1 ‘Ua mavae atu ia mea, ‘ona tu‘ua lea e ia o Atenai, ‘ae alu atu i Korinito;
2 ‘ua na iloa fo‘i le tasi tagata Iutaia, o Akula le igoa, na fānau i Pono, na se‘i sau mai Italia ma lana avā o Pisila; auā na poloa‘i mai e Kalaotio ‘ia ō ‘ese atu i Roma tagata Iutaia uma lava; ‘ua alu atu o ia ‘iā te i lā‘ua;
3 ‘ona ‘ua tasi fo‘i lo latou faiva, ‘ua nofo o ia ‘iā te i lā‘ua, ma galue; auā o lo latou faiva le fai fale ‘ie.
4 ‘Ua lauga fo‘i o ia i le sunako i lea sapati ma lea sapati, ma pulunaunau atu ‘iā Iutaia ‘atoa ma Eleni.
5 A ‘ua ō mai Sila ma Timoteo mai Maketonia, ‘ona tinoū lea o le loto o Paulo, ‘ua ta‘utino atu i tagata Iutaia o Iesu o le Keriso lea.
6 ‘Ua fa‘atu‘i‘ese mai i latou ma ‘upu leaga, ‘ona lūlū atu lea e ia o ona ‘ofu, ‘ua fai atu ‘iā te i latou, “O lo ‘outou na toto e i luga o ‘outou ulu lea; ‘ou te mamā; e āfua i le aso nei ‘ona ‘ou alu i nu‘u ‘ese.”
7 ‘Ona alu atu ai lea o ia, ‘ua ulu atu i le fale o le tasi tagata e mata‘u i le Atua o Iuso le igoa, ‘ua so‘o ane i le sunako lona fale.
8 O Kiripo fo‘i le pule i le sunako, ‘ua fa‘atuatua i le Ali‘i, o ia ma lona ‘āiga uma; e to‘atele fo‘i tagata Korinito o ē na fa‘alogo ‘ua fa‘atuatua i latou, ma ‘ua papatisoina.
9 ‘Ona fetalai mai lea o le Ali‘i ‘iā Paulo i le fa‘aaliga i le po, “‘Aua ‘e te fefe, a ‘ia e tautala atu, ‘aua le fa‘alologo;
10 auā ‘ou te ‘iā te oe, e leai fo‘i se tasi e oso mai ‘iā te oe e, fa‘asauā ‘iā te oe; auā e to‘atele o‘u tagata o i lenei ‘a‘ai.”
11 ‘Ua ia nofo atu ai pea o le tausaga ‘atoa ma masina e ono, ‘ua a‘oa‘o atu ‘iā te i latou i le afioga a le Atua.
12 ‘Ua fai Kaliona ma suikonesula i Akaia, ‘ona feosofi mai lea o Iutaia ‘iā Paulo ma le loto gatasi, ‘ua ta‘ita‘i i latou ‘iā te ia i le nofoa fa‘amasino,
13 ‘ua fa‘apea ane, “‘Ua ole lenei tamaloa i tagata ia tapua‘i i le Atua ma le lē tusa i le tulafono.”
14 O le a o‘o atu le lauga a Paulo, a ‘ua fai mai Kaliona i tagata Iutaia, “Iutaia e, ‘āfai o se sauā, po o se ulavale leaga, e tatau ‘ona ‘ou usiusita‘i ‘iā te ‘outou;
15 peita‘i ‘āfai o se su‘ega i se matā‘upu, ma igoa, ma la ‘outou tulafono, faitalia lava ‘outou; auā ‘ou te lē mafai ‘ona fai a‘u ma fa‘amasino i na mea.”
16 ‘Ona tuli atu lea o ia ‘iā te i latou i le nofoa fa‘amasino.
17 ‘Ona pu‘e lea e i latou uma lava ‘iā Sosene lē pule i le sunako, ‘ua fasi ‘iā te ia i luma o le nofoa fa‘amasino. A ‘ua lē manatu e Kaliona i se tasi mea o ia mea.
18 ‘Ua nofo pea Paulo i aso e tele, ‘ona fa‘amāvae atu lea o ia i le ‘au uso, ‘ua latou folau atu i Suria, o i latou ma Pisila ma Akula; ‘ua na sele mamā lona lauulu i Kenikerea; auā ‘ua na fai lana tautoga.
19 ‘Ua o‘o i gātai o Efeso, ‘ona tu‘ua lea e ia o i lā‘ua i lea mea; a ‘ua ulufale o ia i le sunako, ma felafolafoa‘i ma Iutaia.
20 ‘Ua ‘ai‘oi i latou ‘iā te ia ‘ia toe nofo i nai ona aso ma i latou; ‘ua lē mafai o ia.
21 A ‘ua fa‘amāvae o ia ‘iā te i latou, ‘ua fa‘apea atu, “‘Ou te toe fo‘i mai ‘iā te ‘outou, pe ā finagalo i ai le Atua.” ‘Ona tu‘uva‘a atu lea o ia i Efeso.
22 ‘Ua o‘o atu i Kaisareia, ‘ua alu a‘e ma alofa atu i le ekalesia, ‘ona alu ifo lea o ia i Anetioka.
23 ‘Ua fai po fo‘i, ‘ona alu atu lea o ia, ‘ua alu solo i nu‘u o Kalatia ma Ferukia, ‘ua fa‘amalosia e ia le ‘au so‘o uma.
24 ‘Ua sau fo‘i i Efeso le tasi tagata Iutaia, o Apolo le igoa, o Alesania na fānau ai, o le tagata mau ‘upu, ma le poto i Tusi.
25 ‘Ua a‘oa‘oina lenei tagata i le ala o le Ali‘i; ‘ua malosi fo‘i lona loto, ‘ua tautala atu ia ma matuā a‘oa‘o atu ma le sa‘o i mea e uiga ‘iā Iesu, na o le papatisoga a Ioane ‘ua iloa e ia.
26 ‘Ua āfua fo‘i ‘ona tautala fa‘amalosi o ia i le sunako; ‘ua fa‘alogo atu Akula ma Pisila ‘iā te ia, ‘ona la ‘ave lea ‘iā te ia, ma fa‘amatala atu atili le ala o le Atua ‘iā te ia.
27 ‘Ua loto o ia e alu atu i Akaia, ‘ona tusi atu lea o le ‘au uso, ma ‘ai‘oi atu i le ‘au so‘o ‘ia talia mai o ia; ‘ua o‘o fo‘i o ia, ‘ona fesoasoani tele lea o ia i ē na fa‘atuatua ‘ona o le alofa tunoa.
28 Auā na finau māua‘i o ia i tagata Iutaia ma le fa‘amalosi i luma o le nu‘u, ē ‘ua fa‘asino atu i Tusi, o Iesu o le Keriso lea.