1 O fua fa‘atautau faimamago e ‘inosia ia e le ALI‘I;a o le ma‘a e fua a‘i e ‘ato‘atoa, o lona lea fiafia.
2 A sau le fa‘amaualuga, ‘ona sau ai lea o le mā;a o i ai le poto i ē fa‘amaulalo.
3 O le amio sa‘o a ē ‘ua amiotonu e ta‘ita‘iina ai i latou;a o le fa‘api‘opi‘o o ē amioletonu e fano ai i latou.
4 E lē aogā le ‘oloa i le aso o le to‘asā;a o le amiotonu, e lavea‘i lea nai le oti.
5 O le amiotonu a lē ‘ua sa‘o e fa‘alauleleiina ai lona ala;a o lana amio leaga, e pa‘ū ai lē ‘ua amio leaga.
6 O le amiotonu a ē amio sa‘o e lavea‘iina ai i latou;a o ē fa‘api‘opi‘o, e maua i latou ‘iā latou amio pa‘a‘ā.
7 A oti le tagata amio leaga, ‘ua fano lona fa‘atuatuaga;e fano fo‘i le fa‘amoemoe o le tagata amioletonu.
8 E lavea‘iina lē amiotonu a‘i le puapuagā;‘ae sau lē amio leaga e sui a‘i o ia.
9 O le gutu o lē fa‘alēmata‘u e fano ai lē la te tuā‘oi;a o lē poto e lavea‘iina a‘i ē amiotonu.
10 ‘Ua ‘oli‘oli le ‘a‘ai pe a manuia ē amiotonu;e ofo fiafia fo‘i pe a fano ē amio leaga.
11 O le fa‘amanuia o ē amio sa‘o e fa‘amamaluina ai le ‘a‘ai;a o gutu o ē amio leaga, e lepetia ai.
12 O lē ‘ua leai sona mafaufau na te ‘ino‘ino i lē la te tuā‘oi;a ‘ua fa‘alologo le tagata mafaufau.
13 O lē fealua‘i ma fe‘ave‘avea‘i, na te fa‘aali ‘upu fa‘alilo;a o lē ‘ua loto fa‘amaoni na te tanutanuma‘i le ‘upu.
14 A leai sē pule, ‘ua malaia le nu‘u;a o le to‘atele o faipule, e saogalemū ai.
15 E matuā tigāina lē ‘ua fai ma moni o le tagata ‘ese;a o lē ‘ua ‘ino‘ino i ē fetāgofi i lima mo isi, e filemū lava o ia.
16 E maua le mamalu e le fafine matagofie;a o tane malolosi e maua le ‘oloa.
17 O le tagata alofa ‘ua agalelei o ia ‘iā te ia lava;a o lē ‘ua sauā, na te fa‘atigāina lona lava tino.
18 O lē amio leaga ‘ua fai e ia le galuega pepelo;a o lē totō le amiotonu e ‘iā te ia le taui fa‘amaoni.
19 E pei ‘ona i‘u o le amiotonu i le ola,e fa‘apea fo‘i lē ‘ua tausisi i le leaga, e i‘u lea i lona lava oti.
20 ‘Ua ‘inosia e le ALI‘I ē ‘ua fa‘api‘opi‘o o latou loto;a o ē ‘ua sa‘o a latou amio, e fiafia i ai o ia.
21 E tago lea lima i lea lima, e lē fa‘asaoina lē ‘ua amio leaga;a o le fānau a ē amiotonu, e sao i latou.
22 O le mama auro i le isu o le pua‘a,o le fafine lālelei lea ‘ua te‘a ma le mafaufau.
23 O lē mana‘o o ē amiotonu, ‘ua na ‘ona lelei lea;a o le fa‘atuatuaga o ē amio leaga, e i‘u lea i le to‘asā.
24 O i ai lē na te fa‘asalalauina ana mea,‘ae atili ai ‘ona mau mea; o i ai fo‘i lē ‘ua tāofi ana mea,e sili i le mea ‘ua tatau ai, ‘ae mativa ai o ia.
25 E fa‘atamao‘āigaina le tagata matamau;o ia fo‘i lē fa‘asūsū i nisi, e fa‘asūsūina lava o ia.
26 O lē na te tāofia saito, e fetu‘uina o ia e le nu‘u;‘ae i ai le fa‘amanuia i luga o le ulu o lē na te fa‘atauina mai ai.
27 O lē na te sā‘ili‘ili i le lelei, na te sā‘ilia le alofa;a o lē na te sā‘ilia le leaga, e o‘o lava lea ‘iā te ia.
28 O lē na te fa‘atuatua i lona ‘oloa, e pa‘ū lava o ia;a o ē amiotonu, e tupu matagofie i latou, pei o lau la‘au.
29 O lē na te fa‘atigāina lona ‘āiga, e fai mōna tofi le matagi,e ‘au‘auna fo‘i le vale i lē ‘ua poto lona loto.
30 O le fua o le amiotonu, o le la‘au o le ola lea;ma lē na te maua agaga, e poto ia.
31 Fa‘auta, e tauia le amiotonu i le lalolagi;e sili fo‘i ‘ona tauia o lē amio leaga ma lē agasala?#