‘i lima o Filisitia.”
4 ‘Ona tu‘u ‘ese ai lea e le fānauga a Isaraelu o Paala ma Asaira, ‘ua na o le ALI‘I ‘ua latou ‘au‘auna i ai.
5 ‘Ua fai atu fo‘i Samuelu, “‘Ia fa‘apotopoto mai Isaraelu uma i Mesepa, ‘ou te fautua i le ALI‘I mo ‘outou.”
6 ‘Ona latou fa‘apotopoto atu ai lea i Mesepa; ‘ua latou utu vai, ma sasa‘a ai i luma o le ALI‘I, ma ‘ua latou anapogi i lea aso, ‘ona latou fai ane ai lea, “‘Ua matou agasala i le ALI‘I.” ‘Ua fa‘amasino Samuelu i le fānauga a Isaraelu i Mesepa.
7 ‘Ua fa‘alogo Filisitia, ‘ua fa‘apotopoto le fānauga a Isaraelu i Mesepa, ‘ona ō a‘e lea o ali‘i o Filisitia e tau ma Isaraelu; ‘ua fa‘alogo ai le fānauga a Isaraelu, ‘ona latou matata‘u ai lea ‘iā Filisitia.
8 ‘Ua fai mai le fānauga a Isaraelu ‘iā Samuelu, “‘Aua le mapu i le vala‘au atu i le ALI‘I lo tatou Atua mo i matou, ‘ia na fa‘aola mai ‘iā te i matou a‘i lima o Filisitia.”
9 ‘Ua avatu e Samuelu se tama‘i mamoe, ‘ua na fai a‘i le taulaga mū ‘atoa i le ALI‘I; ‘ua vala‘au fo‘i Samuelu i le ALI‘I mo Isaraelu, ‘ona fa‘afofoga mai lea o le ALI‘I ‘iā te ia.
10 O lo‘o fai e Samuelu le taulaga mū, a ‘ua fa‘alatalata mai Filisitia e tau ma Isaraelu; ‘ona fa‘apā mai lea e le ALI‘I le faititili ma le ta‘alili tele i lea aso i luga o Filisitia, ‘ua ia fa‘ata‘ape‘apeina i latou, ‘ua fasia fo‘i i latou, i luma o Isaraelu.
11 ‘Ua ō atu tagata o Isaraelu nai Mesepa, ‘ua tuliloa ‘iā Filisitia ma fasi ‘iā te i latou, ‘ua o‘o i lalo ifo o Peteka.
12 ‘Ona ‘ave lea e Samuelu le tasi ma‘a, ‘ua na tu‘u ai i le vā o Mesepa ma Sena, ‘ua ia fa‘aigoa ai o Epenesa, ‘ua fa‘apea ane ia, “‘Ua fesoasoani mai le ALI‘I ‘iā i tatou,” ‘ua o‘o mai i le aso nei.
13 ‘Ona to‘ilalo lea o Filisitia, e le‘i toe ō a‘e i le lau‘ele‘ele o Isaraelu; sa i luga o Filisitia le ‘a‘ao o le ALI‘I i aso uma o Samuelu.
14 ‘Ua toe tu‘u mai ‘iā Isaraelu ‘a‘ai na faoa e Filisitia sa ‘iā Isaraelu, e pau mai Ekerona, e pau mai i Kata; a o latou lau‘ele‘ele ‘ua faoa ia e Isaraelu a‘i lima o Filisitia. Sa nofo lelei Isaraelu ma sa Amorī.
15 ‘Ua fa‘amasino Samuelu ‘iā Isaraelu i aso uma na ola ai o ia.
16 ‘Ua alu atu o ia i lea tausaga ma lea tausaga, ‘ua fa‘ata‘amilo i Peteli, ma Kilikala, ma Mesepa; ‘ua ia fa‘amasino ‘iā Isaraelu i ia nu‘u uma.
17 ‘Ona fo‘i ai lea o ia i Rama, auā sa i ai lona fale; ‘ua fa‘amasino ai fo‘i ‘iā Isaraelu i lea mea ma ‘ua fai ai se fatafaitaulaga i le ALI‘I.#