1 Nofoaiga a Tupu

O le Mamalu o Tavita i Ierusalema

¹‘Ua ‘a‘auina mai e Hiramo le tupu o Turo le sāvali ‘iā Tavita, ‘ua avatu fo‘i la‘au o arasi ma tufuga ati fale ma tufuga, ‘ina ‘ia fai a‘i se fale mōna. ²‘Ona iloa ai lea e Tavita ‘ua fa‘atumauina o ia e le ALI‘I e fai ma tupu ‘iā Isaraelu, auā ‘ua fa‘amaualugaina lona mālō ‘ona o lona nu‘u o Isaraelu. ³‘Ua toe fai isi avā e Tavita i Ierusalema ma ‘ua toe fānau atali‘i ma afafine o Tavita. ⁴O igoa nei o fānau o ē na fānaua ‘iā te ia i Ierusalema, o Samua ma Sopapa ma Natano ma Solomona, ⁵ma Ivara ma Elisua ma Elefaleta, ⁶ma Nokaa ma Nefeku ma Iafia, ⁷o Elisama ma Peliata ma Elifaleta.

O le Manumālō ‘iā Filisitia

⁸‘Ua fa‘alogo Filisitia ‘ua fa‘au‘uina Tavita e fai ma tupu ‘iā Isaraelu uma, ‘ona ō a‘e ai lea o Filisitia uma e sā‘ili ‘iā Tavita. ‘Ua lagona fo‘i e Tavita, ‘ona alu atu ai lea ‘iā te i latou. ⁹‘Ua ō atu fo‘i Filisitia ma ‘ua salalau i latou i le vanu o sa Rafā. ¹⁰‘Ona fesili atu lea o Tavita i le Atua, ‘ua fa‘apea atu, “‘Ou te alu a‘e ‘ea e tau ma Filisitia? Pe ‘e te tu‘uina mai i latou i lo‘u lima?”‘Ona fa‘apea mai ai lea o le ALI‘I ‘iā te ia, “‘Inā alu a‘e ia, auā ‘ou te tu‘uina atu i latou i lou lima.” ¹¹‘Ua latou ō atu i Paala-faresa, ‘ona fafasi lea o Tavita ‘iā te i latou i lea mea; ‘ona fa‘apea mai ai lea o Tavita, “‘Ua osofia e le Atua i lo‘u lima o i latou e faia a‘u ma fili, e pei ‘ona oso mai o le vai.” O le mea lea ‘ua latou fa‘aigoa ai lea mea, O Paala-faresa. ¹²‘Ua latou tu‘ulafoa‘i o latou atua i lea mea; ‘ua fai atu ai Tavita, ‘ona latou susunuina ai lea i le afi. ¹³‘Ua toe fa‘apotopoto fo‘i Filisitia ma salalau i latou i le vanu. ¹⁴‘Ua toe fesili atu Tavita i le Atua; ‘ona fa‘apea mai lea o le Atua ‘iā te ia, “‘Aua ‘e te mulimuli atu ‘iā te i latou, ‘ia fa‘ata‘amilo ‘iā te i latou ma e alu atu ‘iā te i latou i tala ane o la‘au o peka. ¹⁵A ē fa‘alogologo i le pāūū o le savali mai i tumutumu o la‘au o peka, ‘ona e alu atu ai lea e tau le tau‘a; auā ‘ua muamua atu le Atua i ou luma e fasi i le itūtau‘a a Filisitia.” ¹⁶‘Ona faia lea e Tavita, e pei ‘ona fetalai mai ai o le Atua ‘iā te ia. ‘Ua latou fasia le itūtau‘a a Filisitia, e āfua i Kipeona e o‘o atu i Kasera. ¹⁷‘Ua o‘o atu le logo o Tavita i nu‘u uma; ‘ua tu‘u fo‘i e le ALI‘I i nu‘u uma ‘ia matata‘u ‘iā te ia.#