5 ‘Ua tofia i latou i le vili, o lea vasega ma lea vasega; auā o ē na pule i le malumalu ma ē na pule i mea a le Atua, nai le fānauga a Eleasaro ma le fānauga a Itamaro i latou.
6 O Semaia le atali‘i o Natanielu o le tusi‘upu, o lo sa Levī, na ia tusia i latou i luma o le tupu ma ali‘i ma Satoka le ositaulaga ma Aimeleka le atali‘i o Aviata, ma matai sili o le ‘au ositaulaga ma sa Levī; ‘ua ‘aumaia ‘āiga o tamā o le tasi mo Eleasaro, ‘ua ‘aumaia fo‘i le tasi mo Itamaro.
7-18 O igoa nei o ‘āiga e to‘a luasefulu ma le fa na tofia mo a latou galuega. O le vili muamua na fa‘asaga ‘iā: 1. Ioaripa 2. Ietaia 3. Harima 4. Seorima 5. Malekia 6. Meamina 7. Hakosa 8. Avia 9. Iesua 10. Sekania 11. Eliasipa 12. Iakima 13. Hupa 14. Iesepeapo 15. Pileka 16. Imere 17. Hesera 18. Hafesesa 19. Petakia 20. Esekielu 21. Iakinu 22. Kamula 23. Tilaia 24. Maasia
19 O latou tofiga ia ‘iā latou galuega e ō atu i le fale o le ALI‘I, e tusa i lo latou masani mai ‘iā Arona lo latou tamā, e pei ‘ona poloa‘iina o ia e le ALI‘I le Atua o Isaraelu.
20 O i latou nei o ē na totoe o le fānauga a Levi; o le atali‘i o Amaramo, o Sepuelu; o le atali‘i o Sepuelu, o Ietaia.
21 O Reapea; o atali‘i fo‘i o Reapea, o lē muamua o Isea.
22 O lo sa Isarā; o Salome; o le atali‘i o Salome o Iata.