1 O ‘upu a Lemueli le tupu, o le valo‘aga na a‘oa‘oina ai o ia e lona tinā.
2 Se a ‘ea sa‘u ‘upu ‘iā te oe la‘u tama e?Se a lava sa‘u ‘upu ‘iā te oe na fānau i lo‘u manava?Se a lava sa‘u ‘upu ‘iā te oe le tama na ‘ou tautō ai?
3 ‘Aua ne‘i e avatu lou malosi i fafine ma ou ala i le mea e fano ai tupu.
4 Lemueli e,e le onomea i tupu, e le onomea lava i tupu le inu uaina, po o ali‘i e mana‘o i le ‘ava;
5 ‘ina ne‘i inu o ia, ‘ona galo ai lea o tulafono ma fa‘asesē le finauga o se tasi tagata ‘ua tigāina.
6 Avatu le ‘ava i lē a mole ma le uaina i lē ‘ua tigā le loto;
7 ‘ia inu ai o ia ma fa‘agalogalo i lona mativa;ma ‘ia lē toe manatu i lona puapuagā.
8 ‘Ia e tautala mo ē gūgū, o le finauga lava o i latou uma ‘ua aumatuā;
9 ‘ia e tautala ‘ia fa‘amasino ma le tonu ma ‘ia finau mo ē ‘ua puapuagātia ma ē ‘ua mativa.
10 O le avā amio lelei, o ai ‘ea sē ‘ua maua? E silisili lona tau i penina.
11 ‘Ua fa‘atuatua ‘iā te ia le loto o lana tane; e le mativa o ia i ‘oloa.
12 E agalelei o ia ‘iā te ia, ‘ae lē agaleaga i aso uma o lona olaga.
13 Na te sā‘ilia fulufulu mamoe ma lino; ‘ua galue ai ona lima ma le fiafia.
14 E tusa o ia ma va‘a o le fa‘atau‘oa; e mamao le mea e ‘aumai ai ana mea e ‘ai.
15 E tula‘i fo‘i o ia, a o po lava ma avatu mea e ‘ai i lona ‘āiga ma le galuega ‘ua tofia i ana ‘au‘auna teine.
16 ‘Ua mānatunatu o ia i se fanua, ‘ona maua ai lea e ia; o le fua o ona lava lima ‘ua ia fai ai le tōvine.
17 Na te fusia lona sulugātiti i le malosi; na te fa‘amalosia ona lava lima.
18 ‘Ua iloa e ia ‘ua lelei lana tau; e lē mate lana lamepa i le po.
19 ‘Ua tu‘u atu e ia ona lima i le kisuro ma ‘ua tago atu ona lima i le peleke.
20 ‘Ua fa‘amafola lona lima i lē ‘ua tigāina; ‘ua tu‘u atu fo‘i ona lima i lē ‘ua mativa.
21 E lē fefe o ia ‘ona o lona ‘āiga i le kiona; auā ‘ua ‘o‘ofu lona ‘āiga uma i ‘ofu mūmū.
22 ‘Ua fai ‘ie ‘afu mōna; o le ‘ie vavae ma le ‘ie pāuli, o ona ‘ofu ia.
23 ‘Ua ‘iloga lana tane i faitoto‘a, pe a saofa‘i o ia fa‘atasi ma toeaina o le nu‘u.
24 ‘Ua fai e ia le ‘ofu lino ma fa‘atau ai; ‘ua avatu fo‘i fusi i le fa‘atau‘oa.
25 O le malosi ma le mamalu e fai mōna ‘ofu ia; ‘ua ‘ata‘ata fo‘i o ia i aso o lumana‘i.
26 ‘Ua tautala o ia ma le poto; ‘ua i lona laulaufaiva le tulafono o le alofa.
27 ‘Ua va‘ava‘ai o ia i amioga a lona ‘āiga; e lē ‘ai fo‘i o ia i mea e ‘ai a le paiē.
28 E tula‘i mai lana fānau ma fa‘afetai ‘iā te ia; o lana tane fo‘i ‘ua vivi‘i ‘iā te ia.
29 “E to‘atele fafine e amio lelei i latou; a o oe, ‘ua fa‘asilisili oe ‘iā i latou uma.”
30 O le matagofie e pepelo lea, o le mea fa‘atauva‘a le lālelei; a o le fafine ‘ua mata‘u i le ALI‘I, e vi‘ia lava o ia.
31 Avatu ‘iā te ia le fua o ona lima; o ana galuega fo‘i e vi‘ia ai o ia i faitoto‘a.