1 O ‘upu a Akuru le atali‘i o Iake;o le valo‘aga na fai atu ai le tagata ‘iā Itielu,o Itielu ‘atoa ma Ukala.
2 O a‘u nei lava, e sili ‘ona valea o a‘u i tagata uma;e le ‘iā te a‘u le atamai o tagata.
3 ‘Ua lē a‘oa‘oina fo‘i a‘u i le poto;‘ua ‘ou lē iloa fo‘i le poto i mea pa‘ia.
4 O ai ‘ea na alu a‘e i le lagi ma toe ifoifo?O ai ‘ea ‘ua fa‘apotopotoina le matagi i ona lima?O ai ‘ea ‘ua fusifusi vai i le ‘ofu?O ai ‘ea na fa‘atūina tulu‘iga uma o le lalolagi?O ai ‘ea lona igoa o ai fo‘i le igoa o lona atali‘i, pe ‘āfai ‘ua e iloa?
5 O afioga uma a le Atua, ‘ua se ario ‘ua te‘a ma le otaota ia; o le talitā lava o ia e fa‘atuatua ‘iā te ia.
6 ‘Aua ‘e te fa‘aopoopo se ‘upu i ana afioga ne‘i a‘oa‘i atu o ia ‘iā te oe, ‘ona ta‘upepeloina ai lea o oe.
7 O mea e lua ‘ua ‘ou ole atu ai ‘iā te oe;‘aua ‘e te fa‘afiti mai ai ‘iā te a‘u, manū ‘ou te le‘i oti;
8 o mea fa‘atauva‘a ma ‘upu pepelo, ‘ia fa‘amamao ia ‘iā te a‘u;‘aua ‘e te tu‘u mai ‘iā te a‘u le mativa po o le mau‘oa;‘ia e fafaga mai ‘iā te a‘u i ni mea e ‘ai e tatau ma a‘u;
9 ‘ina ne‘i ‘ou matuā mā‘ona, ‘ona ‘ou fa‘afiti lea,ma ‘ou fa‘apea, “O ai ‘ea le ALI‘I?”‘ina ne‘i ‘ou mativa fo‘i ma ‘ou gaoi ma ‘ou ta‘ufuaina le suafa o lo‘u Atua.
10 ‘Aua ‘e te fa‘aleaga le ‘au‘auna i lona ali‘i;‘ina ne‘i fetu‘u o ia ‘iā te oe ma e nofo sala.
11 O i ai le tupulaga e fetu‘u i lo latou tamā ma latou le fa‘amanuia i lo latou tinā.
12 O i ai le tupulaga, e manatu i latou ‘ua latou mamā;‘ae le‘i fufulu‘esea o latou ‘ele‘ele.
13 O i ai le tupulaga e fa‘asiasia na‘uā o latou mata ma fa‘amaualugaina o latou laumata.
14 O i ai le tupulaga, o pelu o latou nifo ma naifi o latou nifo tulimanu;e fa‘atafunaina ai i ē puapuagātia i le nu‘u,‘atoa ma tagata matitiva.
15 E to‘alua afafine o le aluka, o lo‘o fai mai, “‘Aumai, ‘aumai.”E tolu mea e le mā‘o‘ona; o mea e fa ‘ua lē fai mai, “Sōia;”
16 o le tu‘ugamau, o le manava ‘ua lē fānau,o le ‘ele‘ele e le malie i vai ma le afi ‘ua lē fai mai, “Sōia.”
17 O mata ‘ua tauemu i le tamā ma ‘ino‘ino ‘ona usiusita‘i i le tinā,e salia ia e oreva o le vanu,e ‘aina e tama‘i aeto.
18 E tolu mea ‘ou te matuā ofo ai lava; a o le fa o mea ‘ou te lē malamalama ai;
19 o le ala o le aeto i le lagi;o le ala o le gata i luga o le papa;o le ala o le va‘a i luga o le sami;ma le ala o le tane i le taupou.
20 O lo‘o fa‘apea lava le ala o le fafine mulilua; ‘ua ‘ai o ia, ma sōloi i lona gutu,‘ona fa‘apea ane ai lea o ia, “‘Ua ‘ou le faia se mea leaga.”
21 O mea e tolu ‘ua fa‘agateteina ai le lalolagi;o mea lava e fa na te lē lavā ‘onosa‘i ai;
22 o le ‘au‘auna pe a pule o ia; ma le vale pe a mā‘ona o ia i mea e ‘ai;
23 o le fafine ‘inosia pe a nofo tane o ia;ma le ‘au‘auna fafine pe a tuli‘esea e ia lona matai fafine.
24 O mea e fa ‘ua laiti i le lalolagi, ‘ae sili ‘ona popoto o i latou;
25 o loi, o le nu‘u e le malolosi ia, ‘ae saunia e i latou a latou mea e ‘ai i le tausaga vevela.
26 O sefanai, o le nu‘u e le fitafitā ia, ‘ae fai i le papa o latou fale.
27 E leai se tupu i sē akerise, ‘ae ō atu i latou o vaevaeina uma lava a latou ‘au.
28 O le pili, e tago atu i ai le lima, e i ai fo‘i o ia i maota o tupu.
29 E tolu mea e matagofie ‘ona sāvavali; e fa fo‘i mea ‘ua o fa‘amatagofie;
30 o leona e malosi i manu vaefā; e le liliu fo‘i o ia i luma o se tasi;
31 o le solofanua, ma le ‘oti po‘a ma le tupu e leai sē tula‘i atu ‘iā te ia.
32 ‘Āfai ‘ua e amio fa‘avalea ‘ina ‘ua e fa‘amaualuga,‘āfai fo‘i na e manatu i se mea leaga, tu‘u atu ia lou lima i lou gutu.
33 A tatau suāsusu, e maua ai le suāsusu to‘a;a ‘o‘omi le isu, ‘ua sau ai le toto; a fa‘aoso le ita ‘ua tupu ai le misa.