1 Sa loto gatasi fo‘i Saulo ma i latou i lona fasiga. O lea lava aso ‘ua tupu ai le sauā tele i le ekalesia i Ierusalema; na fa‘asalalauina fo‘i i latou uma i nu‘u o Iutaia ma Samaria, ‘ua toe na o le ‘au ‘aposetolo.
2 ‘Ua ‘ave fo‘i Setefano e tanu e tagata ‘ua matata‘u i le Atua, ‘ua matuā taufaitagitu‘i i latou ‘iā te ia.
3 A ‘ua so‘ona sauā Saulo i le ekalesia, ‘ua ulufale o ia i lea fale ma lea fale, ma fetoso mai o tane ma fafine, ma tu‘uina atu i le fale puipui.
4 ‘Ua ō solo fo‘i ē na fa‘asalalauina, ma latou folafola atu le tala lelei o le ‘upu.
5 ‘Ua alu ifo fo‘i Filipo i le ‘a‘ai o Samaria, ‘ua tala‘i atu Keriso ‘iā te i latou.
6 ‘Ua naunau le motu o tagata ma le loto gatasi i ‘upu na fai atu e Filipo, ‘ua latou fa‘alogologo ma va‘ava‘ai i fa‘ailoga ‘ua faia e ia.
7 Auā ‘ua ō i fafo agaga leaga i tagata e to‘atele sa i ai, ‘ua ‘alalaga ma le leo tele; ‘ua fa‘amālōlōina fo‘i ē sa mama‘i i le supa ma pipili e to‘atele.
8 ‘Ua tele lava le ‘oli‘oli i lea ‘a‘ai.
9 A o le tasi tagata, o Simona le igoa, sa mua‘i fai togafiti fa‘ataulāitu i lea ‘a‘ai ‘ua fa‘atupu ai le ofo o le nu‘u o Samaria, ‘ua ia fa‘apea, o ia lava o le silisili.
10 ‘Ua naunau atu i latou uma lava ‘iā te ia, o tagatanu‘u ‘atoa ma ali‘i, ‘ua fa‘apea ane, “O le mana tele o le Atua lenei tagata.”
11 ‘Ua latou naunau ‘iā te ia, auā ‘ua leva ‘ona fa‘atupuina o le ofo ‘iā te i latou i ana togafiti fa‘ataulāitu.
12 ‘Ua talitonu i latou ‘iā Filipo o folafola le tala lelei i mea a le mālō o le Atua, ma le suafa o Iesu Keriso, ‘ona papatisoina lea o i latou, o tane ‘atoa ma fafine.
13 O Simona fo‘i, ‘ua talitonu ia; ‘ua papatisoina fo‘i o ia, ‘ona fa‘atasi atu lea o ia ‘iā Filipo, ‘ua matuā ofo, ‘ina o matamata i fa‘ailoga ma vāvega tele ‘ua faia.
14 ‘Ua fa‘alogo fo‘i le ‘au ‘aposetolo i Ierusalema, ‘ua talia e Samaria le afioga a le Atua, ‘ona latou ‘a‘auina atu lea o Peteru ma Ioane ‘iā te i latou.
15 ‘Ua ō mai fo‘i i lā‘ua, ‘ona tatalo lea mo i latou, ‘ina i‘a maua e i latou le Agaga Pa‘ia;
16 auā o ona po ia e le‘i afio ifo ai o ia i se tasi o i latou; ‘ua nā ‘ona papatisoina o i latou i le suafa o le Ali‘i o Iesu.
17 ‘Ona la fa‘ae‘e atu lea o lā‘ua lima ‘iā te i latou, ‘ona maua lea e i latou o le Agaga Pa‘ia.
18 ‘Ua va‘aia fo‘i e Simona, o le fa‘ae‘ega o lima o ‘aposetolo ‘ua foa‘i atu ai le Agaga Pa‘ia, ‘ona ‘aumai ai lea e ia o tupe ‘iā te i lā‘ua,
19 ‘ua fa‘apea mai, “‘Aumai ‘iā te a‘u fo‘i lenā pule, ‘ina ‘ia maua le Agaga Pa‘ia e le tagata ‘ou te fa‘ae‘e i ai o‘u lima.”
20 A ‘ua fai atu Peteru ‘iā te ia, “‘Ia fano lau ario fa‘atasi ma oe, auā ‘ua e manatu e fa‘atauina le mea foa‘i fua a le Atua i tupe.
21 E leai sau mea po o sou tofi i lenei mea; auā e le tonu lou loto i luma o le Atua.
22 O lenei, ia ē salamō i lou nei leaga, ma e fa‘atoga atu i le Atua, pe mafaia ‘ona fa‘amāgaloina le manatu o lou loto.
23 Auā ‘ua ‘ou iloa ‘ua e i ai i le āu ‘o‘ona, ma le taui e le amioleaga.”
24 ‘Ona tali atu lea o Simona, ‘ua fa‘apea atu, “Fa‘atoga ia ‘oulua i le Ali‘i mo a‘u, ‘ina ‘ia lē o‘o mai ‘iā te a‘u se mea e tasi o ia mea ‘ua ‘oulua fai mai ai.”
25 ‘Ua uma fo‘i lo lā‘ua molitino ma tautala atu i le afioga a le Ali‘i, ‘ona la toe fo‘i atu lea i Ierusalema, ‘ua folafola le tala lelei i ‘a‘ai e tele o Samaria.
26 ‘Ua fai mai fo‘i le agelu a le Ali‘i ‘iā Filipo, ‘ua fa‘apea mai, “‘Inā tu ia, ‘inā alu i le itū i saute, i le ala e alu ifo mai Ierusalema i Kasa; o le mea ‘ua tu‘ufua lea.”
27 ‘Ona tu lea o ia i luga, ‘ua alu fa‘auta fo‘i, o le tagata Aitiope, o le eunuka, o le ‘au‘auna sili a Kanake le tupu fafine o Aitiope, lē na tausi ana ‘oloa uma lava; na alu atu o ia i Ierusalema e tapua‘i ai.
28 ‘Ua toe fo‘i mai o ti‘eti‘e i lana ta‘avale, ma faitau i le perofeta o Isaia.
29 ‘Ua fai mai le Agaga ‘iā Filipo, “Fa‘alatalata atu ia, ma e fa‘atasi i lenā ta‘avale.”
30 ‘Ona momo‘e atu lea o Filipo, ‘ua fa‘alogo atu ‘iā te ia o faitau i le perofeta o Isaia, ‘ona fai atu lea o ia, “Po ‘ua e malamalama ‘ea i mea ‘ua e faitauina?”
31 ‘Ua fai mai o ia, “‘Ou te mafaia fa‘apefea, pe a lē fa‘asino mai e se tasi ‘iā te a‘u?” ‘Ua na fai mai fo‘i ‘iā Filipo ‘ia alu a‘e la te nonofo ma ia.
32 O le fuai‘upu fo‘i o le tusi ‘ua na faitau ai, o lenei,“Pei o le mamoe ‘ua ta‘ita‘iina ‘ia fasia;pei o le tama‘i mamoe fo‘i i luma o lē sele fulufulu,e lē tagi, e fa‘apea fo‘i o ia ‘ua lē tautala mai.
33 O ona po o lona fa‘amaulaloga na ‘ave‘esea ai lona fa‘amasinoga;O ai fo‘i sē na te talaina lana tupulaga?auā ‘ua ‘ave‘esea lona ola i le lalolagi.”
34 ‘Ua fai mai o le eunuka ‘iā Filipo, ‘ua fa‘apea mai, “Se‘i ‘ou fesili atu ‘iā te oe, ‘ua fai mai lenei mea e le perofeta ‘iā te ai? ‘Iā te ia ‘ea, po o se tasi tagata?”
35 ‘Ona tautala atu lea o Filipo, ‘ua āfua i lea lava Tusi ‘ona folafola ‘iā te ia o le tala lelei ‘iā Iesu.
36 ‘Ua ō ane fo‘i i lā‘ua i le ala, ‘ua o‘o i le tasi vai; ‘ona fai mai lea o le eunuka, “Fa‘auta, o le vai; se a ‘ea se mea e vaoia ai a‘u e ‘aua le papatisoina o a‘u?”
37 ‘Ua fai atu Filipo, “‘Āfai ‘ua e talitonu ma le loto ‘atoa, e mafai nei lava.”‘Ua tali mai o ia, ‘ua fa‘apea mai, “‘Ou te talitonu o Iesu Keriso o le Alo o le Atua ia.”
38 ‘Ona ia fai atu lea ‘ia tāofi le ta‘avale ‘ona ō ifo lea o i lā‘ua uma i le vai, o Filipo ma le eunuka; ‘ua na papatiso fo‘i ‘iā te ia.
39 ‘Ua ō a‘e i lā‘ua nai le vai, ‘ona segia lea o Filipo e le Agaga o le Ali‘i; ‘ua lē toe iloa e le eunuka, ‘ua alu fo‘i o ia i lana malaga ma le ‘oli‘oli.
40 A ‘ua iloa Filipo i Asota; ‘ua alu fo‘i o ia, ma folafola solo le tala lelei i ‘a‘ai uma lava, ‘ua o‘o lava o ia i Kaisareia.