1 Nofoaiga a Tupu

O le Fa‘afetai ‘ina ‘ua ‘Aumaia le ‘Atola‘au i le ‘A‘ai a Tavita

¹‘Ua latou ‘aumaia le ‘atola‘au a le Atua ma ‘ua tu‘u ai i totonu o le fale ‘ie na faia e Tavita mo le ‘atola‘au; ‘ona latou osia ai lea o taulaga mū ma taulaga fa‘afetai i luma o le Atua. ²‘Ua uma ‘ona fai taulaga mū ma taulaga fa‘afetai e Tavita, ‘ona fa‘amanuia ai lea e ia o le nu‘u i le suafa o le ALI‘I. ³‘Ua tufatufa atu e ia i tagata ta‘ito‘atasi uma o Isaraelu, o tane ma fafine, ta‘ito‘atasi ma le pōtoi areto ma le ipu uaina ma le areto suamalie. ⁴‘Ua tofia e ia nisi o sa Levī e ‘au‘auna i luma o le ‘atola‘au a le ALI‘I e fa‘amanatunatu ai ma fa‘afetai, ma vivi‘i i le ALI‘I le Atua o Isaraelu; ⁵o Asafo o le sili, e aupito ane i ai o Sakaria, o Ieielu ma Semiramota ma Ikielu ma Matitia ma Eliapo ma Penaia ma Opete-etoma; o Ieielu fo‘i na i ai napeli ma kitara, a o Asafo ‘ua fa‘atagitagi i sumepalo. ⁶O Penaia ma Iaaseelu o ositaulaga na i ai pū, e tumau pea i luma o le ‘atola‘au o le feagaiga a le Atua. ⁷O lenā lava aso na fa‘ato‘ā tu‘uina atu ai e Tavita i le lima o Asafo ma ona uso, o lenei salāmo e fa‘afetai atu ai i le ALI‘I.

O le Pese Fa‘afetai

⁸Vivi‘i atu ia ‘outou i le ALI‘I,vala‘au atu ia i lona suafa;‘ia ‘outou fa‘ailoa atu i nu‘u o ana mea na fai. ⁹‘Ia pepese ‘outou ‘iā te ia,‘ia ‘outou fai pesega ‘iā te ia;talatala atu ia ‘outou i ona vāvega uma lava. ¹⁰‘Ia ‘outou mitamita i lona suafa pa‘ia;‘ia ‘oli‘oli loto o ē sā‘ili‘ili i le ALI‘I. ¹¹Sā‘ili ia ‘outou i le ALI‘I ma lona malosi;sā‘ili‘ili ‘iā te ia, ‘aua le aunoa. ¹²Fa‘amanatu ‘iā ‘outou i ana mea mamana na ia faia,o ona vāvega, ‘atoa ma fa‘amasinoga a lona fofoga. ¹³O ‘outou le fānauga a lana ‘au‘auna o Isaraelu,o atali‘i o Iakopo na ia filifilia. ¹⁴O ia lava o le ALI‘I lo tatou Atua;o i le lalolagi uma lava ana fa‘amasinoga. ¹⁵‘Ia fa‘amanatuina e ‘outou e fa‘avavau o lana feagaiga,o le ‘upu na ia poloa‘i mai i tupulaga e afe. ¹⁶O le feagaiga sa la osia ma Aperaamo,ma lana tautoga ‘iā Isaako. ¹⁷Na ia fa‘amauina fo‘i ‘iā Iakopo e fai ma tulafono,o le feagaiga e fa‘avavau mo Isaraelu. ¹⁸Na fa‘apea atu ‘iā te ia,“‘Ou te avatu ‘iā te oe le lau‘ele‘ele o Kanana,o le vaega lea o lo ‘outou tofi.” ¹⁹A o to‘aitiiti ‘outou, e to‘aitiiti lava,mōna o tagata ‘ese i lea mea. ²⁰Na feoa‘i fo‘i i latou i lea nu‘u ma lea nu‘u,nai le tasi fo‘i itū mālō i le tasi nu‘u. ²¹‘Ua lē tu‘ua e ia ‘ia fa‘asauā se tasi ‘iā i latou;na ia a‘oa‘i atu fo‘i i tupu ‘ona o i latou. ²²‘Ua fa‘apea atu i ai,“‘Aua le tago i ē ‘ua ‘ou fa‘au‘uina;‘aua fo‘i le agaleaga atu i a‘u perofeta.” ²³‘Ia ‘outou pepese atu i le ALI‘I le lalolagi uma;‘ia ‘outou tala‘i atu lana fa‘aolataga i lea aso ma lea aso. ²⁴‘Ia ‘outou ta‘uta‘u atu lona mamalu i nu‘u ‘ese,ma ona vāvega i nu‘u uma lava. ²⁵Auā e silisili le ALI‘I,e tusa ‘ona matuā vi‘ia o ia;e sili fo‘i ‘ona mata‘utia o ia i atua uma. ²⁶Auā o atua uma o nu‘u o tupua lava ia;a o le ALI‘I na ia faia le lagi. ²⁷O lo‘o i ona luma le vi‘iga ma le matagofie;o lo‘o i lona afio‘aga le malosi ma le fiafia. ²⁸‘Outou o itū‘āiga o le nu‘u,‘ia ‘outou avatua i le ALI‘I,‘ia avatua i le ALI‘I le vi‘iga ma le malosi. ²⁹‘Ia ‘outou avatua i le ALI‘I le vi‘iga o lona suafa;‘ia ‘outou avatu taulaga ma ‘outou ō atu i ona luma,‘ia ‘outou ifo atu i le ALI‘I i le malumalu e matagofie. ³⁰‘Ia ‘outou gatete i ona luma le lalolagi uma;e fa‘atumauina lava le lalolagi ne‘i fa‘agae‘etia. ³¹‘Ia fiafia le lagi, ‘ia ‘oli‘oli fo‘i le lalolagi,‘ia ‘outou fai atu i nu‘u ‘ese, “O le ALI‘I o le tupu lava ia.” ³²‘Ia ta‘alili mai le sami ma mea ‘ua tumu ai;‘ia fiafia le lau‘ele‘ele ma mea uma o i ai. ³³‘Ona ‘alalaga fiafia ai lea o la‘au o i le vao matua i luma o le ALI‘I,auā o lo‘o afio mai e fa‘amasino le lalolagi. ³⁴Vivi‘i atu ‘outou i le ALI‘I; auā e lelei lava o ia;auā e fa‘avavau lava lona alofa. ³⁵‘Ia ‘outou fa‘apea atu:“Le Atua o lo matou fa‘aolataga e,‘ia e fa‘aola mai ma fa‘apotopotoina i matou,ma lavea‘i ‘iā i matou a‘i nu‘u ‘ese,‘ina ‘ia matou vivi‘i i lou suafa pa‘ia,‘ia mitamita fo‘i i matou i vi‘iga ‘iā te oe. ³⁶‘Ia fa‘amanū i le ALI‘I o le Atua o Isaraelumai le vavau e o‘o i le fa‘avavau.”‘Ia fa‘apea atu fo‘i le nu‘u uma,“Amene” ma ‘ia vivi‘i atu i le ALI‘I. ³⁷Na tu‘ua e ia o Asafo ma ona uso lea mea i luma o le ‘atola‘au o le feagaiga a le ALI‘I, e ‘au‘auna i luma o le ‘atola‘au e lē aunoa, e tusa ma le galuega i lea aso ma lea aso; ³⁸o Opete-etoma ma o latou uso e to‘aono sefulu ma le to‘avalu; o Opete-etoma fo‘i o le atali‘i o Iutana ma Hosa, na tofia e fai ma leoleo faitoto‘a. ³⁹O Satoka le ositaulaga ma ona uso le ‘au ositaulaga, sa i luma o le malumalu o le ALI‘I i le mea maualuga i Kipeona, ⁴⁰e fai taulaga mū i le ALI‘I i luga o le fatafaitaulaga i taulaga mū, e lē aunoa, i le taeao ma le afiafi, e tusa ma mea uma ‘ua tusia i le tulafono a le ALI‘I na ia poloa‘i ‘iā Isaraelu; ⁴¹Sa ‘iā i latou o Hemana ma Iutana ma ē na totoe na filifilia, na ta‘uina atu o latou igoa, e vivi‘i atu i le ALI‘I, auā e fa‘avavau lava lona alofa; ⁴²sa ‘iā i latou o Hemana ma Iutana, ‘ua i ai pū, ma sumepalo mo ē fa‘atagitagi ai ma la‘aupese a le Atua. O atali‘i o Iutana, e fai ma leoleo faitoto‘a. ⁴³O tagata uma na ta‘ito‘atasi ma alu i lona fale; ma ‘ua toe fo‘i mai Tavita e fa‘amanuia lona ‘āiga.#