1 Teofilo e: Na ‘ou tusia le ulua‘i tala i mea uma lava na amata ‘ona faia e Iesu ma a‘oa‘o atu,
2 e o‘o i le aso na ‘aveina a‘e ai o ia, ‘ina ‘ua uma ‘ona poloa‘i atu e le Agaga Pa‘ia i le ‘au ‘aposetolo ē na filifilia e ia.
3 ‘Ua mavae lona tigā, ‘ona ia fa‘ailoa atu ai lea o ia e ia lava ‘iā te i latou, ‘ua toe soifua mai. ‘Ua fa‘amaonia i fa‘ailoga e tele; e fa sefulu po ‘ua iloa ai o ia e i latou, ma na fetalai atu i mea a le mālō o le Atua.
4 Sa fa‘apotopoto fo‘i o i latou ma ia, ‘ona fetalai atu lea o ia ‘iā te i latou, “‘Aua le tu‘ua Ierusalema, a ‘ia fa‘atali i le mea na folafolaina e le Tamā, ‘ua ‘outou fa‘alogo ai ‘iā te a‘u.
5 Auā na papatiso lava Ioane i le vai; a o ‘outou, e papatisoina ‘outou i le Agaga Pa‘ia e lē tele ni aso e vā a‘i.”
6 ‘Ua potopoto i latou, ‘ona latou fesili ai lea ‘iā te ia, ‘ua fa‘apea mai, “Le Ali‘i e, o ona po nei ‘ea ‘e te toe fuata‘i mai ai le mālō ‘iā Isaraelu?”
7 A ‘ua fetalai atu o ia ‘iā te i latou, “E lē tusa ‘ona ‘outou iloa o ona po ma ona tausaga ‘ua tu‘u ai e le Tamā i lana lava pule.
8 ‘Ae peita‘i o le a maua e ‘outou le mana, pe ā afio ifo le Agaga Pa‘ia i luga ‘iā te ‘outou; e fai fo‘i ‘outou ma molimau ‘iā te a‘u i Ierusalema ma Iutaia uma lava, ma Samaria, e o‘o lava i le tulu‘iga o le lalolagi.”
9 ‘Ua fetalai atu o ia i ia mea, ‘ona si‘itia lea o ia, a o latou o va‘ava‘ai atu; ‘ua ‘avea fo‘i o ia i le ao nai o latou luma.
10 ‘Ua latou tulimata‘i a‘e i le lagi, a o afio a‘e o ia, fa‘auta fo‘i, o tagata e to‘alua ‘ua tutū mai ‘iā te i latou ma ‘ofu sisina.
11 ‘Ua la fai mai, “O ‘outou tagata Kalilaia e, se a le mea tou te tutū ai, ma va‘ava‘ai i le lagi? O Iesu lenā, ‘ua ‘aveina a‘e nai ‘iā te ‘outou i le lagi, e fa‘apea ‘ona toe afio mai o ia, e pei o lona afio atu i le lagi ‘ua ‘outou va‘ava‘ai i ai.”
12 ‘Ona latou toe fo‘i atu lea i Ierusalema nai le mauga e igoa ia Olive, e latalata lea i Ierusalema, pe tusa lea ma le tasi kilomita lo la vā.
13 ‘Ua latou o‘o atu, ‘ona ō a‘e lea o i latou i le potu aupitoaluga, ‘ua nonofo ai Peteru, ma Iakopo, ma Ioane, ma Aneterea, o Filipo ma Toma, o Patolomaio ma Mataio, o Iakopo le atali‘i o Alefaio ma Simona le Selote, ma Iuta le atali‘i o Iakopo.
14 ‘Ua finafinau pea i latou nei uma lava ma le loto gatasi i le tatalo ma le ‘ai‘oi, ‘atoa ma fafine ma Maria le tinā o Iesu, ‘atoa fo‘i ma ona uso.
15 O ona po ia na tula‘i ai Peteru i luma o le ‘au so‘o, (o le aofa‘i o igoa o ē na i ai po ‘ua to‘aselau ma le to‘aluafulu;) ‘ua fa‘apea atu.
16 “Sema e, le ‘au uso e, ‘ua tatau ‘ona taunu‘u o lenei Tusi, sa mua‘i fetalai mai ai le Agaga Pa‘ia i le fofoga o Tavita ‘iā Iuta, sa fai ma ta‘ita‘i ‘iā te i latou o ē na pu‘e ‘iā Iesu.
17 Auā na faitauina o ia fa‘atasi ma i matou, na tofia fo‘i o ia i lenei galuega.”
18 Na fa‘atau fo‘i e lenei tagata le fanua i le totogi o le amio leaga; na titō fo‘i o ia ‘ua pā ai lona manava, ‘ua masa‘a ai i fafo lona ga‘au uma lava.
19 ‘Ua iloa fo‘i lenei mea e i latou uma ‘ua nonofo i Ierusalema, o le mea lea ‘ua igoa ai lea fanua i la latou lava gagana, o Akeletama, o lona uiga, o le fanua o le toto.
20 “Auā ‘ua tusia i le tusi o salāmo,‘‘Ia tu‘ufua le mea ‘ua nofo ai o ia,‘aua fo‘i ne‘i i ai sē mau ai i le mea lea.’I le ma lea,‘‘Ia fai lona faiva mo se tasi.’
21 O lenei, e tatau ‘ona fai ma molimau fa‘atasi ma i matou nei, i lona toetū, o se tasi o ia tagata sa feoa‘i ma i tatou i ona po uma lava, a o femaliua‘i le Ali‘i o Iesu ma i tatou,
22 e āfua mai i le papatisoga a Ioane, e o‘o lava i le aso na ‘aveina a‘e ai o ia nai ‘iā te i tatou.”
23 ‘Ona tu‘u mai lea e i latou o le to‘alua, o Iosefa e igoa ia Pasapa, ‘ua igoa fo‘i ‘iā Iuso, ‘atoa ma Matatia.
24 ‘Ua tatalo fo‘i i latou, ‘ua fa‘apea atu, “Le Ali‘i e, o oe o lē silafia loto o tagata uma lava, ia ē fa‘ailoa mai po o ai o lā‘ua nei ‘ua e filifilia,
25 na te maua le tofi o lenei galuega o le ‘aposetolo, na lafoa‘iina e Iuta ‘ina ‘ia alu o ia i lana lava mea e nofo ai.”
26 ‘Ona latou faia ai lea o le vili, ‘iā te i lā‘ua ‘ona fa‘asaga ai lea o le vili ‘iā Matatia; ‘ona faitauina fa‘atasi lea o ia ma le ‘au ‘aposetolo e to‘asefulu ma le to‘atasi.