1 ‘Ua tula‘i mai Satani ‘iā Isaraelu, ‘ua ia fa‘aoso ‘iā Tavita ia faitauina Isaraelu.
2 ‘Ona fai atu lea o Tavita ‘iā Ioapo ma ali‘i o le nu‘u, “‘Inā ō ia, ‘inā faitau Isaraelu e āfua i Peresepa e o‘o atu i Tanu ma ‘aumai ‘iā te a‘u le faitau aofa‘i o i latou ‘ia ‘ou iloa.”
3 ‘Ua fai mai Ioapo, “‘Ia fa‘aopoopoina e le ALI‘I i lona nu‘u e tusa ma i latou ia ta‘isautuaselau; lo‘u ali‘i e, le tupu, e lē o ‘au‘auna ‘ea i latou uma a lo‘u ali‘i? Se a le mea ‘ua finagalo ai lo‘u ali‘i i lenei mea? Se a le mea e ‘avea ai o ia ma mea e nofo sala ai Isaraelu?”
4 A ‘ua tu‘u faia‘ina Ioapo i le fetalaiga a le tupu; ‘ona alu atu lea o Ioapo, ‘ua fealua‘i solo i Isaraelu uma, ‘ona toe fo‘i mai ai lea i Ierusalema.
5 ‘Ua avatua e Ioapo le faitau aofa‘i o tagata ‘iā Tavita. O Isaraelu uma e afe o afe ma le selau o afe o tagata e fai pelu. O Iuta fo‘i e fa selau o afe ma afe e fitu sefulu o tagata e fai pelu.
6 A ‘ua ia le faitauina fa‘atasi ma i latou o Levi ma Peniamina, auā ‘ua ‘inosia e Ioapo le poloa‘iga a le tupu.
7 ‘Ua leaga lenei mea i le silafaga a le Atua; ‘ona fasia ai lea e ia o Isaraelu.
8 ‘Ona fai atu lea o Tavita i le Atua, “‘Ua ‘ou agasala tele, ‘ina ‘ua ‘ou faia lenei mea; a o lenei, ‘ou te ‘ai‘oi atu ‘iā te oe, ‘ia fa‘amāgaloina le agasala a lau ‘au‘auna, auā ‘ua ‘ou fa‘avalea lava.”
9 ‘Ua fetalai mai le ALI‘I ‘iā Kato le tagata va‘ai a Tavita, ‘ua fa‘apea mai,
10 “‘Inā alu ia ma fai atu ‘iā Tavita, ‘ia fa‘apea atu, ‘O lo‘o fa‘apea ‘ona fetalai mai o le ALI‘I: O mea e tolu ‘ou te tu‘uina atu ai ‘iā te oe, filifili ia oe i se mea e tasi o ia mea, ‘ina ‘ia ‘ou faia ‘iā te oe.’”
11 ‘Ona alu atu ai lea o Kato ‘iā Tavita ma ‘ua fa‘apea atu ‘iā te ia, “O lo‘o fa‘apea ‘ona fetalai mai o le ALI‘I, ‘Filifili ia oe:
12 po o se oge e tolu ona tausaga; po o masina e tolu e fa‘aumatia ai oe i luma o ē ita mai ma o‘o atu ai ‘iā te oe le pelu a ē o fai oe mo latou fili; po o aso e tolu o le pelu a le ALI‘I, o le fa‘ama‘i i le nu‘u ma le agelu a le ALI‘I e fa‘auma ai i nu‘u uma o Isaraelu.’ O lenei, se‘i e silafia se ‘upu ‘ou te fo‘i ma a‘u i lē na ‘auina mai a‘u.”
13 ‘Ona fai atu ai lea o Tavita ‘iā Kato, “‘Ua tele lava lo‘u femēmēa‘i; o lenei, ‘ia pa‘ū atu a‘u i le ‘a‘ao o le ALI‘I, auā ‘ua matuā tele lona alofa mutimutivale, ‘ae ‘aua le pa‘ū a‘u i lima o tagata.”
14 ‘Ona tu‘u mai lea e le ALI‘I o le fa‘ama‘i ‘iā Isaraelu, ‘ua oti ai tagata o Isaraelu e fitu sefulu o afe.
15 ‘Ua ‘auina mai fo‘i e le Atua o le agelu i Ierusalema e fa‘aumatia ai, ‘ua silasila mai le ALI‘I a o fa‘aumatia e ia o tagata, ‘ona ia salamō ai lea ‘ona o le malaia ma ‘ua fetalai atu i le agelu o lē fa‘auma ai, “‘Inā sōia, tāofi ia o lou lima.” ‘Ua tu ai le agelu a le ALI‘I i le mea e soli ai saito a Aruna le sa Iepusē.
16 ‘Ua tepa a‘e Tavita ‘ua iloa atu le agelu a le ALI‘I o lo‘o tu i le vā o lē lalolagi ma le lagi, ‘ua i ai i lona lima lana pelu ‘ua se‘i, ‘ua fa‘aloaloa i luga o Ierusalema. ‘Ona fa‘apa‘ū faō ai lea o Tavita ma toeaina, ‘ua ‘o‘ofu i le ‘ie talatala.
17 ‘Ona fai atu lea o Tavita i le Atua, “E lē o a‘u ‘ea na fai atu ‘ia faitauina le nu‘u? O a‘u lava ‘ua ‘ou agasala ma agaleaga lava; a o nei mamoe, se a ‘ea se mea ‘ua latou faia? Le ALI‘I e, lo‘u Atua, ‘ou te ‘ai‘oi atu ‘iā te oe, ‘ia o‘o lou ‘a‘ao ‘iā te a‘u ma le ‘āiga o lo‘u tamā; ‘ae ‘aua le o‘o i lou nu‘u e taia i latou.”
18 ‘Ona fai atu lea o le agelu a le ALI‘I ‘iā Kato, e fai atu ‘iā Tavita, ‘ia alu a‘e Tavita e fai se fatafaitaulaga i le ALI‘I i le mea e soli ai saito a Aruna le sa Iepusē.
19 ‘Ona alu a‘e ai lea o Tavita e tusa ma le ‘upu a Kato, na ia fai mai ai i le suafa o le ALI‘I.
20 ‘Ua fāliu i tua Aruna, ‘ua na iloa le agelu; ‘ona lalafi ai lea o ia ma ona atali‘i e to‘afa. Sa soli saito Aruna.
21 ‘Ua alu atu Tavita ‘iā Aruna. ‘Ua va‘ava‘ai atu Aruna ‘ua iloa Tavita, ‘ona sau ai lea o ia a‘i le mea e soli ai saito ma ‘ua ifo to‘ele o ia ‘iā Tavita.
22 ‘Ona fai atu lea o Tavita ‘iā Aruna, “Tu‘u mai ia ‘iā te a‘u le mea e soli ai saito, ‘ina ‘ia ‘ou fai ai le fatafaitaulaga i le ALI‘I; ‘ia e tu‘u mai ia ‘iā te a‘u ‘ae taui atu i tupe la te tatau, ‘ina ‘ia tāofia le fa‘ama‘i ai le nu‘u.”
23 ‘Ona tali mai ai lea o Aruna ‘iā Tavita, “‘Ia ‘ave ma oe ma ia faia e lo‘u ali‘i le tupu le mea ‘ua ia finagalo i ai. Fa‘auta, ‘ou te foa‘i ‘iā te oe o povi e fai ma taulaga mū ma mea e soli a‘i saito e fai ma fafie ma le saito e fai ma taulaga i mea e ‘ai; ‘ou te foa‘i uma atu ai.”
24 ‘Ona fai atu lea o le tupu o Tavita ‘iā Aruna, “‘Aua, a ‘ou te fa‘atau ai lava i tupe la te tatau; auā ‘ou te lē ‘ave au mea i le ALI‘I, ‘ou te lē osi taulaga mū i mea e maua fua.”
25 ‘Ona avatu ai lea e Tavita ‘iā Aruna mo lea mea o sekeli auro e ono selau ‘ua fuatia.
26 ‘Ona faia lea e Tavita i lea mea o le fatafaitaulaga i le ALI‘I ma ia osia taulaga mū ma taulaga fa‘afetai ma vala‘au atu i le ALI‘I; ‘ona tali mai ai lea o ia ‘iā te ia i le afi mai le lagi i luga o le fatafaitaulaga mū.
27 ‘Ona fetalai ane lea o le ALI‘I i le agelu; ‘ona ia sulu ai lea o lana pelu i lona fa‘amoega.
28 ‘Ua iloa e Tavita i lea aso ‘ua fa‘afofoga mai le ALI‘I ‘iā te ia i le mea e soli ai saito a Aruna le sa Iepusē, ‘ona faitaulaga ai lea o ia i lea mea.
29 Auā o le malumalu o le ALI‘I na faia e Mose i le vao ma le fatafaitaulaga o le taulaga mū, ‘ua i ai i ia ona po i le mea maualuga i Kipeona.
30 A ‘ua lē mafai Tavita ‘ona alu atu i ai e fesili atu i le Atua; auā ‘ua mata‘u o ia ‘ona o le pelu a le agelu a le ALI‘I.