1 ‘Ua o‘o atu fo‘i i le aso Penetekoso, sa i ai i latou uma lava i le mea e tasi ma le loto gatasi.
2 ‘Ona fa‘afuase‘i mai lea o le ta‘alili mai le lagi, peiseaī o le matagi ‘ua agi tele mai, ‘ua tumu uma ai le fale sa latou nonofo ai.
3 ‘Ua iloa fo‘i e i latou o laulaufaiva peiseaī o le afi ‘ua vaevaeina, ‘ua nofo i o latou luga ta‘ito‘atasi.
4 ‘Ua fa‘atūtūmuina fo‘i i latou uma i le Agaga Pa‘ia, ‘ua āfua ai ‘ona tautatala i gagana ‘ese‘ese, pei ‘ona foa‘iina mai e le Agaga o le gagana ‘iā te i latou.
5 Sa nonofo i Ierusalema tagata Iutaia ē ‘ua matata‘u i le Atua, mai nu‘u uma lava o le lalolagi.
6 ‘Ua lagona fo‘i lenei ta‘alili, ‘ona fa‘apotopoto mai ai lea o le motu o tagata, ‘ua femēmēa‘i, ‘ina ‘ua ta‘itasi ma fa‘alogo atu ‘iā te i latou ‘ua tautala mai i lana lava gagana.
7 Sa latou matuā ofo tele ma fa‘apea ane, “Fa‘auta, e lē o Kalilaia ‘ea i latou uma o ē tautala mai nei?
8 E fa‘apefea fo‘i ‘ona tatou ta‘itasi ma fa‘alogo atu i lana lava gagana na tupu ma ia?
9 O Patia, ma Metai, ma Elama, ma i latou e nonofo i Mesopotamia, ma Iutaia ma Kapatokia, o i Pono ma Asia,
10 o i Ferukia ma Pafulia, o Aikupito ma ni vaega o Lipua ‘ua tuā‘oi ma Kurene. O ē ‘ua āumau fo‘i mai Roma, o Iutaia ma ē ‘ua liu lotu Iutaia.
11 O Kereta ma Arapi; ‘ua tatou fa‘alogo atu ‘iā te i latou o lo‘o tautala mai ‘iā tatou lava gagana i vāvega o le Atua.”
12 ‘Ua latou ofo lava ma femēmēa‘i ma fetautalatala‘i, “Se a le uiga o lenei mea?”
13 Peita‘i o isi, ‘ua tauemu i latou, ‘ua fa‘apea ane, “‘Ua ‘onanā nei tagata i le uaina suamalie.”
14 ‘Ona tula‘i lea o Peteru ‘atoa ma le to‘asefulu ma le to‘atasi, ‘ua fai atu ma le leo tele, ‘ua fa‘apea atu ‘iā te i latou, “Sema e, o ‘outou Iutaia e, ‘atoa fo‘i ma ē ‘ua nonofo i Ierusalema uma lava, ia iloa e ‘outou lenei mea, ma ia fa‘afofoga mai i a‘u ‘upu.
15 Auā ‘ua lē ‘onanā nei tagata, pei ‘ona ‘outou māsalosalo i ai; auā o le itūlā e iva lenei i le taeao.
16 A o le mea lenei ‘ua fai mai ai le perofeta o Ioelu,
17 ‘O ona aso e gata ai, o lo‘o fa‘apea mai le Atua,E i‘u ‘ina ‘ou liligi ifo ai lo‘u Agaga i luga o tagata uma lava;‘Ona perofeta mai lea o ‘outou atali‘i ma o ‘outou afafine,e iloa fa‘aaliga e o ‘outou taulele‘a,e fai miti fo‘i o ‘outou toeaina.
18 O ia aso fo‘i ‘ou te liligi ifo ai lo‘u Agaga i lugao a‘u ‘au‘auna tane ma a‘u ‘au‘auna fafine,latou te perofeta mai ai.
19 ‘Ou te faia fo‘i vāvega i le lagi i luga,ma fa‘ailoga i le lalolagi i lalo,o le toto, ma le afi, ma le asuasu e fa‘aniutū.
20 E muamua ‘ona liua o le lā i le pouliuli,ma le masina i le toto,i le o‘o ai i le aso tele ma le silisili o le Ali‘i.
21 E i‘u fo‘i ‘ina fa‘aolaina o i latou uma lava o ē vala‘au atu i le suafa o le Ali‘i.’
22 “Sema e, o ‘outou Isaraelu e, fa‘alogo mai ia i nei ‘upu. O Iesu o le Nasareta, o le tagata na fa‘asinoina e le Atua ‘iā te ‘outou i mea mamana, ma vāvega, ma fa‘ailoga ‘ua faia e le Atua i o ‘outou luma e ia, pei ‘ona ‘outou iloa fo‘i.
23 O ia ‘ua tu‘uina mai e le pule tonu ma le silafaga a le Atua anamua, ma ‘outou fa‘amau i le la‘au ma fasioti i lima o tagata fa‘alētaupulea.
24 O ia ‘ua fa‘atūina mai e le Atua, ‘ua na tatala i puapuagā o le oti, auā na lē mafai ‘ona tāofiina ai o ia.
25 Auā ‘ua fai mai Tavita ‘iā te ia,‘Na ‘ou iloa atu le Ali‘i i o‘u luma e lē aunoa;auā o i lo‘u itū taumatau o ia, ‘ina ne‘i fa‘agae‘etia a‘u.
26 O le mea lea ‘ua fiafia ai lo‘u loto,ma ‘oli‘oli ai lo‘u laulaufaiva;o mālōlō ai fo‘i lo‘u tino ma le fa‘atalitali;
27 auā ‘e te lē tu‘ua a‘u i le tu‘ugamau;‘e te lē tu‘u atu fo‘i lou Tagata Pa‘ia ‘ia o‘o i ai le pala.
28 ‘Ua e fa‘ailoa mai ‘iā te a‘u le ala o le ola;‘e te fa‘atumu mai ‘iā te a‘u i le fiafia i ou luma.’
29 “Sema e, le ‘au uso e, se‘i ‘ou matuā fai atu ‘iā te ‘outou i lea tupuga o Tavita, ‘ua maliu o ia, ‘ua tanumia fo‘i, ‘ua ia i tatou lona tu‘ugamau ‘ua o‘o mai i ona po nei.
30 O lenei fo‘i, ‘ona o ia o le perofeta ma ‘ua iloa fo‘i na folafola mai ‘iā te ia le Atua i se tautoga, na te fa‘anofoina se tasi o ona suli i lona nofoāli‘i.
31 O lea ‘ua mua‘i iloa e ia, ma ‘ua fai mai fo‘i i le toetū mai o Keriso,‘‘Ua lē tu‘ua o ia i Seoli,‘ua lē o‘o fo‘i le pala i lona tino.’
32 O Iesu lava lenā ‘ua toe fa‘atūina e le Atua; o molimau i matou uma i lenā mea.
33 o lenei fo‘i, ‘ua si‘itia o ia i luga e le ‘a‘ao taumatau o le Atua, ma ‘ua maua e ia mai le Tamā o le Agaga Pa‘ia na folafolaina, ‘ua liligi ifo ai e ia lenei mea ‘ua ‘outou iloa ma fa‘alogo ai nei.
34 Auā e le‘i alu a‘e Tavita i le lagi, a ‘ua fai mai o ia,‘‘Ua fetalai mai le Ali‘i i lo‘u Ali‘i,“‘Ia e nofo i lo‘u itū taumatau,
35 se‘ia ‘ou fai o ē ita ‘iā te oe ma mea e tu ai ou vae.”’
36 “O lenei fo‘i, ia matuā iloa e le ‘āiga uma o Isaraelu, o Iesu lava lenā na fa‘asatauroina e ‘outou, ‘ua faia lea e le Atua ma Ali‘i ma Keriso.”
37 ‘Ua fa‘alogo mai i latou, ‘ona tuia lea o latou loto, ‘ua latou fai mai ‘iā Peteru ma le ‘au ‘aposetolo uma, “Sema e, le ‘au uso e, se a se mea matou te faia?”
38 ‘Ona fai atu lea o Peteru ‘iā te i latou, “‘Inā salamō ia, ma ‘ia ta‘itasi ma papatisoina ‘outou uma i le suafa o Iesu Keriso, mo le fa‘amāgaloina o agasala; ‘ona maua lea o ‘outou o le mea foa‘i fua mai, o le Agaga Pa‘ia lea.
39 Auā o ‘iā te ‘outou ma a ‘outou fānau le mea ‘ua folafolaina mai, ‘atoa ma ē o mamao uma lava, o i latou uma e vala‘auina e le Ali‘i lo tatou Atua.”
40 O isi ‘upu fo‘i e tele na ia molitino atu ma apoapoa‘i atu ai, ‘ua fa‘apea atu, “‘Ia fa‘aolaina ‘outou ai lenei tupulaga fa‘api‘opi‘o.”
41 ‘Ona papatisoina lea o ē na talia lana ‘upu ma le fiafia; o lea aso fo‘i ‘ua fa‘aopoopoina ai pe tolu afe o tagata.
42 ‘Ua tumau pea i latou i le a‘oa‘oga a le ‘au ‘aposetolo ma le mafuta fa‘atasi, ma le tofitofiga o le areto, ma talotaloga.
43 ‘Ua o‘o fo‘i le fefe i tagata uma; ‘ua faia fo‘i e le ‘au ‘aposetolo vāvega ma fa‘ailoga e tele.
44 ‘Ua fa‘atasia fo‘i ē ‘ua fa‘atuatua uma lava, ‘ua tu‘u tele a latou mea uma lava.
45 ‘Ua fa‘atau atu fo‘i o latou fanua ma ‘oloa, ma ‘ua tufatufa le tau o ia mea i tagata uma, ‘ua fa‘atatau i le mativa o le tagata.
46 ‘Ua latou nonofo pea ma le loto gatasi i le malumalu i lea aso ma lea aso. ‘Ua tofitofi fo‘i le areto i lea fale ma lea fale, ‘ua latou ‘a‘ai a latou mea e ‘ai ma le fiafia ma le loto lelei,
47 ‘ua latou vivi‘i atu i le Atua, ma ‘ua alofaina e le nu‘u uma lava. ‘Ua fa‘aopoopoina i le ekalesia e le Ali‘i i aso fai so‘o o ē ‘ua fa‘aolaina.#