1 O atali‘i o Reupena le ulumatua a Isaraelu, auā o ia lava le ulumatua; a ‘ua leaga ‘iā te ia le moega o lona tamā, na avatu ai lona tofi o le ulumatua i atali‘i o Iosefa o le atali‘i o Isaraelu; e le‘i tusia fo‘i le gafa e fa‘atatau i le tofi o le ulumatua.
2 Auā na malosi Iuta e sili i ona uso, na tupu fo‘i ‘iā te ia o le ali‘i sili; a o le tofi o le ulumatua e ‘iā Iosefa lea.
3 O atali‘i o Reupena o le ulumatua a Isaraelu o Enoka ma Falu, o Esarona ma Karame.
4 O atali‘i o Ioelu; o Semaia lona atali‘i, o Koku lona atali‘i, o Semi lona atali‘i,
5 o Mika lona atali‘i, o Reaia lona atali‘i, o Paala lona atali‘i,
6 o Peira lona atali‘i o lē na ‘avea fa‘atagataotau‘a e Tikila-pilesa le tupu o Asuria. O ia le ali‘i sili o sa Reupenā.
7 O ona uso fo‘i ‘ina ‘ua faitauina o latou tusi tupuga, e tusa ma o latou ‘āiga, o ali‘i sili ia, o Ieielu ma Sakaria,
8 o Pela le atali‘i o Asasa, le atali‘i ia o Sema, o le atali‘i ia o Ioelu, na mau o ia i Aroeru e o‘o i Nepo ma Paalameona.
9 O le itū i sasa‘e na mau ai o ia e o‘o i le ala e ui ai i le vao e fua mai i le vaitafe o Eufirate; auā sa tupu tele o latou lafu i le nu‘u o Kiliata.
10 Na latou tau ai le tau‘a i ona po o Saulo ma sa Akarā ma fafasi ‘iā te i latou; ‘ona latou nonofo ai lea i o latou fale ‘ie i le lau‘ele‘ele uma i le itū i sasa‘e o Kiliata.
11 O le fānauga a Kato sa nonofo fa‘afeagai ma i latou i le lau‘ele‘ele o Vasana e o‘o i Saleka.
12 O Ioelu o le sili ia ma Sefama o lē aupito ane i ai ma Iaanai ma Safata sa nofo i Vasana.
13 O latou uso fo‘i o ‘āiga o latou tamā, o Mekaeli ma Mesulama ma Sepa ma Iorai ma Iakana ma Sea, ma Eperu, e to‘afitu ia.
14 O atali‘i nei o Aviaila, o le atali‘i o Huri, o le atali‘i lea o Iaroa, o le atali‘i lea o Kiliata, o le atali‘i lea o Mekaeli, o le atali‘i lea o Iesesai, o le atali‘i lea o Iato, o le atali‘i lea o Pusa;
15 o Aki le atali‘i o Apitelu, le atali‘i lea o Kuni, o le ali‘i ia o le ‘āiga o latou tamā.
16 ‘Ua latou nonofo i Kiliata i Vasana ma ona faoa ‘a‘ai ma tuāfanua uma o Sarona i o latou tuā‘oi.
17 Sa tusia i latou uma ia i o latou gafa i ona po o Iotama le tupu o Iuta ma ona po o Ierepoamo le tupu o Isaraelu. O ‘au mai itū‘āiga i sasa‘e
18 O le fānauga a Reupena ma sa Katō ma le tasi vaega o le itū‘āiga o Manase, o tagata totoa, o tagata e mafaia ‘ona fe‘avea‘i o le talitā ma le pelu, ma fanafana i le ‘aufana, e masani fo‘i i tau‘a, e fa sefulu o afe ma afe e fa ma le to‘afitu o selau ma le to‘aonogafulu ē na ō atu i le tau‘a.
19 Na latou tau le tau‘a ma sa Akarā ma Ietura ma Nafiso ma Notapa.
20 Na maua le fesoasoani e i latou e tau ma i latou, sa tu‘uina mai fo‘i sa Akarā i o latou lima, ‘atoa ma ē na ‘iā te i latou; auā na latou ‘alalaga atu i le Atua i le tau‘a ma ‘ua fa‘afofoga mai o ia ‘iā te i latou, ‘ina ‘ua latou fa‘atuatua ‘iā te ia.
21 Na vetea e i latou o latou lafu, o kamela e lima sefulu o afe ma a latou mamoe e lua selau o afe ma afe e lima sefulu ma a latou asini e lua afe ma tagata e selau o afe.
22 Auā e to‘atele ‘ua pa‘u‘ū manunu‘a, auā mai le Atua le tau‘a; ‘ua latou nonofo fo‘i i le mea sa i ai i latou e o‘o i le tāfeaga.
23 ‘Ua nonofo le fānauga a le tasi vaega o le itū‘āiga o Manase i le nu‘u, e āfua mai i Vasana e o‘o atu i Paala-heremone ma Senira ma le mauga o Heremone; ‘ua fa‘ato‘ateleina i latou.
24 O matai sili nei o le ‘āiga o latou tamā; o Efara ma Isai ma Elielu ma Aserielu ma Ieremia ma Hotavia, ma Iatielu, o tagata fitafita lava, o tagata ta‘ua, o ali‘i sili i le ‘āiga o latou tamā.
25 ‘Ua agasala fo‘i i latou i le Atua o latou tamā, ma latou mulilulua i atua o tagata o le nu‘u na fa‘aumatia e le Atua i o latou luma.
26 ‘Ona fa‘aoso lea e le Atua o Isaraelu ‘iā Pula le tupu o Asuria ma Tikila-pilesa le tupu o Asuria, ‘ua ‘avea i latou e ia fa‘atagataotau‘a, o sa Reupenā ma sa Katō ma le tasi vaega o le itū‘āiga o Manase ma na avatu i latou i Hala ma Havoli ma Hara ma le vaitafe o Kosane, e o‘o i le aso nei.#