1 O ona po na i ai Apolo i Korinito, ‘ua tuana‘i ai e Paulo nu‘u maualuluga, ‘ona o‘o lea i Efeso; ‘ua na iloa ai isi so‘o,
2 ‘ona fai atu lea o ia ‘iā te i latou, “Na maua ‘ea e ‘outou le Agaga Pa‘ia ‘ina ‘ua ‘outou fa‘atuatua?”‘Ua fai mai i latou ‘iā te ia, “Leai, matou te le‘i fa‘alogo lava pe i ai se Agaga Pa‘ia.”
3 ‘Ona fai atu lea o ia ‘iā te i latou, “Pe na papatisoina ‘outou i le a?”‘Ua fai mai i latou, “O le papatisoga a Ioane.”
4 ‘Ona fai atu lea o Paulo, “Na papatiso lava Ioane i le papatisoga o le salamō, ‘ua fai atu i le nu‘u, ‘ia fa‘atuatua i latou i lē mulimuli mai, o Iesu lea.”
5 ‘Ua fa‘alogo ai i latou, ‘ona papatisoina lea i le suafa o le Ali‘i o Iesu.
6 ‘Ua fa‘ae‘e atu fo‘i e Paulo ona lima ‘iā te i latou, ‘ona o‘o lea o le Agaga Pa‘ia ‘iā te i latou; ‘ona tautala lea i gagana ‘ese‘ese, ma perofeta ane i latou.
7 O ia tagata uma, pe to‘asefulu ma le to‘alua i latou.
8 ‘Ua ulufale fo‘i o ia i le sunako ma lauga fa‘amalosi atu, ma tautalatala, ma fa‘aoleole ‘iā i latou i mea a le mālō o le Atua, i masina e tolu.
9 A ‘ua loto ma‘a‘a nisi, ma ‘ua lē talitonu, o ‘upu leaga mai i le Ala i luma o le to‘atele; ‘ona alu ‘ese lea o ia ‘iā te i latou, ma ‘ua vavae ‘ese le ‘au so‘o, ‘ua tautalatala o ia i lea aso ma lea aso i le fale a‘oga o le tasi tagata e igoa ‘iā Turano.
10 E lua tausaga na faia lenei mea; o lea na fa‘alogo ai i le afioga a le Ali‘i o Iesu o i latou uma lava ē ‘ua nonofo i Asia, o Iutaia ‘atoa ma Eleni.
11 ‘Ua faia fo‘i e le Atua vāvega sili i lima o Paulo;
12 o lea ‘ua ‘avea ai solosolo po o ‘ie tali ‘ele‘ele nai lona tino i ē mama‘i, ‘ona mavae ai lea o latou ma‘i, ‘ua ō i fafo fo‘i ‘iā te i latou agaga leaga.
13 ‘Ona fa‘amalosi lea o i si o le ‘au taulāitu Iutaia, o ē na feoa‘i, ‘ua latou ta‘u atu le suafa o le Ali‘i o Iesu i luga i ē na i ai agaga leaga, ‘ua fa‘apea atu, “Matou te matuā fai atu ‘iā te ‘outou i le suafa o Iesu, o lē ‘ua tala‘iina e Paulo.”
14 ‘Ua faia fo‘i lenei mea e nisi tagata o atali‘i e to‘afitu o Seva, o le Iutaia, o le ositaulaga sili.
15 A ‘ua tali mai le agaga leaga, ‘ua fa‘apea mai, “‘Ua ‘ou iloa Iesu, ‘ua ‘ou iloa fo‘i Paulo, a o ai ‘ea ‘outou nā?”
16 ‘Ona oso mai ai lea o le tagata ‘ua i ai le agaga leaga, ‘ua manumālō ‘iā i latou, ‘ua faia‘ina lava i latou ‘iā te ia; ‘ona sōsōla ai lea o i latou i fafo o le fale ‘ua lē lavalavā ma ‘ua manunu‘a.
17 ‘Ua iloa lenei mea e i latou uma lava ē ‘ua nonofo i Efeso, o Iutaia ‘atoa ma Eleni; ‘ona o‘o lea o le mata‘u ‘iā te i latou uma lava, ‘ua vi‘ia fo‘i le suafa o le Ali‘i o Iesu.
18 ‘Ua ō mai fo‘i i latou e to‘atele o ē ‘ua fa‘atuatua, ma fa‘aali mai ma ta‘u mai a latou amio.
19 E to‘atele fo‘i o ē na fai togafiti fa‘ataulāitu na fa‘apotopoto e i latou a latou tusi, ma susunu ai i luma o tagata uma; ‘ona latou faitau lea ‘iā latou fa‘atusa, ‘ua iloa ai ‘ua lima sefulu o afe o tupe ario.
20 O lea ‘ua matuā tupu tele ai ma ‘ua manumālō le afioga a le Ali‘i.
21 ‘Ua mavae ia mea, ‘ona tu‘u lea e Paulo i lona loto, a uma ‘ona ui ane i Maketonia ma Akaia, e alu i Ierusalema, ‘ua fa‘apea o ia, “A mavae ‘ona ‘ou i ai, e tatau ‘ona ‘ou asiasi i Roma.”
22 ‘Ona ‘a‘auina atu lea e ia i Maketonia o tagata e to‘alua o ē na ‘au‘auna ‘iā te ia, o Timoteo ma Erato, a o ia ‘ua nofo i Asia.
23 O ona po ia ‘ua tupu ai le fa‘anunununu tele ‘ona o le Ala.
24 Auā o le tasi tagata, o Temetiu le igoa, o le fai mea ario, lē na fai malumalu ario o Tiana, ma ‘ua maua ai le ‘oloa tele mo tufuga;
25 ‘ua fa‘apotopoto e ia i‘a te i latou, ‘atoa ma le ‘au faigaluega i mea fa‘apenā, ‘ua fai atu, “Soma e, ‘ua ‘outou iloa o lenei faiva ‘ua, tatou tamao‘āiga ai;
26 ‘ua ‘outou iloa fo‘i ma ‘outou fa‘alogo e lē gata i Efeso, a ‘ua tāli so‘o Asia uma lava ‘ona fa‘aliliu‘eseina ai e lenā Paulo le vao tagata e to‘atele i lona ole, ‘ua fa‘apea atu, e lē ni atua e ‘ua faia e lima.
27 E lē gata ‘ona māumau o lo tatou nei faiva, o le a tu‘ulafoa‘iina, e peita‘i e ta‘ulēaogāina fo‘i le malumalu o le atua fafine silisili o Tiana, o le a fa‘aumatia fo‘i lona mamalu, o lo‘o tapua‘i i ai Asia uma lava ‘atoa ma le lalolagi uma.”
28 ‘Ua fa‘alogo i latou, ‘ona tūtūmu ai lea o i latou i le felili ‘ua ‘alalaga, ma fa‘apea atu, “E silisili Tiana o Efeso.”
29 ‘Ua matuā lolofi mai le ‘a‘ai ‘atoa, ‘ua pupu‘e atu fo‘i ‘iā Kaio ma Aritako, tagata Maketonia, o tagata o le malaga a Paulo, ‘ona feosofi lea o i latou ma le loto gatasi i le fale mata‘aga.
30 ‘Ua fia ulufale atu Paulo i le nu‘u, a ‘ua lē mafafai le ‘au so‘o.
31 O isi ali‘i fo‘i o Asia o ē na alofa ‘iā te ia, na latou ‘a‘au atu nisi ‘iā te ia e ole atu, ‘aua le fa‘amalosi ‘ona alu i le fale mata‘aga.
32 ‘Ua ‘alalaga nisi i le tasi mea, ma nisi i le tasi mea; auā ‘ua so‘ona vevesi le fa‘apotopotoga; ‘ua lē iloa fo‘i e le to‘atele le mea na potopoto ai i latou.
33 ‘Ua fa‘atū atu fo‘i e i latou ‘iā Alesana nai le motu o tagata, ‘ina ‘ua tu‘uina atu o ia e Iutaia. ‘Ona tālo atu lea o Alesana lona lima, ‘ua na fia fa‘atonu atu i le nu‘u.
34 ‘Ua iloa e i latou o le Iutaia o ia, ‘ona tasi ai lea o latou leo uma lava, pe lua itūlā na ‘alalaga ai i latou, “‘Ua silisili Tiana o Efeso.”
35 ‘Ua fa‘afifilemūina le motu o tagata e le tusi‘upu, ‘ona fai atu lea o ia, “Sema e, o ‘outou Efeso e, o ai lea tagata e lē iloa o lo‘o ‘au‘auna lenei ‘a‘ai o Efeso i le malumalu o le atua fafine silisili o Tiana, ma le tupua na pa‘ū ifo mai le lagi?
36 O lenei, ‘ona ‘ua lē mafai ‘ona ‘upu‘eseina o nei mea, e tusa ‘ona ‘outou nonofo sa‘o, ma ia ‘aua le so‘ona fai se mea.
37 Auā ‘ua ta‘ita‘i mai e ‘outou nei tagata, e le ni e fao i mea sa pe ‘upu leaga i latou i lo ‘outou atua fafine.
38 O lenei, ‘āfai ‘ua ‘iā Temetiu ma lana ‘au tufuga se mau i se tasi, ‘ua tu‘u aso e fai ai fa‘amasinoga, ‘ua i ai fo‘i suikonesula; ia momoli ai le tasi i le tasi.
39 Peita‘i ane, ‘āfai tou te su‘e i nisi mea, e fa‘atonuina lea i le fono e tala‘iina.
40 Auā ne‘i molia i tatou ‘ona o le ta‘alili vale i lenei aso, ‘ina ‘ua leai lava sa tatou ‘upu e mafai ‘ona tatou fa‘atonu atu ai lenei nunu vale.”
41 ‘Ua uma atu ia ‘upu, ‘ona fa‘atū‘ua lea e ia o le fa‘apotopotoga.