1 Lo‘u atali‘i e,‘āfai ‘ua fai oe ma moni o lau uō;‘āfai ‘ua fetāgofi i lima mo le tagata ‘ese,
2 ‘ua maileia oe i ‘upu a lou gutu;‘ua maua oe i ‘upu a lou gutu.
3 O lenei, lo‘u atali‘i e, ‘ia e faia le mea nei,‘ina ‘ia lavea‘iina oe, pe a o‘o mai le pule a lau uō ‘iā te oe;alu ia, ‘inā ifo, ma e alu fa‘avave atu i lau uō;
4 ‘aua ne‘i moe ou mata, pe tulemoe ou laumata;
5 ‘ia e lavea‘iina oe e oe, pei o le sevi a‘i le lima;e pei o le manu fo‘i a‘i le lima o le fai manu.
6 Le paiē e,‘inā e alu i le loi, ‘ia va‘ava‘ai i lana amio, ‘ina ‘ia poto ai oe;
7 e leai sona ta‘ita‘i, po o se leoleo, po o sē pule,
8 ‘ae saunia e ia ana mea e ‘ai i le tausaga vevela,ma fa‘aputuina ana mea e ‘ai i ona po e selesele ai saito.
9 Le paiē e,‘e te ta‘oto se‘ia afea? Se‘i e tula‘i afea ai lou moe?
10 Se‘i toe itiiti sina moe, toe itiiti se matamoe,toe itiiti se pi‘ilima e ta‘oto ai,
11 ‘ae o‘o mai lou mativa e pei o le malaga;ma lou lē tagolima pei o le tagata ‘ua sauni lana ‘au‘upega.
12 O le tagata ulavale, o le tagata agasala,o lo‘o savali ia ma le gutu fa‘api‘opi‘o;
13 e genogeno ona mata; e tautalatala ona vae;e fa‘asino i ona tamatama‘i lima.
14 ‘Ua i lona loto le fa‘api‘opi‘o;na te fai togafiti leaga i aso uma; na te fa‘atupuina māseiga;
15 o le mea lea e fa‘afuase‘i ai ‘ona o‘o mai o lona malaia;e fa‘afuase‘i ‘ona nutimomoia o ia, ‘ae leai se fofō.
16 O mea nei e ono ‘ua ‘inosia e le ALI‘I;o lona fitu fo‘i ‘ua matuā ‘inosia lava e ia;
17 o mata fa‘asiasia, o le laulaufaiva pepelo ma lima e sasa‘a le toto o lē ‘ua lē sala,
18 o le loto e mānatunatu i togafiti leaga,o vae e tele vavave ‘ona taufetuli i le leaga,
19 o le molimau pepelo, na te tautala i mea pepelo;ma lē na te fa‘atupu māseiga i uso.
20 Lo‘u atali‘i e,‘ia e tausi i poloa‘iga a lou tamā;‘aua fo‘i ‘e te tu‘ulafoa‘iina le ‘upu e a‘oa‘o atu a lou tinā;
21 ‘ia fusi ai e lē aunoa i lou loto; ‘ia asoa ai i lou ua.
22 A e savali, e ta‘ita‘iina ai oe;a moe, e leoleoina ai oe; a e ala, e tautala ai ma oe.
23 Auā o le poloa‘iga o le sulu lea;ma le ‘upu e a‘oa‘o atu, o le malamalama lea;o a‘oa‘iga fo‘i e a‘oa‘oina ai,o le ala o le ola lea,
24 ‘ina ‘ia leoleo ‘iā te oe a‘i le fafine amio leaga,a‘i le laulaufaiva molemole o le fafine ‘ese.
25 ‘Aua ne‘i naunau lou loto i lona lālelei;‘aua ne‘i maua oe i ona laumata.
26 Auā e i‘u ‘ina toe na o si fasi areto ‘ona o le fafine talitane;o le avā fo‘i a le tasi tagata na te taumailei le ola aogā.
27 E ‘ave ‘ea e se tasi le afi i lona fatafata,‘ae lē mū ai ona ‘ofu?
28 ‘Āfai e savali se tagata i luga o malala ola, e lē mū ai ‘ea ona vae?
29 E fa‘apea fo‘i lē ‘ua alu atu i le avā a lē la te tuā‘oi;ai se tago ‘iā te ia, e lē fa‘asaoina o ia.
30 E lē ‘inosia le gaoi pe a gaoi o ia e tali a‘i lona manava, ‘ina ‘ua fia ‘ai;
31 ‘ae a maua o ia, ‘ona taui atu lea e ia e ta‘ifitu;na te avatu a‘i ‘oloa uma o i lona fale.
32 O lē mulilua i le fafine ‘ua leai sona mafaufau;o lē na te faia lea mea, na te fa‘aumatia e ia lona lava ola;
33 na te maua le fasiga ma le fa‘amāina;o lona luma fo‘i e le sōloi‘esea lea.
34 Auā o le fuā o le ita tele lea o le tagata;na te lē fa‘asaoina fo‘i o ia i le aso e taui ai ma sui.
35 Na te lē talia se togiola lava; na te lē mafaia fo‘i,e ui lava ‘ina ‘ua e fa‘atele ni mea e avatu ai.