4 Sa fa‘apotopoto fo‘i o i latou ma ia, ‘ona fetalai atu lea o ia ‘iā te i latou, “‘Aua le tu‘ua Ierusalema, a ‘ia fa‘atali i le mea na folafolaina e le Tamā, ‘ua ‘outou fa‘alogo ai ‘iā te a‘u.
5 Auā na papatiso lava Ioane i le vai; a o ‘outou, e papatisoina ‘outou i le Agaga Pa‘ia e lē tele ni aso e vā a‘i.”
6 ‘Ua potopoto i latou, ‘ona latou fesili ai lea ‘iā te ia, ‘ua fa‘apea mai, “Le Ali‘i e, o ona po nei ‘ea ‘e te toe fuata‘i mai ai le mālō ‘iā Isaraelu?”
7 A ‘ua fetalai atu o ia ‘iā te i latou, “E lē tusa ‘ona ‘outou iloa o ona po ma ona tausaga ‘ua tu‘u ai e le Tamā i lana lava pule.
8 ‘Ae peita‘i o le a maua e ‘outou le mana, pe ā afio ifo le Agaga Pa‘ia i luga ‘iā te ‘outou; e fai fo‘i ‘outou ma molimau ‘iā te a‘u i Ierusalema ma Iutaia uma lava, ma Samaria, e o‘o lava i le tulu‘iga o le lalolagi.”
9 ‘Ua fetalai atu o ia i ia mea, ‘ona si‘itia lea o ia, a o latou o va‘ava‘ai atu; ‘ua ‘avea fo‘i o ia i le ao nai o latou luma.
10 ‘Ua latou tulimata‘i a‘e i le lagi, a o afio a‘e o ia, fa‘auta fo‘i, o tagata e to‘alua ‘ua tutū mai ‘iā te i latou ma ‘ofu sisina.