1 O lo‘o o tautala atu i lā‘ua i le nu‘u, ‘ona tutū mai lea ‘iā te i lā‘ua o ositaulaga, ma le ta‘ita‘i o le ‘au leoleo o le malumalu, ‘atoa ma satukaio.
2 ‘Ua tigā i latou ‘ona ‘ua la a‘oa‘o atu i le nu‘u, ‘inā tala‘i atu le toetū mai o Iesu nai ē ‘ua oti.
3 ‘Ua pupu‘e ‘iā te i lā‘ua, ma tu‘u atu i le fale puipui se‘ia o‘o i le taeao; auā ‘ua afiafi lava.
4 E to‘atele o ē na fa‘alogologo i le ‘upu, ‘ua fa‘atuatua i latou; o le faitau aofa‘i fo‘i o tagata po ‘ua lima afe.
5 ‘Ua o‘o i le taeao, ‘ona fa‘apotopotoina ai lea i Ierusalema o latou ali‘i, ma le ‘au toeaina, ma le ‘au tusi‘upu,
6 ma Ana le ositaulaga sili, ma Kaiafa, ma Ioane, ma Alesana ‘atoa uma lava ma le ‘āiga o le au ositaulaga sili.
7 ‘Ua latou tu‘u ‘iā te i lā‘ua i totonu, ‘ona latou fesili mai ai lea, “O le a ‘ea le mana, po o le igoa o ai, na ‘oulua fai ai lenei mea?”
8 ‘Ona fai atu lea o Peteru ‘iā te i latou, ‘ua tumu o ia i le Agaga Pa‘ia, “O ‘outou ali‘i o le nu‘u, ma toeaina o Isaraelu,
9 ‘āfai e fa‘amasinoina i mā‘ua i lenei aso i le alofa ‘ua faia i le tagata ma‘i, po o le a ‘ua mālōlō ai o ia;
10 ‘ia iloa e ‘outou uma, ‘atoa ma le nu‘u uma o Isaraelu, o le suafa o Iesu Keriso o le Nasareta, o lē na fa‘asatauroina e ‘outou, o lē ‘ua toe fa‘atūina e le Atua nai ē ‘ua oti, o ia lava ‘ua tu mai ai lenei tagata ‘ua mālōlō i o ‘outou luma.
11 O Iesu lea sa fai mai ai le Tusi:‘O le ma‘a lenei na fa‘alēaogāina e ‘outou tufuga fai fale,‘ua ‘avea o ia ma ma‘a tulimanu aupitoaluga.’
12 “E leai fo‘i se tasi ‘ua i ai le ola; e leai lava se isi igoa i lalo o le lagi ‘ua foa‘iina mai i tagata e mafaia ‘ona fa‘aolaina ai o i tatou.”
13 ‘Ua va‘ai i latou i le loto tele o Peteru ma Ioane, ‘ua iloa fo‘i o tagata e le‘i a‘oa‘oina i lā‘ua ma le vālelea, ‘ua latou ofo ai; ‘ua latou iloa fo‘i o i lā‘ua sa latou fa‘atasi ma Iesu.
14 ‘Ua iloa atu fo‘i e i latou le tagata ‘ua fa‘amālōlōina ‘ua tutū fa‘atasi ma i lā‘ua, ‘ona lē mautali ai lea o i latou.
15 ‘Ua fai mai ‘iā te i lā‘ua e ō ‘ese ia i le fono; ‘ona fetautalatala‘i lea o i latou,
16 ‘ua fa‘apea, “Se a se mea tatou te faia i nei tagata? Auā ‘ua matuā iloa e i latou e nonofo i Ierusalema uma lava ‘ua faia lava e i lā‘ua le fa‘ailoga sili; e lē mafai fo‘i ‘ona tatou fa‘afiti i ai.
17 ‘Ae peita‘i ‘ina ne‘i alualu ‘ona salalau lea i le nu‘u, ‘ia tatou matuā fa‘amata‘u atu ‘iā te i lā‘ua, ia sōia lava le toe tautala i se tasi tagata i lenā igoa.”
18 ‘Ua ‘a‘ami atu ‘iā te i lā‘ua, ‘ona vavao lea ‘iā te i lā‘ua, ‘aua lava ne‘i tautala atu pe a‘oa‘o atu i le igoa o Iesu.
19 A ‘ua tali atu Peteru ma Ioane, ‘ua fa‘apea atu ‘iā te i latou, “‘Inā filifili ia ‘outou, pe tonu i luma o le Atua, ‘ona mā fa‘alogo atu ‘iā te ‘outou, pe mā te fa‘alogo i le Atua.
20 Auā ma te lē mafaia ‘ona lē tautala i mea ‘ua ma va‘ai i ai ma fa‘alogo i ai.”
21 ‘Ua latou toe fa‘amata‘u mai ‘iā te i lā‘ua, ‘ona tu‘u lea o i lā‘ua e ō, ‘ua lē maua e i latou se mea e fa‘asalaina ai i lā‘ua, ‘ona o le nu‘u; auā ‘ua vivi‘i tagata uma lava i le Atua, ‘ona o le mea ‘ua faia.
22 Auā ‘ua fagafulu tausaga ma ‘ona tupu o le tagata sa fai i ai lenā fa‘ailoga ‘ua mālōlō ai.
23 ‘Ua tu‘uina mai i lā‘ua e ō, ‘ona la ō atu lea i o latou, ma la fa‘amatala atu ‘iā te i latou mea uma lava na fai mai ai ‘iā te i lā‘ua e le ‘au ositaulaga sili ma toeaina.
24 ‘Ua fa‘alogo i ai i latou, ‘ona latou ‘alalaga lea i le Atua ma le loto gatasi, ‘ua fa‘apea atu, “Le Ali‘i e, o le Atua oe, o lē na faia le lagi, ma le lalolagi, ma le sami, ma mea uma lava o i ai;
25 o lē na fetalai mai i le fofoga o lau ‘au‘auna o Tavita:‘Se a le mea ‘ua lilivau ai nu‘u ‘ese,ma mafaufau ai nu‘u i mea e lē aogā?
26 ‘Ua tutū mai tupu o le lalolagi,‘ua fa‘apotopoto fa‘atasi fo‘i ali‘ie tete‘e atu i le Ali‘i ma lona Keriso.’
27 “Auā e moni lava, na fa‘apotopotoina e Herota ma Ponotio Pilato, ‘atoa ma nu‘u ‘ese ma le nu‘u o Isaraelu, e tete‘e atu i lau ‘au‘auna pa‘ia o Iesu, ‘ua e fa‘au‘uina;
28 latou te faia mea uma lava ma tu‘u anamua i lou ‘a‘ao ma lau pule ‘ia faia.
29 O lenei, le Ali‘i e, ia ē silasila i lo latou fa‘amata‘u mai; ‘ina ‘ia e foa‘i mai i au ‘au‘auna, ‘ina ‘ia latou matuā tautala i lau afioga, ma le loto tele,
30 i le fa‘aloaloa mai o lou ‘a‘ao e fa‘amālōlō ai ma ia faia fo‘i o fa‘ailoga ma vāvega i le suafa o lau ‘au‘auna pa‘ia o Iesu.”
31 ‘Ua mavae atu la latou tatalo, ‘ona lūlūina lea o le mea ‘ua fa‘apotopoto ai i latou; ‘ua tūtūmu fo‘i i latou uma i le Agaga Pa‘ia, ‘ina ‘ua tautala atu i le afioga a le Atua ma le loto tele.
32 ‘Ua tasi lava le loto ma le manatu o ē fa‘atuatua uma lava; ‘ua lē fai mai fo‘i e se tasi i se isi ana mea, o lana lea; a ‘ua tu‘u tele a latou mea uma.
33 ‘Ua molitino atu e le ‘au ‘aposetolo ma le mana tele i le toetū mai o le Ali‘i o Iesu; ‘ua alofateleina fo‘i i latou uma.
34 ‘Ua leai fo‘i so latou e mativa; auā o i latou ‘ua i ai fanua po o fale, ‘ua latou fa‘atauina, ‘ua ‘aumai fo‘i le tau o mea na fa‘atauina,
35 ma tu‘u mai i le ‘au ‘aposetolo e pule; ‘ua tufatufa ‘iā te i latou ta‘ito‘atasi e fa‘atatau i le mativa o le tagata.
36 O Iosefa fo‘i, ‘ua fa‘aigoaina e le ‘au ‘aposetolo o Panapa, (o lona uiga pe a fa‘amatalaina, “o le tagata fa‘amafanafana,”) o le sa Levi, o le tagata na fānau i Kuperu.
37 Sa ‘iā te ia le fanua, ‘ua ia fa‘atauina, ‘ua ‘aumaia fo‘i tupe o le tau, ma tu‘u mai i le ‘au ‘aposetolo e pule.