1 E fa‘alogo le atali‘i poto i le a‘oa‘o atu a lona tamā;a o lē fa‘atauemu, e lē fa‘alogo ia i le a‘oa‘iga.
2 E ‘ai le tagata i mea lelei a‘i le fua o lona gutu;a o le mana‘o o ē amio leaga, e ‘ai ia i le sauāga.
3 O lē na te leoleo i lona gutu, e tausia e ia lona agaga;a o lē fa‘amaga ona laugutu, e ‘iā te ia le malaia.
4 ‘Ua tu‘inanau le loto o le paiē, ‘ae leai se mea e maua;a o lē mana‘o o ē filigā i galuega e matuā mā‘ona ia.
5 ‘Ua ‘ino‘ino le amiotonu i le ‘upu pepelo;a o lē amio leaga e ‘inosia o ia ma fa‘amāina.
6 O lē amiotonu e leoleoina ai lē ‘ua sa‘o lana amio;a o lē amio leaga e lafotūina ai lē ‘ua agasala.
7 O i ai le tasi e fa‘atagā mau‘oa, ‘ae leai lava sana mea;o i ai le fa‘atagā mativa, ‘ae tele ana ‘oloa.
8 O le togiola o le tagata, o lana ‘oloa lea;a o lē mativa, e lē fa‘alogo o ia i le a‘oa‘iga.
9 E fiafia le malamalama o ē amiotonu;a o le lamepa a ē amio leaga, e tineia lea.
10 Na o le fa‘amaualuga lava e tupu ai le misa;a o ē filifili, e popoto i latou.
11 E fa‘aitiitia le ‘oloa i lē fai mea fa‘atauva‘a;a o lē fa‘aputu mea i galuega, e fa‘ateleina ana mea.
12 O le fa‘amoemoe ‘ua tuai ‘ona taunu‘u e fa‘anoanoa ai le loto;a o le mana‘o ‘ua taunu‘u, o le la‘au o le ola lea.
13 O lē ‘ino‘ino i le ‘upu, e fano o ia ‘iā te ia;a o lē mata‘u i le poloa‘iga, e filemū lava o ia.
14 O le tulafono a lē ‘ua poto, o le puna o le ola lea,e ‘alo ‘ese ai i mailei e oti ai.
15 O lē mafaufau lelei e tupu mai ai le alofa;a o le ala o ē amio leaga ‘ua faigatā lea.
16 O tagata mafaufau uma, e ta‘itasi ma amio poto ia;a o le vale, na te fa‘asalalauina lona valea.
17 O le ‘avefe‘au e amio leaga, e pa‘ū o ia i le leaga;a o lē tausavali fa‘amaoni e mālōlō ai.
18 O le mativa ma le fa‘amāina, e i ai ia i lē na te te‘ena mea e a‘oa‘oina;a o lē ‘ua usiusita‘i i le a‘oa‘iga, e mamalu lava ia.
19 O le mana‘o ‘ua o‘o e suamalie lea i le loto;‘ae ‘ino‘ino o ē vālelea ‘ina alu ‘ese i le leaga.
20 O lē latou te feoa‘i ma tagata popoto, e poto lava ia;a o le uō a ē vālelea, e leaga ai lava ia.
21 ‘Ua tulituliloaina ē agasala i le leaga;‘ae tauia ē amiotonu i le lelei.
22 O le tagata lelei na te tofia ana mea i le fānau a lana fānau;a o le ‘oloa o le tagata agasala, e teua lea mo lē amiotonu.
23 E tele le mea e ‘ai i le fa‘ato‘aga a ē matitiva;a o i ai le tasi ‘ua fa‘aumatia ‘ina ‘ua leai se fa‘amasinoga.
24 O lē ‘ua tu‘una lana sasa, ‘ua ‘ino‘ino o ia i lona atali‘i;a o lē ‘ua alofa ‘iā te ia, ‘ua sā‘ili le a‘oa‘iga mo ia.
25 E ‘ai le amiotonu e mā‘ona ai o ia;a o manava o ē amio leaga, e momole ia.