1 ‘Ua fa‘apotopotoina e Tavita o ali‘i uma o Isaraelu i Ierusalema; o ali‘i o itū‘āiga ma ali‘i o vasega na ‘au‘auna i le tupu ma ali‘i o ta‘ito‘aafe ma ali‘i o ta‘ito‘aselau ma ali‘i e leoleo i ‘oloa uma ma lafu o le tupu ma ona atali‘i ma ‘au‘auna sili ma tagata malolosi, ‘atoa ma toa malolosi uma.
2 ‘Ona tula‘i atu ai lea o le tupu o Tavita ma ‘ua fa‘apea atu, “O o‘u uso e, ma lo‘u nu‘u, fa‘alogologo mai ia ‘iā te a‘u; sa i lo‘u loto e faia se fale e tumau ai le ‘atola‘au o le feagaiga a le ALI‘I, o le mea e tu ai ‘a‘ao o lo tatou Atua, na uma fo‘i ‘ona ‘ou sauni e fai ai;
3 a ‘ua fetalai mai le Atua ‘iā te a‘u, ‘‘E te lē faia se fale mo lo‘u igoa, auā o oe o le tagata fai tau‘a, ma ‘ua e fa‘amaligiina toto.’
4 Na filifilia a‘u e le ALI‘I le Atua o Isaraelu a‘i le ‘āiga uma o lo‘u tamā e fai ma tupu o Isaraelu e fa‘avavau; auā ‘ua filifilia Iuta e fai ma ali‘i; ‘ua filifilia le ‘āiga o lo‘u tamā i le ‘āiga o Iuta; ma ‘ua finagalo mai ‘iā te a‘u i atali‘i o lo‘u tamā e fai ma tupu o Isaraelu uma.
5 ‘Ua filifilia fo‘i Solomona lo‘u atali‘i a‘i o‘u atali‘i uma, (auā ‘ua foa‘iina mai ‘iā te a‘u e le ALI‘I o atali‘i e to‘atele,) e nofo ai i le nofoāli‘i o le mālō o le ALI‘I e pule ‘iā Isaraelu.
6 “‘Ua fetalai mai fo‘i o ia ‘iā te a‘u, ‘O Solomona lou atali‘i, e faia e ia lo‘u fale ma o‘u lotoā; auā ‘ua filifilia o ia e a‘u e fai mo‘u atali‘i, o a‘u fo‘i e fai mōna tamā.
7 ‘Ou te fa‘atumauina fo‘i lona mālō e fa‘avavau, pe ‘āfai na te fa‘amalosi e fai a‘u poloa‘iga ma a‘u fa‘amasinoga, e pei ‘ona fai i le aso nei.’
8 O lenei, ‘ou te fai atu ‘iā te ‘outou i luma o Isaraelu uma, o le fa‘apotopotoga a le ALI‘I, o fa‘afofoga mai fo‘i lo tatou Atua, ‘ia ‘outou tausi ma sā‘ili‘ili i poloa‘iga uma a le ALI‘I lo ‘outou Atua; ‘ina ‘ia fai pea mo ‘outou lenei nu‘u lelei ma tu‘u atu ma tofi o a ‘outou fānau e fa‘avavau pe a mavae atu ‘outou.
9 “O oe fo‘i Solomona e, lo‘u atali‘i, ‘ia iloa e oe le Atua o lou tamā ma ‘au‘auna ‘iā te ia ma le loto ‘atoa ma le loto fiafia; auā e su‘esu‘e e le ALI‘I o loto uma ma ‘ua silafia o mafaufau uma o manatu; ‘āfai ‘e te sā‘ili atu ‘iā te ia, ‘ona e maua ai lea o ia; ‘ae ‘āfai ‘e te tu‘ua o ia, ‘ona tu‘ulafoa‘iina lea o oe e ia e fa‘avavau.
10 O lenei, ‘ia oe, auā ‘ua filifilia oe e le ALI‘I ‘e te faia le fale e fai ma malumalu; ‘ia fa‘amalosi ma ‘ia e faia.”
11 ‘Ona avatu ai lea e Tavita ‘iā Solomona lona atali‘i o le fa‘atusa o le fa‘apaologa ma ona fale ma ana mea e tu‘u ai ‘oa ma ona potu i luga ma ona potu i totonu ma le fale o le nofoa o le alofa;
12 o le fa‘atusa fo‘i o mea uma na maua e ia i le Agaga, o lotoā o le fale o le ALI‘I ma potu uma e fa‘ata‘ali‘oli‘o ai e tu‘u ai ‘oloa o le fale o le Atua ma ‘oloa ‘ua fa‘asāina;
13 ‘atoa fo‘i ma vasega o le ‘au ositaulaga ma sa Levī ma le faiga o le galuega uma i le fale o le ALI‘I, ma ipu uma e ‘au‘auna a‘i i le fale o le ALI‘I;
14 na avatua e ia o auro ‘ua fuatia, o auro e fai a‘i mea uma i galuega ‘ese‘ese; ma mea ario uma ‘ua fuatia, e fai a‘i mea uma i galuega ‘ese‘ese.
15 ‘Ua fuatia fo‘i le auro mo tu‘ugālamepa ma o latou lamepa auro, ‘ua fuatia tu‘ugālamepa, ta‘itasi ‘atoa ma ona lamepa; o tu‘ugālamepa ario ‘ua fuatia mo le tu‘ugālamepa ma ona lamepa, e pei o mea e faia i tu‘ugālamepa ta‘itasi.
16 ‘Ua fuatia le auro o laulau o le areto e laulauina i luma e fai a‘i laulau ta‘itasi; o ario e fai a‘i laulau ario;
17 o auro lelei e fai a‘i tui ma tanoa ma ipu e asu a‘i; o ipu auro fo‘i ‘ua fuatia e fai a‘i ipu ta‘itasi; o ario fo‘i ‘ua fuatia e fai a‘i ipu ta‘itasi.
18 O auro ‘ua fa‘amamāina ‘ua fuatia e fai a‘i le fata e mū ai mea manogi; o le fa‘atusa fo‘i o le nofoa fa‘ata‘avalevale o kerupi auro, e fālō o la ‘apa‘au ma fa‘amalumalu a‘i le ‘atola‘au o le feagaiga a le ALI‘I.
19 ‘Ua fa‘apea atu Tavita, “O mea uma ia na fa‘aalia mai i le tusi mai le ‘a‘ao o le ALI‘I na ‘iā te a‘u, o galuega uma o i lenei fa‘atusa.”
20 ‘Ua fai atu fo‘i Tavita ‘iā Solomona lona atali‘i, “‘Ia fa‘amalosi ma loto tele ma ‘ia faia lenei mea; ‘aua le fefe, ‘aua le mata‘u; auā o le ALI‘I le Atua, o lo‘u Atua e ‘iā te oe o ia, na te lē tu‘ua oe, na te lē lafoa‘i fo‘i ‘iā te oe, se‘ia fa‘ai‘uina le faiga o le galuega uma o le fale o le ALI‘I.
21 Fa‘auta fo‘i, o vasega o le ‘au ositaulaga ma sa Levī, latou te faia galuega uma i le fale o le Atua; e ‘iā te oe fo‘i mo galuega uma lava o tagata uma e loto i ai ma ‘ua popoto e fai le galuega uma; o ali‘i fo‘i ma le nu‘u uma e usiusita‘i i au ‘upu uma.”#