1 ‘Ua o‘o i ona po ‘ua toe aulia ai le tausaga, o ona po fo‘i lea e ō atu ai tupu, ‘ona ta‘ita‘iina atu lea e Ioapo ‘au o le tau‘a ma na fa‘aumatia le nu‘u o le fānauga a Amoni ma ‘ua alu atu ma vagaia Rapa. A ‘ua nofo Tavita i Ierusalema. ‘Ua fasia Rapa e Ioapo, ma fa‘aumatia ai.
2 ‘Ua ‘ave e Tavita le paleali‘i o lo latou tupu nai lona ao, ‘ua iloa ‘ina ‘ua fuatia ‘ua i ai le taleni o auro, ‘ua i ai fo‘i ma‘a tāua; ‘ua fa‘ae‘eina i le ao o Tavita. ‘Ua ‘aumaia fo‘i e ia o vete o le ‘a‘ai e matuā tele.
3 ‘Ua ia ta‘ita‘iina atu tagata sa i ai ma tu‘u atu i latou i ‘ili ma tui u‘amea ma to‘i. Sa fa‘apea ‘ona faia e Tavita i ‘a‘ai uma o le fānauga a Amoni. ‘Ona fo‘i atu lea o Tavita ma le nu‘u uma i Ierusalema.
4 ‘Ua mavae lenei mea, ‘ona tau ai lea i Kasera o le tau‘a ma Filisitia. O aso lava ia na fasia ai e Sepekai o le sa Usā o Sapa o so le fānau a Rafā. ‘Ua fa‘ato‘ilaloina i latou.
5 ‘Ua toe tau le tau‘a ma Filisitia. ‘Ona fasia lea e Eleana le atali‘i o Iaira o Laime le uso o Koliata le Kata; o le fuata o lona tao ‘ua pei se la‘au fa‘alava o lē lalaga ‘ie.
6 ‘Ua toe tau fo‘i le tau‘a i Kata, sa i ai le tagata maualuga, o ona tamatama‘i lima ma tamatama‘i vae ‘ua ta‘iono, e lua sefulu ma le fa; o ia fo‘i o le atali‘i o le sā Rafā.
7 ‘Ua fāifaia e ia o Isaraelu, ‘ona fasi ai lea ‘iā te ia e Ionatana le atali‘i o Sema o le uso o Tavita.
8 O i latou ia o le fānau a le sa Rafā i Kata. Na fasia i latou e Tavita ma ana ‘au‘auna.