1 Lo‘u atali‘i e,‘ia e fa‘alogo mai i lo‘u poto;‘ia ua‘i mai ou taliga i lo‘u fa‘autauta.
2 ‘Ina ‘ia e tausiusi i le mafaufau;ma ‘ia leoleoina le poto i ou laugutu.
3 Auā e fa‘asisina ifo meli a‘i laugutu o le fafine ‘ese;o lona gutu fo‘i e sili ‘ona molemole i le suāu‘u;
4 ‘ae mulimuli ane ‘ua ‘o‘ona ia, e pei o le laena;e ma‘ama‘ai o ia, e pei o le pelu ‘ua fa‘atau ma‘ai ona itū.
5 E ō ifo ona vae i le oti; e taunu‘u atu ona la‘asaga i seoli.
6 ‘Ina ne‘i e mafaufau i le ala o le ola,o lea ‘ua fesēa‘i ai ona ala; ‘e te lē mafai ‘ona e iloa.
7 O lenei, le fānau e,‘ia ‘outou, fa‘alogo mai ‘iā te a‘u;‘aua fo‘i ne‘i ‘alo ‘ese ‘outou i ‘upu a lo‘u gutu.
8 ‘Ia taumamao lou ala ‘iā te ia;‘aua fo‘i ‘e te fa‘alatalata i le faitoto‘a o lona fale;
9 ‘ina ne‘i e avatu matagofie i nisi ma ou tausaga i lē ‘ua sauā;
10 ‘ina ne‘i malilie tagata ‘ese i au ‘oloa;ne‘i i ai fo‘i mea na e tigā ai i le fale o le tagata ‘ese;
11 ‘ona e ōi ai lea i ona po amulī, pe a fa‘aumatia lou tino uma,
12 ma e fa‘apea ane,“Sa tele na‘uā lo‘u ‘ino‘ino ‘ina a‘oa‘oina ma ‘ua tete‘e atu e lo‘u loto le a‘oa‘iga;
13 na ‘ou lē fa‘alogo fo‘i i ‘upu a ē na a‘oa‘o mai ‘iā te a‘u;ma ‘ua lē ua‘i atu o‘u taliga i o‘u a‘oa‘o.
14 Toetoe lava, ‘ua ‘atoa mea leaga ‘ua ‘ou i ai,o i luma lava o le fa‘apotopotoga ma le saofa‘iga.”
15 ‘Ia e inu vai ai lou lava vailepa ma vai e tafe mai ai lou lava vai‘eli.
16 ‘Ia fa‘asalalau solo ou vaipuna ma ou vaitafe i malae;
17 ‘ia fai mo oe ia vai, na o oe lava;‘ae ‘aua le fa‘atasi ma oe tagata ‘ese.
18 ‘Ia manuia lou vaipuna ma ‘ia e fiafia i lau avā na fai a o e taule‘ale‘a.
19 ‘Ia pei o le ‘aila pele o ia ma le ‘oti o le vao e matagofie;‘ia malie oe i ona susu i aso uma; ‘aua le aunoa ‘ona e matuā fiafia i lou alofa ‘iā te ia.
20 Lo‘u atali‘i e,pe se a fo‘i le mea ‘e te fiafia ai i le fafine ‘ese;ma e fusi le fatafata o le fafine ‘ese?
21 Auā o lo‘o i luma o fofoga o le ALI‘I o ala o le tagata;na te fuatia fo‘i ona ala uma.
22 O ana amio leaga e maua ai lava lē ‘ua agasala;o maea o ana agasala e tāofia ai o ia.
23 E oti lava o ia, a o le‘i a‘oa‘oina;o le tele o lona valea e sesē ai o ia.#