1 ‘Ua mavae le oti o Aapo, ‘ona fōua lea o Isaraelu e Moapi.
2 ‘Ua pa‘ū ifo Aasaia i le mea fa‘a‘upega o le fa‘amalama i lona afeafe aupitoaluga i Samaria, ‘ona ma‘i ai lea; ‘ona ‘a‘auina atu ai lea e ia o ‘au‘auna, ‘ua fai atu i ai, “‘Inā ō ia, ‘inā fesili atu ‘iā Pelesepulo le atua o Ekerona, pe ‘ou te mālōlō i lenei ma‘i.”
3 A ‘ua fetalai atu le agelu a le ALI‘I ‘iā Elia le Tisepi, “Tū ia i luga, ‘inā alu a‘e e fa‘afetaia‘i i ‘au‘auna a le tupu o Samaria; ‘ia e fai atu fo‘i ‘iā te i latou. ‘‘Ona ‘ua leai ‘ea se Atua i Isaraelu tou te ō atu ai e fesili ‘iā Pelesepulo le atua o Ekerona?’
4 O le mea lea o lo‘o fa‘apea ‘ona fetalai mai ai o le ALI‘I, ‘‘E te lē alu ifo lava i lea moega ‘ua e alu a‘e i ai, a o le a e oti lava oe.’”‘Ona alu ai lea o Elia.
5 ‘Ua fo‘i atu ‘au‘auna ‘iā te ia, ‘ona fai mai ai lea o ia ‘iā te i latou, “Se a ‘ea le mea ‘ua ‘outou fo‘i mai ai?”
6 ‘Ona latou fai atu ai lea ‘iā te ia, “Na alu a‘e le tasi tagata e fa‘afetaia‘i mai ‘iā te i matou, na fai mai fo‘i o ia ‘iā te i matou, ‘Ō ia, ‘inā fo‘i atu ia i le tupu na ‘a‘auina ‘outou ma fai atu ‘iā te ia: O lo‘o fa‘apea ‘ona fetalai mai o le ALI‘I: ‘Ona ‘ua leai ‘ea se Atua i Isaraelu, ‘ua e ‘a‘auina atu ai e fesili ‘iā Pelesepulo le atua o Ekerona? o le mea lea ‘e te lē alu ifo ai i lenā moega ‘ua e alu a‘e i ai, a o le a e oti lava oe.’”
7 ‘Ona fai mai lea o ia ‘iā te i latou, “Se tagata pe ī ‘ea lē na alu a‘e e fa‘afetaia‘i ‘iā te ‘outou ma fai atu na ‘upu ‘iā te ‘outou?”
8 ‘Ona latou tali atu ai lea ‘iā te ia, “O le tagata taufulufulu, ‘ua fusi fo‘i lona sulugātiti i le fusi pa‘u.”‘Ona fai mai lea o ia, “O Elia le Tisepi lea.”
9 ‘Ona ia ‘a‘auina mai lea ‘iā te ia o le ta‘ita‘i o le to‘alimagafulu ma lona to‘alimagafulu. ‘Ona alu a‘e lea o ia ‘iā te ia, fa‘auta, fo‘i, o lo‘o nofo ia i le tumutumu o le mauga; ‘ua ia fai mai i ai, “Le tagata o le Atua e, o lo‘o fetalai mai le tupu, ‘‘E te alu ifo.’”
10 ‘Ona tali atu lea o Elia, ‘ua fa‘apea atu i le ta‘ita‘i o le to‘alimagafulu, “‘Āfai o le tagata o le Atua a‘u, ‘ia alu ifo le afi mai le lagi, e fa‘aumatia ai oe ma lou to‘alimagafulu.” ‘Ona alu ifo ai lea o le afi mai le lagi, ‘ua fa‘auma ‘iā te ia ma lona to‘alimagafulu.
11 ‘Ona ia toe ‘a‘auina mai lea ‘iā te ia o le tasi ta‘ita‘i o le to‘alimagafulu ma lona to‘alimagafulu; ‘ua fai mai fo‘i o ia ‘iā te ia, “Le tagata o le Atua e, o lo‘o fa‘apea ‘ona fetalai mai o le tupu, ‘Ia vave ‘ona e alu ifo.”
12 ‘Ona tali atu ai lea o Elia, ‘ua fa‘apea atu ‘iā te i latou, “‘Āfai o le tagata o le Atua a‘u, ‘ia alu ifo le afi mai le lagi e fa‘aumatia ai oe ma lou to‘alimagafulu.” ‘Ona alu ifo ai lea o le afi a le Atua mai le lagi, ‘ua fa‘auma ‘iā te ia ma lona to‘alimagafulu.
13 ‘Ona toe ‘a‘auina mai ai lea e ia o lona to‘atolu o ta‘ita‘i o le to‘alimagafulu ma lona to‘alimagafulu. ‘Ona alu a‘e ai lea o lona to‘atolu o ta‘ita‘i o le to‘alimagafulu, ‘ua o‘o atu ia ma to‘otuli i ona tulivae i luma o Elia, ‘ua ‘ai‘oi atu ‘iā te ia ma fai atu ‘iā te ia, “Le tagata o le Atua e, ‘ia e alofa mai i lo‘u nei ola ‘atoa ma ola o le to‘alimagafulu nei o au ‘au‘auna.
14 Fa‘auta, na alu ifo le afi mai le lagi, ‘ua fa‘auma i ulua‘i ta‘ita‘i o to‘alimagafulu e lua ma o lā‘ua tai to‘alimagafulu; a o lenei, ‘ia e alofa mai i lo‘u nei ola.”
15 ‘Ona fetalai mai lea o le agelu a le ALI‘I ‘iā Elia, “‘Ia ‘oulua ō ifo ma ia, ‘aua ‘e te mata‘u ‘iā te ia.” ‘Ona tula‘i ai lea o ia, ‘ua la ō ifo i le tupu.
16 ‘Ona fai atu lea o ia ‘iā te ia, “O lo‘o fa‘apea ‘ona fetalai mai o le ALI‘I, ‘Ona ‘ua e ‘a‘auina atu o ‘au‘auna e fesili ‘iā Pelesepulo le atua o Ekerona, ‘ona ‘ua leai ‘ea se atua i Isaraelu e fesili i ai i lana afioga? o le mea lea ‘e te lē maliu ifo ai i lea lava moega ‘ua e maliu a‘e i ai, a o le a e maliu lava oe.”
17 ‘Ona oti lea o ia e tusa ma le afioga a le ALI‘I na fai atu ai ‘iā Elia. ‘Ona soloa‘i ane ai lea o Ioramo e fai ma tupu i le lua o tausaga o Ioramo le atali‘i o Iosefatu le tupu o Iuta, auā e leai sona atali‘i.
18 O toe o mea a Aasaia na ia faia, e le‘i tusia ‘ea ia i le tusi i tala i nofoa‘iga a tupu o Isaraelu?