1 “Sema e, le ‘au uso e, ma tamā, o fa‘afofoga mai ia i la‘u nei tali atu ‘iā te ‘outou.”
2 ‘Ua fa‘alogo i latou o lo‘o tautala mai o ia ‘iā te i latou i le ‘upu Eperu, ‘ona atili ai lea ‘ona lologo o i latou; ‘ona fai atu lea o ia:
3 “O a‘u lava o le tagata Iutaia, na fānau i Taso i Kilikia, na tausia, a‘u i lenei ‘a‘ai, ‘ua a‘oa‘oina i le a‘oga a Kamalielu i le tonu o le tulafono a o tatou tamā, sa ‘ou mā‘elegā i la le Atua, pei o ‘outou uma lava i lenei aso.
4 Na ‘ou sauā atu i lenei lotu ‘ina ‘ia oti i latou, sa ‘ou fusifusia ma tu‘uina atu i fale puipui o tane ‘atoa ma fafine;
5 pei ‘ona molimau mai fo‘i ‘iā te a‘u nei e le ositaulaga sili, ‘atoa ma toeaina uma; sa ‘ou maua mai ai fo‘i tusi i le ‘au uso, ma ‘ou alu atu i Tamaseko e fusifusi i ē o i ai, ma ta‘ita‘i mai ‘iā te i latou i Ierusalema ‘ina ‘ia fa‘asalaina i latou.
6 “‘Ua ‘ou alu a‘u, ma ‘ua latalata i Tamaseko, o le tutonu o le lā ‘ua fa‘afuase‘i ai ‘ona pupula fa‘ata‘ali‘oli‘o mai ‘iā te a‘u o le malamalama tele mai le lagi.
7 ‘Ona ‘ou pa‘ū lea i lalo i le ‘ele‘ele, ma ‘ou fa‘alogo atu i le si‘ufofoga, ‘ua fa‘apea mai ‘iā te a‘u, ‘Saulo, Saulo e, se a le mea ‘ua e sauā mai ai ‘iā te a‘u?’
8 ‘Ona ‘ou tali atu lea, ‘Le Ali‘i e, o ai ‘ea oe?’ ‘Ua fetalai mai o ia ‘iā te a‘u, ‘O a‘u lava o Iesu le Nasareta, ‘ua e sauā mai i ai.’
9 ‘Ua iloa lava e i latou sa ‘iā te a‘u le malamalama, ‘ua matata‘u ai; a ‘ua lē lagona e i latou le si‘ufofoga o lē na fetalai mai ‘iā te a‘u.
10 ‘Ona ‘ou fai atu lea, ‘Le Ali‘i e, se a le mea ‘ou te faia?’ ‘Ona fetalai mai lea o le Ali‘i ‘iā te a‘u, ‘Tula‘i ia oe, ‘inā alu i Tamaseko, e ta‘uina atu ai ‘iā te oe o mea uma lava ‘ua tofia ‘iā te oe ‘e te faia.’
11 ‘Ua ‘ou lē toe va‘ai ‘ona o le pupula o lea malamalama; ‘ona ta‘ita‘iina ai lea o a‘u e i latou sa ‘iā te a‘u, ‘ua ‘ou o‘o atu i Tamaseko.
12 “O le tasi tagata, o Anania, o le tagata amio Atua e tusa ma le tulafono, ma ‘ua ta‘uleleia e Iutaia uma ‘ua mau ai,
13 ‘ua sau o ia ‘iā te a‘u, ‘ua tu mai ma fa‘apea mai, ‘Lo‘u uso e, Saulo, ‘inā toe va‘ai ia.’ ‘Ona ‘ou va‘ai atu lea ‘iā te ia i lea lava itū aso.
14 Na fai mai fo‘i o ia, ‘‘Ua tofia oe e le Atua o tatou tamā, ‘ia e iloa lona finagalo ma e va‘aia Lē Amiotonu ma ia ē fa‘alogo atu i lona si‘ufofoga.
15 Auā e fai oe māna molimau i tagata uma lava i ia mea na e va‘aia ma e fa‘alogo i ai.
16 O lenei fo‘i, se a le mea ‘e te fa‘atuai ai? Tula‘i ia ma ia papatisoina oe, ma ia fufulu‘eseina au agasala i lou vala‘au i le suafa o le Ali‘i.’
17 “Na ‘ou fo‘i atu i Ierusalema, sa ‘ou tatalo i le malumalu ‘ona fa‘aalia mai ai lea ‘iā te a‘u;
18 na ‘ou iloa atu o ia ‘ua fetalai mai ‘iā te a‘u, ‘‘Ia vave, ma e ta‘alise alu ‘ese i Ierusalema, auā latou te lē talia lau molimau ‘iā te a‘u.’
19 ‘Ona ‘ou fai atu lea, ‘Le Ali‘i e, ‘ua iloa lava e i latou sa ‘ou masani ‘ina tu‘u i fale puipui ma sasa i lea sunako ma lea sunako i ē fa‘atuatua ‘iā te oe;
20 sa maligi fo‘i le toto o lau molimau o Setefano, sa tu ai fo‘i a‘u, ma loto gatasi i lona fasiga, sa ‘ou leoleo fo‘i i ‘ofu o ē na fasioti ‘iā te ia.’
21 ‘Ona fetalai mai lea o ia ‘iā te a‘u, ‘Alu atu ia; auā o a‘u, ‘ou te ‘auina atu oe i nu‘u ‘ese e mamao.’”
22 ‘Ua fa‘alogo mai i latou ‘iā te ia ‘ua o‘o i lenā ‘upu ‘ona ‘alalaga mai lea o i latou, ‘ua fa‘apea mai, “‘Ave ‘ese ia lenā tamaloa i le lalolagi; auā e lē tatau ‘ona ola o ia.”
23 O latou o pisapisaō, ma lafo i lalo o latou ‘ofu, ma la‘u a‘e le efuefu i luga,
24 ‘ua fai atu le ali‘i e pule i ‘au ia ‘ave ‘iā te ia i le ‘olo, ‘ua fai atu fo‘i ia ‘ino‘ino ‘iā te ia ma sasa, ‘ina ‘ia iloa e ia le mea ‘ua latou ‘alalaga mai ai fa‘apea ‘iā te ia.
25 ‘Ua noanoa ‘iā te ia i fusi, ‘ona fai atu lea o Paulo i le ta‘ita‘i o le to‘aselau o lē na tu mai, “E lē ‘ua sa ‘ea ‘iā te ‘outou ‘ona sasa le tagata Roma ‘ua lē fa‘asalaina?”
26 ‘Ua fa‘alogo atu le ta‘ita‘i o le to‘aselau, ‘ona alu lea o ia ma ta‘u atu i le ali‘i e pule i ‘au, ‘ua fa‘apea atu, “‘Ia oe i le mea a e faia; auā o le tagata Roma lenā.”
27 ‘Ona sau ai lea o le ali‘i e Pule i ‘au, ‘ua fa‘apea mai ‘iā te ia, “Fai mai ‘iā te a‘u, o le Roma ‘ea oe?”‘Ua fai atu o ia, “O lea lava.”
28 ‘Ona tali mai lea o le ali‘i a pule i ‘au, “E tele tupe na fa‘atau a‘i a a‘u ‘ina ‘ia faia a‘u ma tagata o lea nu‘u.”A ‘ua fai atu a Paulo, “O a‘u na fānau ai.”
29 ‘Ona ō ‘ese loa lea ‘iā te ia o ē na fai a ‘ino‘ino ‘iā te ia; na fefe fo‘i le ali‘i e pule i ‘au, ‘ina ‘ua iloa o le Roma o ia, ma ‘ua na noanoa ‘iā te ia.
30 O le taeao ‘ua fia iloa ai le fa‘amaoni o le mea na molia ai o ia e Iutaia, ‘ona tatala lea o ia o ona noanoaga, ma poloa‘i atu i ositaulaga sili ma la latou fono uma ia ō mai; ‘ona ta‘ita‘i ifo lea o ia ‘iā Paulo, ma tu‘u atu ‘iā te ia i o latou luma.