1 ‘Ia sili le mana‘o ‘ina ‘ia ta‘uleleia i le mana‘o i le ‘oloa e tele;ma le agalelei, ‘ia sili le mana‘o i lea i le ario ma le auro.
2 O le mau‘oa ma le mativa la te fetaia‘i;na faia i lā‘ua uma e le ALI‘I.
3 O lē ‘ua fa‘autauta, na te iloa atu le leaga, ma lafi ai;a o ē ‘ua faigofie, e ō atu pea i latou, ‘ona fa‘asalaina ai lea.
4 O le taui o le fa‘amaulalo ma le mata‘u i le ALI‘I,o le ‘oloa lea ma le vi‘iga ma le ola.
5 O mea matuitui ma mailei, o lo‘o i ai ia i le ala o lē fa‘api‘opi‘o;o lē tausi o ia ‘iā te ia, e fa‘amamao o ia i ia mea.
6 A‘oa‘o ia i le tama e tusa ma lona ala;a o‘o ‘ina toeaina lava o ia, e le te‘a ‘ese ai.
7 E pule le mau‘oa i ē matitiva;e ‘au‘auna fo‘i lē nō mea i lē ‘ua ‘aumai ai ana mea.
8 O lē ‘ua lūlū le amio leaga, e selesele mai ai e ia le mala;e fa‘aumatia fo‘i le to‘oto‘o o lona ita.
9 O lē ‘ua mataalofa e fa‘amanuiaina o ia;auā e foa‘i atu e ia ana mea e ‘ai i lē ‘ua mativa.
10 Tuli ia le fa‘atauemu, ‘ona mavae atu ai lea o le finauga;e tu‘ua fo‘i le misa ma le fa‘amāina.
11 O lē ‘ua mana‘o i le loto mamā, e matagofie ona laugutu;e fai o ia ma uō a le tupu.
12 O fofoga o le ALI‘I e leoleoina ai ē ‘ua popoto;‘ae fa‘ai‘uvaleina e ia ‘upu a ē amioletonu.
13 ‘Ua fai ane le paiē, “O lo‘o i fafō le leona; e fasiotia ai a‘u i malae.”
14 O le gutu o le fafine ‘ese, o le lua maulalō lea;o lē ‘ua matuā itagia e le ALI‘I e pa‘ū o ia i ai.
15 ‘Ua fusifusia le valea i le loto o le tama;‘ae fa‘ate‘a‘eseina ai ‘iā te ia i le sasa e a‘oa‘i a‘i.
16 O lē ‘ua fa‘asauā i le tagata mativa ‘ina ‘ia fa‘atele ai ana ‘oloa,ma lē ‘ua foa‘i atu i le mau‘oa, e i‘u ai lava i le mativa.
17 Ua‘i mai ia ou taliga, ma e fa‘alogo mai i ‘upu a ē popoto; ma ‘ia e matuā mafaufau i lo‘u poto.
18 Auā e matagofie pe ‘āfai ‘e te tausia ai i lou loto; e fa‘atatauina fa‘atasi i ou laugutu.
19 ‘Ua ‘ou a‘oa‘o ‘iā te oe, o oe lava, i le aso nei, ‘ina ‘ia fai le ALI‘I mou fa‘atuatuaga.
20 ‘Ua ‘ou le tusi atu ‘ea ‘iā te oe o mea sili i fa‘atonuga ma le poto;
21 ‘ina ‘ia ‘ou fa‘ailoa ‘iā te oe le fa‘amaoni o ‘upu moni; ‘ina ‘ia e tali atu ai ‘upu moni i ē ‘a‘au mai ai nisi ‘iā te oe?
22 ‘Aua ‘e te faoa mea a le tagata mativa, ‘ina ‘ua mativa o ia; ‘aua fo‘i ‘e te fa‘asauā i le faitoto‘a o lē ‘ua tigā.
23 Auā o le ALI‘I, o ia na te faia la latou finauga; na te fasiotia fo‘i i latou o ē fa‘asauā ‘iā i latou.
24 ‘Aua ne‘i fefa‘auōa‘i ma le tagata itagofie; ‘aua fo‘i lua te ō ma le tagata lotoa;
25 ‘ina ne‘i e fa‘aa‘oa‘o i ona ala; ‘ona maua ai lea o lou agaga i le mailei.
26 ‘Aua ne‘i fai oe ma so latou o ē fetāgofi i lima; pe fai oe ma moni i mea ‘ua ‘aitalafu ai.
27 ‘Āfai ‘ua leai sau mea e taui a‘i, se a le mea na te ‘ave ‘ese ai lou moega o e ta‘oto ai?
28 ‘Aua ne‘i si‘i le tuā‘oi mai le vavau, na faia e ou mātua.
29 ‘Ua e iloa le tagata ‘ua fa‘ata‘alise i ana galuega? E tu o ia i luma o tupu, ‘ae lē tu i luma o tagatanu‘u.