1 ‘Ua nofo Tavita i lona fale, ‘ona fai atu ai lea o Tavita ‘iā Natano le perofeta, “Fa‘auta, ‘ua ‘ou nofo i le fale arasi, a o le ‘atola‘au o le feagaiga a le ALI‘I, ‘ua i lalo o ‘ie puipui.”
2 ‘Ona fai mai ai lea o Natano ‘iā Tavita, “O mea uma ‘ua e finagalo i ai ‘ia e faia, auā o ‘iā te oe le Atua.”
3 O lea lava po na tulei mai ai le afioga a le Atua ‘iā Natano, ‘ua fa‘apea mai,
4 Alu ia ma fai atu i la‘u ‘au‘auna o Tavita: ‘Ua fa‘apea ‘ona fetalai mai o le ALI‘I: ‘E te lē faia se fale mo a‘u ‘ou te nofo ai;
5 auā ‘ua ‘ou le nofo i se fale talu mai le aso na ‘ou ‘aveina a‘e ai Isaraelu ‘ua o‘o mai i le aso nei, a ‘ua ‘ou i ai i lea fale ‘ie ma lea fale ‘ie, i lea malumalu ma lea malumalu.
6 O mea uma na ‘ou fealua‘i ai ma Isaraelu uma, pe na ‘ou fai atu ai ‘ea se ‘upu i se tasi fa‘amasino o Isaraelu, na ‘ou poloa‘i e leoleo i lo‘u nu‘u, e fa‘apea, Se a le mea tou te lē fai ai se fale arasi mo a‘u?
7 O lenei fo‘i, ‘ia fa‘apea ‘ona e fai atu i la‘u ‘au‘auna o Tavita: O lo‘o fa‘apea ‘ona fai mai o le ALI‘I o ‘au: O a‘u na ‘ou ‘aumaia oe a‘i le lotoā mamoe, na e mulimuli i mamoe, ‘ina ‘ia faia oe ma ta‘ita‘i i lo‘u nu‘u o Isaraelu.
8 Na ‘ou i ai fo‘i ‘iā te oe i mea uma na e alu i ai, ma ‘ou fa‘aumatia nai ou luma ē na ita ‘iā te oe uma lava; na ‘ou faia fo‘i mo oe le igoa pei o igoa o ali‘i tetele i le lalolagi.
9 ‘Ou te tu‘u atu fo‘i se mea e nofo ai lo‘u nu‘u o Isaraelu ma ‘ou totōina i latou, e mau ai i latou i o latou lava nu‘u, e lē toe fa‘agae‘etia i latou; e lē toe fa‘atigāina fo‘i i latou e tagata amio leaga, e pei o anamua;
10 talu fo‘i ia ona po na ‘ou poloa‘i ai i fa‘amasino e pule i lo‘u nu‘u o Isaraelu. ‘Ou te fa‘ato‘ilaloina fo‘i i latou uma o ē ita mai ‘iā te oe. ‘Ou te ta‘u atu fo‘i ‘iā te oe, e faia e le ALI‘I se ‘āiga mo oe.
11 A o‘o ‘ina fa‘a‘atoaina ou aso e fa‘atasiina atu ai oe ma ou tamā, ‘ona ‘ou fa‘atūina lea o so lau fānau pe a mavae atu oe, o sou atali‘i fo‘i, ‘ou te fa‘atumauina lona mālō.
12 E faia e ia se fale mo a‘u ‘ou te fa‘atumauina fo‘i lona nofoāli‘i e fa‘avavau.
13 E fai a‘u mōna tamā, e fai o ia mo‘u atali‘i; ‘ou te lē ‘ave‘eseina lo‘u alofa ‘iā te ia, e pei ‘ona ‘ou ‘ave‘eseina i lē na muamua ‘iā te oe;
14 a ‘ou te fa‘atumauina o ia i lo‘u fale ma lo‘u mālō e fa‘avavau; e fa‘atumauina fo‘i lona nofoāli‘i e fa‘avavau lava.
15 E tusa ma nei ‘upu uma, e tusa ma nei mea uma fo‘i e fa‘aalia mai, sa fa‘apea ‘ona tautala atu ai o Natano ‘iā Tavita.
16 ‘Ona alu atu lea o le tupu o Tavita ma nofo atu i luma o le ALI‘I; ‘ona fai atu ai lea o ia, “Le ALI‘I e, le Atua, o ai ‘ea a‘u nei? o ai fo‘i lo‘u ‘āiga, ‘ina ‘ua e fa‘ao‘o mai ‘iā te a‘u i lenei aso?
17 A o le mea itiiti lenā i ou luma, le Atua e, a ‘ua e fetalai mai i le ‘āiga o lau ‘au‘auna i aso e tele o lumana‘i; le ALI‘I le Atua e, ‘ua e silasila mai fo‘i ‘iā te a‘u e peiseaī o se tagata silisili.
18 Se a se toe mea e fai atu ai Tavita ‘iā te oe i le fa‘amamaluina o lau ‘au‘auna? auā ‘ua e silafia lau ‘au‘auna.
19 Le ALI‘I e, ‘ua faia e oe o lenei mea tele uma, i lou fa‘aali mai ia mea tetele uma, ‘ona o lau ‘au‘auna, e tusa fo‘i ma lou lava finagalo.
20 Le ALI‘I e, e leai sē tusa ma oe, e leai se Atua na o oe lava, e tusa ma mea uma ‘ua fa‘alogologo i ai o matou taliga.
21 O ai ‘ea se tasi nu‘u i le lalolagi e tusa ma lou nu‘u o Isaraelu, o lē na afio atu ai le Atua e lavea‘i e fai mōna lava nu‘u, e fai mo oe le suafa tele ma le mata‘utia, ‘ina ‘ua tulia o nu‘u ‘ese i luma o lou nu‘u na lavea‘iina e oe nai Aikupito?
22 Na faia e oe o lou nu‘u o Isaraelu mou lava nu‘u e fa‘avavau; o oe fo‘i, le ALI‘I e, ‘ua fai oe mo latou Atua.
23 “O lenei, le ALI‘I e, ‘ia e fa‘ataunu‘uina e fa‘avavau le mea ‘ua e fetalai mai i lau ‘au‘auna ma lona ‘āiga ma ‘ia e faia e tusa ma lau afioga.
24 ‘Ia fa‘ataunu‘uina lava, ‘ina ‘ia fa‘amamaluina lou suafa e fa‘avavau, e fa‘apea, ‘O le ALI‘I o ‘au o le Atua o Isaraelu, o le Atua lava ia Isaraelu;’ ma ‘ia fa‘atumauina le ‘āiga o Tavita lau ‘au‘auna i ou luma.
25 Auā o oe, lo‘u Atua e, ‘ua e fa‘aali mai i lau ‘au‘auna ‘e te faia se ‘āiga mo ia; o le mea lea ‘ua manatu ai a‘u lau ‘au‘auna e tatalo atu i ou luma.
26 O lenei, le ALI‘I e, o oe lava le Atua, ‘ua e fetalai mai lea mea lelei i lau ‘au‘auna.
27 O lenei fo‘i, ‘ia e finagalo e fa‘amanuia le ‘āiga o lau ‘au‘auna, ‘ina ‘ia i ai i ou luma e fa‘avavau; auā, le ALI‘I e, a fa‘amanuia e oe, ‘ona manuia ai lea e fa‘avavau.”#