1 ‘Ua vala‘au ‘iā Elisaia le avā a le tasi so‘o o le ‘au perofeta, ‘ua fa‘apea mai, “‘Ua oti lau ‘au‘auna o la‘u tane, ‘ua e silafia fo‘i sa mata‘u lau ‘au‘auna i le ALI‘I, a ‘ua sau lē ‘ua matou ‘aitalafu i ai, o le a na ‘ave i a‘u tama tane e to‘alua e fai mōna pologa.”
2 ‘Ona fai atu lea o Elisaia ‘iā te ia, “Se a ‘ea se mea ‘ou te faia ‘iā te oe? ‘Inā ta‘u mai ia ‘iā te a‘u, pe se a se mea o ‘iā te oe i le fale?”‘Ona tali mai ai lea o ia, “E leai se mea a lau ‘au‘auna fafine o i lo‘u fale, ‘ua na o le fagu suāu‘u lava.”
3 ‘Ona fai atu ai lea o ia, “‘Inā alu ia, ‘ia e nō ipu i tuā i tagata uma ‘ua lata mai ‘iā te oe, o ipu le susua, ‘aua le itiiti.
4 A ē ulufale ane, ‘ia e pupuni le faitoto‘a i ou tua ma tua o au tama, i le ē liligi atu i na ipu uma, ma tu‘u ‘ese le ‘ua tumu.”
5 ‘Ona alu ane ai lea o ia, ‘ua tapuni le faitoto‘a i ona tua ma tua o ana tama; ‘ona la ‘aumai ai lea o ipu ‘iā te ia, ‘ona liligi atu ai lea e ia.
6 ‘Ua tūtūmu ipu, ‘ona fai atu lea o ia i lana tama, “‘Ia toe ‘aumai se isi ipu ‘iā te a‘u;” ‘ona fai mai ai lea o ia ‘iā te ia, “E leai se toe ipu.” ‘Ona utu ai lea o le suāu‘u.
7 ‘Ona alu ai lea o ia, ‘ua ta‘u atu i le tagata o le Atua. ‘Ona fai mai ai lea o ia ‘iā te ia, “Alu ia, ‘inā fa‘atau atu le suāu‘u i le e taui atu i le tagata ‘ua ‘outou ‘aitalafu ai; a o mea ‘ua totoe ‘ia ola ai oe ma au tama.”
8 O le tasi aso na ui atu ai Elisaia i Sunema, sa i ai le tasi sa‘o tama‘ita‘i; na ia pulunaunau mai ‘iā te ia se‘i ‘ai. ‘Ona i‘u ai lea ‘ina afe so‘o ai o ia e ‘ai ai i ana malaga i lea ala.
9 ‘Ona fai atu ai lea o ia i lana tane, “Fa‘auta mai, ‘ua ‘ou iloa o le tagata pa‘ia o le Atua lenei, o le sau so‘o ‘iā te i tā‘ua.
10 ‘Ia tā faia se afeafe itiiti i luga e fai i le pā puipui o le fale; ‘ia tā tu‘u ai se moega mo ia ma se laulau ma se nofoa ma se tu‘ugālamepa; a sau fo‘i o ia ‘iā te i tā‘ua, i le alu ane i ai o ia.”
11 O le tasi aso na o‘o atu ai o ia i lea mea, ‘ona ulu ane lea i le afeafe, ‘ua ta‘oto ai.
12 ‘Ua fai atu o ia ‘iā Kiasi lana ‘au‘auna, “Vala‘au ia i lenā tama‘ita‘i Sunema.” ‘Ona vala‘au lea o ia ‘iā te ia, ‘ona tu mai ai lea o ia i ona luma.
13 ‘Ona fai atu lea o ia ‘iā te ia, “‘Ia e fai atu i ai, Fa‘auta, ‘ua tigāina oe ‘ona o i mā‘ua i nei sauniga uma, se a se mea e faia mo oe? pe ta‘u ‘ea oe i le tupu, po o le ali‘i e pule i ‘au?”‘Ona tali mai ai lea o ia, “‘Ou te nofo fa‘atasi ma lo‘u nu‘u.”
14 ‘Ona fai ane lea o ia, “Se a se mea e faia mo ia?”‘Ona tali mai ai lea o Kiasi, “E leai sana tama, ‘ua toeaina fo‘i lana tane.”
15 ‘Ona fai atu lea o ia, “Vala‘au atu ‘iā te ia.” ‘Ona vala‘au atu lea o ia ‘iā te ia, ‘ona tu mai ai lea o ia i le faitoto‘a.
16 ‘Ona fai atu lea o ia, “O lelā tausaga, ‘e te sapasapai ai i sau tama tane.”‘Ona tali mai lea o ia, “‘Aua, le ali‘i e, le tagata o le Atua, ‘aua ‘e te ‘ole‘ole mai i lau ‘au‘auna fafine.”
17 ‘Ona tō ai lea o le fafine, ‘ua fānau mai ai lana tama tane i lea tausaga, e fa‘atatau i le tau o le olaga sa fai atu ai Elisaia ‘iā te ia.
18 ‘Ua matua le tama, ‘ona o‘o lea i le tasi aso, ‘ua alu atu ai o ia i lona tamā i ē na sele saito.
19 ‘Ua fai atu ia i lona tamā, “Lo‘u ulu e, lo‘u ulu e!”‘Ona fai atu ai lea o le tamā i se tasi o taule‘ale‘a, “Inā ‘ave o ia i lona tinā.”
20 ‘Ona ‘ave lea e ia, ‘ua avatu ai i lona tinā; ‘ona si‘i lea o ia i ona vae, ‘ua o‘o ‘ina tutonu o le la, ‘ona oti ai lea o ia.
21 ‘Ona alu a‘e lea o le fafine, ‘ua fa‘ata‘oto ‘iā te ia i luga o le moega o le tagata o le Atua, ‘ua pupuni le faitoto‘a, ‘ona alu lea o ia i fafo.
22 ‘Ona vala‘au atu ai lea o ia i lana tane, ‘ua fa‘apea atu, “Se‘i e ‘auina mai ‘iā te a‘u se tasi taule‘ale‘a ma se asini, ‘ou te vave atu ai i le tagata o le Atua, i lo‘u toe sau ai.”
23 ‘Ona fai mai lea o ia, “O le a le mea ‘e te alu ai ‘iā te ia i le aso nei? e lē o le masina fa‘ato‘ā va‘aia lenei, e lē o le sapati fo‘i.”A ‘ua tali atu ai o ia, “E le afaina.”
24 ‘Ona fa‘anofoa lea e ia o le asini, ‘ua fai atu i lana ‘au‘auna, “‘Ia fa‘atelevave ‘ona alu, ‘aua ne‘i fa‘atelegese ‘ona fa‘amomo‘e ‘ona o a‘u, se‘i ‘iloga ‘ou te fai atu ai ‘iā te oe.”
25 ‘Ona alu ai lea o ia, ‘ua o‘o atu i le tagata o le Atua i le mauga o Karamelu.‘Ua iloa mamao mai fo‘i o ia e le tagata o le Atua, ‘ona fai ane ai lea o ia ‘iā Kiasi lana ‘au‘auna, “Fa‘auta i lenā tama‘ita‘i Sunema.
26 ‘Inā momo‘e ia oe e fa‘afetaia‘i ‘iā te ia, fai atu fo‘i i ai, E manuia ‘ea oe? e manuia ‘ea lau tane? e manuia ‘ea le tama?”‘Ona tali mai lea o ia, “‘Ua manuia lava.”
27 ‘Ua o‘o mai o ia i le tagata o le Atua i le mauga, ‘ona, u‘u lea o ia i ona vae; a ‘ua fa‘alatalata ane Kiasi, o le a tulei ‘ese ‘iā te ia. A ‘ua fai atu le tagata o le Atua, “‘Inā tu‘u pea ia ‘iā te ia, auā ‘ua tigā lona loto; a ‘ua nanā e le ALI‘I le mea ‘iā te a‘u, e le‘i fa‘aalia mai ‘iā te a‘u.”
28 ‘Ona fai mai lea o ia, “Na ‘ou ole atu ‘ea i se tama tane i lo‘u ali‘i? na ‘ou le fai atu ‘ea, ‘Aua ‘e te ‘ole‘ole mai ‘iā te a‘u?”
29 ‘Ona fai atu ai lea o ia ‘iā Kiasi, “‘Inā fusi ia lou sulugātiti, ‘ia e ‘ave fo‘i lo‘u to‘oto‘o i lou lima, ma ‘ia e alu atu; a ‘oulua fetaia‘i ma se isi, ‘aua ne‘i e ofo alofa ‘iā te ia; a alofa mai fo‘i se tasi ‘iā te oe, ‘aua ‘e te toe tali atu i ai; ma ia ē fa‘ae‘e lo‘u to‘oto‘o i mata o le tama.”
30 ‘Ona fai mai lea o le tinā o le tama, “O lo‘o soifua le ALI‘I, ‘ua e ola fo‘i oe, ‘ou te lē te‘a ‘ese ‘iā te oe.” ‘Ona tula‘i lea o ia, ‘ua mulimuli ‘iā te ia.
31 ‘Ua muamua atu Kiasi ‘iā te i latou, ‘ua fa‘ae‘e le to‘oto‘o i mata o le tama; a ‘ua leai se leo, ‘ua lē lagona fo‘i. ‘Ona fo‘i mai lea o ia e fa‘afetaia‘i ‘iā te ia; ‘ua fai mai fo‘i ‘iā te ia, ‘ua fa‘apea mai, “E le‘i ala le tama.”
32 ‘Ua ulufale atu Elisaia i le fale, fa‘auta fo‘i, o le tama ‘ua oti, ‘ua fa‘ata‘oto i luga o lona moega.
33 ‘Ua ulu atu o ia, ‘ua pupuni fo‘i le faitoto‘a, ‘ua i totonu i lā‘ua, ‘ona tatalo atu ai lea o ia i le ALI‘I.
34 ‘Ona alu a‘e lea o ia, ‘ua faō i luga o le tama; ‘ua fa‘atatau lona gutu i lona gutu ma ona mata i ona mata ma ona lima i ona lima; ‘ua ta‘oto o ia i ona luga; ‘ona mafanafana lea o le tino o le tama.
35 ‘Ona fo‘i atu lea o ia, ‘ua ta‘ifo‘ifa‘atasi ‘ona savali i le loto fale; ‘ona alu a‘e ai lea, ‘ua ta‘oto o ia i ona luga; ‘ona mafatua fa‘afitu ai lea o le tama, ‘ua pupula a‘e fo‘i mata o le tama.
36 ‘Ona vala‘au lea o ia ‘iā Kiasi, ‘ua fa‘apea atu, “Vala‘au ia i lenā tama‘ita‘i Sunema.” ‘Ona vala‘au atu lea o ia i ai. ‘Ua sau fo‘i o ia ‘iā te ia, ‘ona fai atu ai lea o ia, “Si‘i a‘e ia o lau tama.”
37 ‘Ona ulu mai lea o ia, ‘ua fa‘apa‘ū i ona vae, ‘ua ifo to‘ele; ‘ona si‘i mai lea o lana tama, ‘ua alu.
38 ‘Ua toe alu atu Elisaia i Kilikala; ‘ua oge le nu‘u; ‘ua nonofo fo‘i i ona luma so‘o o le ‘au perofeta. ‘Ona fai atu lea o ia i lana ‘au‘auna, “Fa‘ae‘e ia le pani tele i le afi, e tunu ai ni mea e ‘ai mā so‘o o le ‘au perofeta.”
39 ‘Ona alu ai lea o le tasi i le vao e sā‘ili mea e ‘ai, ‘ua maua se vine vao, ‘ua tau ai ona fua, ‘ua tumu ai lona ‘ie, ‘ona sau ai lea, ‘ua tipi i le pani sa tunu a‘i mea e ‘ai; auā ‘ua latou lē iloa ia mea.
40 ‘Ona latou liligi atu ai lea e ‘a‘ai ai tagata. O ‘a‘ai i latou i le mea na tunu, ‘ona latou ‘alalaga lea, ‘ua fa‘apea mai, “Le tagata o le Atua e, ‘ua i le pani le oti.” ‘Ua lē mafai ‘ona latou ‘a‘ai ai.
41 A ‘ua fai atu o ia, “‘Inā ‘aumaia se falaoa.” ‘Ona lafo lea e ia i le pani, ‘ona fai atu ai lea, “Liligi atu ia ma le nu‘u, latou te ‘a‘ai ai.” ‘Ua lē toe i ai se mea leaga i le pani.
42 ‘Ua sau le tasi tagata mai Paala-salisa, ‘ua ‘aumai i le tagata o le Atua o le mea e ‘ai o ulua‘i fua, o areto karite e fua lua, ‘atoa ma fua saito mata i lana taga. ‘Ona fai atu lea o Elisaia, “Avatu ia mā le nu‘u, latou te ‘a‘ai ai.”
43 ‘Ona fai mai ai lea o lana ‘au‘auna, “Pe a ‘ou laulauina atu ‘ea mea nei i luma o tagata e to‘aselau?”‘Ona toe fai atu lea o ia, “‘Inā laulau atu ia mā le nu‘u, ‘ina ‘ia latou ‘a‘ai ai; auā o lo‘o fa‘apea ‘ona fetalai mai o le ALI‘I, ‘Latou te ‘a‘ai ai, ‘ae totoe lava.’”
44 ‘Ona laulau atu ai lea e ia i o latou luma, ‘ua latou ‘a‘ai ai ma ‘ua totoe lava, pei ‘ona fetalai mai ai o le ALI‘I.