1 ‘Ua alu a‘e Naasa le sa Amonī, ‘ua tolauapi i Iapese-Kiliata. ‘Ona fai mai lea o tagata uma o Iapese ‘iā Naasa, “‘Inā fai ia sa tatou mavaega, ‘ona matou ‘au‘auna lea ‘iā te oe.”
2 ‘Ua fai atu Naasa le sa Amonī ‘iā te i latou, “O le mea lenei e fai ai sa tatou mavaega; ‘ou te sali i o ‘outou mata taumatau uma, ‘ou te fa‘alumaina ai Isaraelu uma.”
3 ‘Ona fai mai lea o toeaina o Iapese ‘iā te ia. “Tu‘u mai ia ‘iā te i matou ni aso se fitu, se‘i matou tu‘u atu ni sāvali i nu‘u uma o Isaraelu; ‘āfai e leai sē fa‘aola mai ‘iā te i matou, ‘ona matou ō atu ai lea ‘iā te oe.”
4 ‘Ua o‘o atu le sāvali i Kipea le ‘a‘ai o Saulo, ‘ua ta‘u atu nei ‘upu i le nu‘u, ‘ona fētāgisi ai lea o le nu‘u uma, ‘ua leo tetele.
5 Fa‘auta fo‘i, ‘ua sau Saulo nai le vao, o lo‘o mulimuli ia i povi; ‘ua fai ane Saulo, “Se a le mea ‘ua o‘o i le nu‘u ‘ua latou fētāgisi ai?” ‘Ona tala mai lea ‘iā te ia o le tala a tagata Iapese.
6 ‘Ona osofia lea o Saulo e le Agaga o le Atua, ‘ina ‘ua fa‘alogo o ia i lenei tala; ‘ona tupu tele ai lea o lona ita.