1 A ‘ua mapugatama‘i pea o Saulo i le fa‘amata‘u ma le fasioti i le ‘au so‘o o le Ali‘i, ‘ua alu atu o ia i le ositaulaga sili,
2 ‘ua fa‘atoga atu ‘iā te ia i tusi e ‘ave i sunako i Tamaseko, pe ‘āfai na te maua ai nisi o lenā lotu, o tane ‘atoa ma fafine, ia fusifusi ma ta‘ita‘i mai i latou e ia i Ierusalema.
3 ‘Ua alu atu o ia ‘ua latalata i Tamaseko, ‘ona fa‘afuase‘i mai ai lea ‘ona pupula fa‘ata‘ali‘oli‘o mai ‘iā te ia o le malamalama mai le lagi.
4 ‘Ona pa‘ū lea o ia i lalo i le ‘ele‘ele, ‘ua fa‘alogo atu i le si‘ufofoga, o lo‘o fa‘apea mai ‘iā te ia, “Saulo, Saulo e, se a le mea ‘ua e sauā mai ai ‘iā te a‘u?”
5 ‘Ona fai atu lea o ia, “Le Ali‘i e, o ai ‘ea oe?”‘Ona fetalai mai lea o le Ali‘i, “O a‘u o Iesu ‘ua e sauā mai i ai; o le mea faigatā ‘iā te oe ‘ona a‘a i tui.”
6 ‘Ua gatete ia ma ‘ua mata‘u, ‘ua fa‘apea atu, “Le Ali‘i e, se a le mea ‘e te finagalo i ai ‘ou te faia?”‘Ona fetalai mai lea o Le Ali‘i ‘iā te ia, “Tū ia oe i luga, ‘inā alu ia i le ‘a‘ai, ‘ona ta‘uina atu lea ‘iā te oe o le mea e tusa ‘ona e faia.”
7 A ‘ua tutū i luga tagata ‘ua ō malaga ma ia, ‘ua lē mafeganavai; ‘ua lagona lava i latou, i le si‘ufofoga, ‘ae lē iloa atu se tasi.
8 ‘Ua tu i luga Saulo mai le ‘ele‘ele; ‘ua pupula ona mata, a ‘ua lē iloa se tasi ‘ua fetāgofi i latou i ona lima, ‘ua ta‘ita‘i ‘iā te ia i Tamaseko.
9 ‘Ua tolu fo‘i aso e lē o va‘ai ai o ia, ‘ua lē ‘ai, e le‘i inu.
10 Sa i Tamaseko le tasi so‘o, o Anania le igoa; ‘ua fetalai mai fo‘i le Ali‘i ‘iā te ia i le fa‘aaliga, “Anania e.”‘Ua tali atu o ia, “Le Ali‘i e, o a‘u lenei.”
11 ‘Ona fetalai mai lea o le Ali‘i ‘iā te ia, “‘Inā tu ia i luga, ‘inā alu i le ala o lona igoa o Sa‘o, ‘inā sā‘ili le tagata i le fale o Iuta, o Saulo le igoa, o le Taso; auā fa‘auta mai, o lo‘o tatalo o ia,
12 ‘ua nā iloa atu fo‘i i le fa‘aaliga le tagata, o Anania le igoa, o lo‘o ulufale atu, ma fa‘ae‘e lona lima i ona luga, ‘ina ‘ia toe va‘ai o ia.”
13 ‘Ona tali atu lea o Anania, “Le Ali‘i e, na ‘ou fa‘alogo i tagata e to‘atele i lenā tagata, i mea leaga e tele ‘ua na faia i ou tagata pa‘ia i Ierusalema;
14 e ana fo‘i le pule mai le ‘au ositaulaga sili, e fusifusi uma lava i ē ‘ua vala‘au i lou suafa ‘i‘inei.”
15 A ‘ua fetalai mai le Ali‘i ‘iā te ia, “‘Inā alu ia; auā o le ipu lava o ia ‘ua filifilia ma a‘u e momoli lo‘u igoa i luma o nu‘u ‘ese, ma tupu, ma le fānauga a Isaraelu.
16 Auā ‘ou te fa‘ailoa atu ‘iā te ia mea e tele e tusa ‘ona tigā ai o ia ‘ona o lo‘u igoa.”
17 ‘Ona alu lea o Anania, ‘ua ulu atu i le fale, ‘ua na fa‘ae‘e atu fo‘i ona lima i luga ‘iā te ia, ‘ua fa‘apea atu, “Lo‘u uso e Saulo, ‘ua ‘auina mai a‘u e le Ali‘i o Iesu, sa fa‘aali ‘iā te oe i le ala na e sau ai, ‘ina ‘ia e toe va‘ai, ia fa‘atumuina oe i le Agaga Pa‘ia.”
18 ‘Ona pa‘u‘ū loa lea o mea nai ona mata peiseaī ni una, ‘ona toe va‘ai loa lea o ia, ‘ua tu fo‘i i luga ma ‘ua papatisoina.
19 ‘Ua ‘ai ‘ona malosi ai lea o ia.‘Ua fa‘atasi fo‘i Saulo ma le ‘au so‘o e na i Tamaseko i nai isi aso.
20 ‘Ona tala‘i loa lea e ia i sunako “O le Keriso, o ia lava o le Alo o le Atua.”
21 ‘Ua matuā ofo i latou uma ē na fa‘alogo ai, ‘ua fa‘apea ane, “E lē o ia ‘ea lenei sa sauā i Ierusalema i ē vala‘au i lea lava igoa, ma ‘ua sau ‘i‘inei ‘ina ‘ia fusifusi ma ta‘ita‘i ‘iā te i latou i le ‘au ositaulaga sili?”
22 A ‘ua atili ai le fa‘amalosi o Saulo, ‘ua femēmēa‘i ai Iutaia sa nonofo i Tamaseko ma na fa‘aalitino atu e ia, o le Keriso lava lenei.
23 ‘Ua fai po, ‘ona taupulepule lea o Iutaia e fasioti ‘iā te ia;
24 ‘ua iloa e Saulo la latou taupulepulega. A ‘ua lamalama i latou i faitoto‘a o le ‘a‘ai i le ao ma le po, ‘ina ‘ia fasioti ‘iā te ia.
25 A ‘ua ‘ave e le ‘au so‘o ‘iā te ia i le po, ma tu‘u ifo i le pā o le ‘a‘ai, ‘ua tu‘utu‘u ifo i le ‘ato.
26 ‘Ua o‘o Saulo i Ierusalema, ‘ona taumafai lea se‘i fa‘atasi atu o ia i le ‘au so‘o; a ‘ua fefefe i latou uma lava ‘iā te ia, sa manatu i latou e lē se so‘o o ia.
27 A ‘ua ‘ave e Panapa ‘iā te ia, ma ta‘ita‘iina atu i le ‘au ‘aposetolo, ‘ua na tala atu fo‘i ‘iā te i latou i lona iloa o le Ali‘i i le ala, ma lona fetalai mai ‘iā te ia, ma lana tautala fa‘amalosi i le suafa o Iesu i Tamaseko.
28 Sa feoa‘i fo‘i o ia ma i latou i Ierusalema,
29 ma tautala fa‘amalosi i le suafa, o le Ali‘i o Iesu; ‘ua tautala fo‘i o ia, ma fefinaua‘i ma le ‘au Elenisi; a ‘ua latou taumafaia e fasioti ‘iā te ia.
30 ‘Ua iloa fo‘i e le ‘au uso, ‘ona ‘ave ifo lea e i latou ‘iā te ia i Kaisareia, ‘ona ‘auina atu lea o ia i Taso.
31 ‘Ona fīfīlemū lea o ekalesia i Iutaia uma lava, ma Kalilaia, ma Samaria, ‘ua fa‘amafanafanaina i latou; ‘ua sāvavali fo‘i ma le mata‘u i le Ali‘i, ma ‘ua fa‘ato‘ateleina i le fesoasoani o le Agaga Pa‘ia.
32 ‘Ua alu solo Peteru i mea uma lava, ‘ua alu ifo fo‘i o ia i le ‘au pa‘ia na nonofo i Lita.
33 ‘Ua na iloa ai le tasi tagata o Ainea le igoa, e valu ona tausaga o ta‘oto i lona moega, ‘ua ma‘i o ia i le supa.
34 ‘Ua fai atu fo‘i Peteru ‘iā te ia, “Ainea e, ‘ua fa‘amālōlōina oe e Iesu le Keriso, ‘inā tu ia i luga, ma teu lou moega.” ‘Ona tu loa lea o ia i luga.
35 ‘Ua iloa atu fo‘i o ia e i latou uma ē ‘ua nonofo i Lita ma Sarona, ‘ua liliu ai i latou i le Ali‘i.
36 Sa i Iopa le tasi so‘o fafine o Tapita le igoa, e ta‘ua pe a fa‘amatalaina, o Toreka; na tele ana galuega lelei ma mea alofa na ia faia.
37 O ia ona po ‘ua ma‘i o ia, ‘ua oti ai; ‘ua uma fo‘i ‘ona latou mulumulu ‘iā te ia i le vai, ‘ona tu‘u lea ‘iā te ia i le potu aupitoaluga.
38 ‘Ua felāta‘i Lita ma Iopa, ‘ua fa‘alogo le ‘au so‘o o i ai Peteru, ‘ona latou ‘a‘au atu ai lea o tagata e to‘alua ‘iā te ia, ‘ua ole atu, “‘Aua le fa‘atuai ‘ona alu atu ‘iā te i latou.”
39 ‘Ona tu lea o Peteru i luga, ‘ua ō ma i lā‘ua. ‘Ua o‘o atu o ia, ‘ona ‘aveina a‘e lea o i latou ‘iā te ia i le potu aupitoaluga; ‘ua tutū mai fo‘i fafine uma lava ‘ua oti a latou tane, o fētāgisi mai ma fa‘aali mai ‘ofu tino ma ‘ofu tetele sa faia e Toreka, ‘ina o ‘iā te i latou o ia.
40 A ‘ua tuli atu Peteru ‘iā te i latou uma lava i fafo, ‘ona to‘otuli lea o ia, ma tatalo ‘ona fa‘asaga atu lea o ia i le oti, ‘Ua fa‘apea atu, “Tapita e, ‘inā tu ia i luga.” ‘Ua, pupula o ia; ‘ua na iloa Peteru, ‘ona nofo lea i luga.
41 ‘Ona tago atu lea o Peteru i lona lima, ma na fa‘atū ‘iā te ia; ‘ua vala‘au fo‘i o ia i le ‘au pa‘ia ma fafine ‘ua oti a latou tane, na tu‘u atu ‘iā te ia ‘ua ola.
42 ‘Ua iloa ai e Iopa uma lava; ‘ua fa‘atuatua fo‘i tagata e to‘atele i le Ali‘i.
43 ‘Ona nofo ai lea o ia i Iopa e tele aso i le tasi tagata o Simona le igoa, o le fai pa‘u o manu.