1 O lē ‘ua fiafia ‘inā a‘oa‘oina, ‘ua fiafia o ia i le poto;a o lē ‘ino‘ino i le a‘oa‘iga, o le vale lea.
2 O le tagata amio lelei, e maua e ia le alofa mai le ALI‘I;a o le tagata ‘ua fai togafiti leaga, e fa‘asalaina lea.
3 E le fa‘atumauina le tagata i le amio leaga;a o le pogai o ē amiotonu, e le fa‘agae‘etia lea.
4 O le avā amio lelei, o le pale lea i lana tane;a o lē fa‘amā, e tusa o ia ma le mea e pala ai ona ivi.
5 O mafaufauga a ē amiotonu, ‘ua tonu ia;o pulega a ē amio leaga, ‘ua pepelo ia.
6 O ‘upu a ē amio leaga e lamalama i le toto;a o gutu o ē ‘ua sa‘o a latou amio, e lavea‘iina ai i latou.
7 ‘Ua fa‘aumatia ē amio leaga, ‘ua leai lava i latou;a o le fale o ē amiotonu, e tumau lava lea.
8 E vi‘ia le tagata, e tusa ma lona poto;a o lē ‘ua loto fa‘api‘opi‘o, e ‘inosia lava o ia.
9 E lelei lē ‘ua ta‘ufa‘atauva‘aina, ‘ae fai lona tautua;‘ae leaga lē na te vivi‘i o ia ‘iā te ia, ‘ae fia ‘ai.
10 ‘Ua fa‘apelepele le tagata amiotonu i lana manu;a o le alofa o ē amio leaga, o le sauāga lea.
11 O lē galue i lona fanua, e mā‘ona o ia i mea e ‘ai;a o lē mulimuli i tagata fa‘atauva‘a, ‘ua leai sona mafaufau.
12 E mana‘o lē amio leaga i mea ‘ua maua e tagata amio leaga;a o le pogai o ē amiotonu, e fua mai lea.
13 ‘Ua i ai le mailei leaga; i le solitulafono o laugutu;‘ae sao lē amiotonu a‘i le puapuagā.
14 E mā‘ona le tagata i mea lelei a‘i le fua o lona gutu;e taui atu fo‘i i le tagata o mea na faia e ona lima.
15 O le ala o le vale, ‘ua tonu lea i lona manatu;a o lē ‘ua fa‘alogo i le pule, e poto ia.
16 E vave iloa le ita o le vale; a o le tagata mafaufau,‘ua ufiufi e ia lona mā.
17 O lē tautala fa‘amaoni, ‘ua fa‘aali mai e ia le tonu;a o lē molimau pepelo, ‘ua fa‘aali mai e ia le fa‘a‘ole‘ole.
18 O i ai le so‘ona tautala, e pei o tutu‘i i le pelu;a o laulaufaiva o ē popoto e mālōlō ai.
19 O laugutu fa‘amaoni, e fa‘atumauina ia e fa‘avavau;a o le laulaufaiva pepelo, ‘ua se ‘emo o le mata lea.
20 O lē fa‘a‘ole‘ole, ‘ua i ai lea i loto o ē fai togafiti leaga;a o ē pule ‘ia filemū, e i ai le ‘oli‘oli.
21 E lē o‘o se mea leaga e tasi i lē amiotonu;a o ē amio leaga, e tūtūmu i latou i le leaga.
22 E ‘inosia e le ALI‘I o laugutu pepelo;a o ē fai mea fa‘amaoni, e fiafia i ai o ia.
23 O le tagata mafaufau, na te ufiufi lona poto;a o loto o ē vālelea e fa‘alaua‘itele lo latou valea.
24 E manumālō lima o ē filigā i galuega;a o lē paiē, e fai taulaga o ia.
25 O le atuatuvale i le loto o le tagata ‘ua fa‘avaivai ai o ia;a o le ‘upu lelei e fa‘a‘oli‘oliina ai.
26 O le tagata amiotonu, na te fa‘aali le ala i lana uō;a o le ala o ē amio leaga, e fa‘asesēina ai i latou.
27 E lē tunua e le paiē lana manu sa tuli;a o le ‘oloa tāua a tagata, e i ai lea i lē ‘ua filigā i galuega.
28 O le ala o le amiotonu, o i ai le ola;e leai fo‘i se oti i ona magāala.#