1 ‘Āfai lua te nonofo ma se ali‘i e taumafa se ‘ava, se‘ia e matuā mafaufau i mea ‘ua i ou luma;
2 ma e tu‘u atu se polo i lou ua, pe ‘āfai ‘e te se tagata ‘ai tele;
3 ‘aua ‘e te naunau i ana mea suamalie; auā o mea e ‘ai pepelo lava ia.
4 ‘Aua ‘e te galue fa‘apuapuagā ia mau ‘oloa ai; tu‘u ia o lou lava tāofi.
5 ‘E te tulimata‘i atu ‘ea i le mea ‘ua leai? Auā e faia lava e ia ona ‘apa‘au; e pei o le aeto ‘ona lele atu o ia i le lagi.
6 ‘Aua ‘e te ‘ai i le mea e ai a le mataoge; ‘aua fo‘i ‘e te naunau i ana mea suamalie.
7 Auā e pei ‘ona manatu o ia i lona loto, ‘ua fa‘apea lava o ia; e fai mai o ia ‘iā te oe, “‘Ai ia ma inu;” ‘ae lē ‘iā te oe lona loto.
8 ‘E te toe pua‘i mai le fāsi i mea ‘ua uma ‘ona ‘ai, ma e fa‘amaumau au ‘upu mālie.
9 ‘Aua ‘e te tautala atu i taliga o le vale; auā e ‘ino‘ino o ia i le poto o au ‘upu.
10 ‘Aua ne‘i si‘i le tuā‘oi o le vavau; ‘aua fo‘i ne‘i e uia fanua o ē mātuaoti.
11 Auā e malosi lava lo latou Fa‘aola; o ia lava na te faia la latou finauga ma oe.
12 Ua‘i mai lou loto i mea e a‘oa‘oina, ma ou taliga i ‘upu e poto ai.
13 ‘Aua ne‘i tāofia le a‘oa‘iga i le tama; auā ‘āfai ‘e te sasa ‘iā te ia i se la‘au, e lē oti o ia;
14 ‘e te sasa ‘iā te ia i se la‘au, ‘ona e lavea‘iina lea o lona agaga a‘i seoli.
15 Lo‘u atali‘i e, ‘āfai e poto lou loto, ‘ona fiafia ai lea o lo‘u nei lava loto;
16 e ‘oli‘oli fo‘i lo‘u manatu, pe a tautala ou laugutu i mea ‘ua tonu.
17 ‘Aua le losilosi lou loto i ē agasala; a ‘ia e mata‘u i le ALI‘I i le aso ‘atoa;
18 auā ‘āfai o i ai le i‘uga, ‘ona lē i‘uvale lea o lou fa‘amoemoe.
19 ‘Ia e fa‘alogo mai, lo‘u atali‘i e, ma ‘ia e poto; ma e ta‘ita‘i tonu lou loto i le ala.
20 ‘Aua ne‘i fai oe ma so latou o ē inu tele i uaina; ma ē ‘ua ‘a‘ai tetele i manu
21 auā o lē inu tele ma ‘ai tele e fa‘amativaina o ia; ma lē fia moe pea e ‘ofu o ia i ‘ofu māsaesae.
22 ‘Ia e fa‘alogo i lou tamā, o lē na fānaua oe; ‘aua fo‘i ‘e te ‘ino‘ino i lou tinā pe a lo‘omatua o ia.
23 ‘Ia e fa‘atau mai le mea moni, ‘aua lava le fa‘atau atu; ‘atoa fo‘i ma le poto, ma le a‘oa‘oina ma le atamai.
24 E matuā ‘oli‘oli lava le tamā o lē ‘ua amiotonu; o lē na fānaua le atali‘i poto e fiafia o ia ‘iā te ia.
25 E fiafia lou tamā ma lou tinā; e ‘oli‘oli lava lē na fānau mai oe.
26 Lo‘u atali‘i e, ‘aumai ia lou loto ‘iā te a‘u; ma ‘ia fiafia ou mata i o‘u ala.
27 Auā o le fafine talitane, o le lua maulalō lea; o le fafine ‘ese, o le vai‘eli pū itiiti lea;
28 o ia fo‘i na te saunia mailei, e tusa ma lē ‘ua fao mea, na te fa‘ato‘ateleina fo‘i tagata amioletonu.
29 O ai ‘ea ‘ua auē? O ai ‘ea ‘ua fa‘anoanoa? O ai ‘ea ‘ua atuatuvale? O ai ‘ea ‘ua lavea ‘ae leai se mafua‘aga? O ai ‘ea ‘ua fulafula ona mata?
30 O ē ‘ua fa‘atuai i le uaina; o ē ō atu e sā‘ili i le uaina filogia.
31 ‘Aua ‘e te va‘ai i le uaina pe a mūmū mai; pe a pupula mai i le ipu, e alualu sa‘o ifo ia.
32 E mulimuli ane e feū ia, pei se gata; e pei o le gata uogo lona tui;
33 e va‘ai ou mata i fafine ‘ese; e tautala fo‘i lou loto i mea fa‘api‘opi‘o.
34 E tusa lava oe ma lē ‘ua ta‘oto i totonu o le sami; e tusa fo‘i ma lē ‘ua ta‘oto i le tumutumu o le fanā.
35 “Na latou fasia a‘u,” ‘e te fa‘apea, “a ‘ou te le‘i tigā ai; na latou tu‘ia a‘u, a ‘ou te le‘i lagona; pe a a‘u toe ala a‘e, ‘ona ‘ou toe sā‘ilia lea i le uaina auā e lē uma lo‘u fia inu.”#