1 ‘Ua ō a‘e fa‘atasi Peteru ma Ioane i le malumalu i le itū aso e fai ai le tatalo, o le itūlā e tolu i le aoauli lea.
2 ‘Ua ‘ave fo‘i le tasi tagata ‘ua pipili talu ‘ona fānau mai, ‘ua tu‘uina ifo o ia e i latou i aso fai so‘o i le faitoto‘a o le malumalu ‘ua igoa i le Matagofie, e fa‘atoga atu i se mea alofa i ē ulu atu i le malumalu;
3 ‘ua iloa mai e ia e Peteru ma Ioane o ulu atu i le malumalu ‘ona fa‘atoga lea o ia i se mea alofa.
4 ‘Ona pulato‘a lea o Peteru ma Ioane ‘iā te ia, ‘ua fa‘apea atu, “Va‘ai mai ia ‘iā te i mā‘ua.”
5 ‘Ona naunau mai lea o ia ‘iā te i lā‘ua, e peiseaī e fia maua se mea mai ‘iā te i lā‘ua.
6 ‘Ona fai atu lea o Peteru, “E leai sa‘u ario po o sa‘u auro; a o le mea ‘ua ‘iā te a‘u, ‘ou te avatua ‘iā te oe, o le suafa o Iesu Keriso o le Nasareta, ‘inā tu ia i luga, ‘inā savali.”
7 ‘Ua tago atu fo‘i o ia i lona lima taumatau, ‘ua fa‘atū ‘iā te ia i luga; ‘ona fa‘amalosia loa lea o ona vae ma ona tapuvae.
8 ‘Ua oso o ia i luga ma tu, ‘ua savali fo‘i, ‘ua ulu fa‘atasi fo‘i ma i lā‘ua i le malumalu, o lo‘o savali o ia ma oso, ma vivi‘i atu i le Atua.
9 ‘Ua iloa mai fo‘i e le nu‘u uma o ia o lo‘o savali ma vivi‘i atu i le Atua.
10 ‘Ua latou iloa o ia lava sa nofo i le faitoto‘a o le Matagofie o le malumalu, ma fa‘atoga atu i mea alofa; ‘ua matuā ofo i latou, ‘ua segia o latou mauli i le mea ‘ua o‘o ‘iā te ia.
11 ‘Ua pipi‘i atu ‘iā Peteru ma Ioane le pipili ‘ua fa‘amālōlōina, ‘ua tamomo‘e mai le nu‘u uma lava ‘iā te i latou i le fa‘apaologa e igoa i le fa‘apaologa o Solomona, ‘ua ofo tele.
12 ‘Ua iloa e Peteru, ‘ona fai atu lea o lana lauga i le nu‘u, “Sema e, o ‘outou Isaraelu e, se a le mea tou te ofo ai i lenei mea? Se a fo‘i tou te pulato‘a mai ai ‘iā te i mā‘ua, peiseaī o so mā‘ua mana, ma se mā amio atua ‘ua savali ai o ia nei?
13 O le Atua o Aperaamo, ma Isaako, ma Iakopo, o le Atua ō tatou tamā, ‘ua tu‘uina atu e ia le mamalu i lana ‘Au‘auna o Iesu; o ia na ‘outou tu‘uina atu, ma ‘outou fa‘afiti ‘iā te ia i luma o Pilato, a ‘ua manatu o ia e tatalaina atu ‘iā te ia.
14 Peita‘i ‘outou, ‘ua ‘outou fa‘afiti atu le Pa‘ia ma le Amiotonu, a ‘ua ‘outou fai atu ‘ia tu‘uina mai ‘iā te ‘outou le fasioti tagata.
15 ‘Ua fasioti fo‘i e ‘outou le Ali‘i o le ola, o ia ‘ua toe fa‘atūina e le Atua nai ē ‘ua oti; o molimau i matou nei i lenā mea.
16 O lona suafa fo‘i, ‘ona o le fa‘atuatua i lona suafa, ‘ua fa‘amalosia e ia lenei tagata ‘ua ‘outou va‘ava‘ai i ai, ma ‘outou iloa; o lē fa‘atuatua mai ‘iā te ia, ‘ua foa‘i atu ai ‘iā te ia lenei fa‘amalosi o lona tino i o ‘outou luma lava.
17 “O lenei, le ‘au uso e, ‘ua ‘ou iloa na faia e ‘outou ma le lē iloa, e fa‘apea fo‘i o ‘outou ali‘i.
18 A o ia mea na mua‘i fa‘ailoa mai e le Atua i fofoga o ana perofeta uma lava, e tigā le Keriso, ‘ua fa‘apea lava ‘ona fa‘ataunu‘uina e ia.
19 O lenei, ‘inā salamō ia ‘outou ma ‘outou liliu, ‘ina ‘ia sōloi‘esea a ‘outou agasala, ‘ina ‘ia o‘o mai ai o tausaga e filemū ai mai luma o le Ali‘i;
20 ‘ina ‘ia ‘auina mai fo‘i e ia lē na mua‘i tala‘iina ‘iā te ‘outou, o Iesu Keriso lea.
21 E tatau ‘ona nofo o ia i le lagi se‘ia o‘o i tausaga e toe fuata‘i ai mea uma lava ‘ua fetalai mai ai le Atua i fofoga o ana perofeta pa‘ia uma lava talu mai anamua.
22 Auā na fai mai lava Mose i o tatou tamā, ‘E fa‘atūina e le Ali‘i lo ‘outou Atua le perofeta mo ‘outou o so ‘outou uso, e fa‘apei o a‘u nei; tou te fa‘alogo ‘iā te ia i mea uma lava na te fai mai ai ‘iā te ‘outou.
23 E i‘u fo‘i ‘ina fa‘aumatia le nu‘u o tagata uma lava o ē lē fa‘alogo i lenā perofeta.’
24 O perofeta uma fo‘i ē na fai mai, e āfua ‘iā Samuelu, ma ē na mulimuli mai, o i latou uma lava, ‘ua mua‘i fa‘ailoa mai i latou i nei aso.
25 O fānau ‘outou a le au perofeta, ma le feagaiga sa faia e le Atua ma o tatou tamā, ‘ua fa‘apea mai ‘iā Aperaamo, ‘o so lau fānau fo‘i e manuia ai ‘āiga uma lava o le lalolagi.’
26 O le Atua fo‘i, ‘ua na fa‘atūina mai lana ‘Au‘auna o Iesu, ‘ua ‘auina mai o ia e muamua mai ‘iā te ‘outou, e fa‘amanuia mai ‘iā te ‘outou i le fa‘aliliu‘esega ‘outou ta‘itasi ‘iā ‘outou amioleaga.”