1 O ona po ia na ma‘i ai Esekia, ‘ua tāli oti. ‘Ona sau ai lea ‘iā te ia o le perofeta o Isaia le atali‘i o Amota, ‘ua fai mai ‘iā te ia, “O lo‘o fa‘apea ‘ona fetalai mai o le ALI‘I, Sauni ia sau mavaega i lou ‘āiga, auā o le a e maliu, ‘e te lē soifua.”
2 ‘Ona liliu atu ai lea ona fofoga i le pā o le fale, ‘ua tatalo atu i le ALI‘I, ‘ua fa‘apea atu,
3 “Le ALI‘I e, ‘ou te ‘ai‘oi atu, ‘ia e manatu mai i lo‘u savali i ou luma ma le fa‘amaoni ma le loto ‘atoa, ‘ua ‘ou faia fo‘i mea ‘ua e finagalo i ai.” ‘Ona tagi lotulotu lea o Esekia.
4 ‘Ona o‘o mai ai lea o le afioga a le ALI‘I ‘iā Isaia, a o le‘i o‘o ia i le lotoā tuloto, ‘ua fa‘apea mai,
5 “Fo‘i atu ia ma ia ē fai atu ‘iā Esekia le ta‘ita‘i o lo‘u nu‘u, O lo‘o fa‘apea ‘ona fai mai o le ALI‘I le Atua o Tavita lou tamā, ‘Ua ‘ou fa‘alogo i lau tatalo, ‘ua ‘ou iloa ou loimata; fa‘auta fo‘i, ‘ou te fa‘amālōlō ‘iā te oe, ‘e te alu a‘e i e luā i le fale o le ALI‘I.
6 ‘Ou te fa‘aopoopo i aso o lou ola o tausaga e sefulu ma le lima; ‘ou te lavea‘i fo‘i ‘iā te oe ‘atoa ma le ‘a‘ai nei i le lima o le tupu o Asuria; ‘ou te fa‘amamaluina fo‘i le ‘a‘ai nei ‘ona o a‘u lava, ‘ona o Tavita fo‘i la‘u ‘au‘auna.”
7 ‘Ona fai atu ai lea o Isaia, “E ‘ave se potopotogamati. ‘Ona latou ‘ave ai lea, ‘ua tu‘u i le mea na fulaga‘i, ‘ona mālōlō ai lea.”
8 ‘Ua fai atu fo‘i Esekia ‘iā Isaia, “O le a le fa‘ailoga e iloa ai e fa‘amālōlō mai le ALI‘I ‘iā te a‘u, ‘ou te alu a‘e ai i le fale o le ALI‘I i e luā?”
9 ‘Ona tali mai ai lea o Isaia, “O le fa‘ailoga lenei ‘iā te oe mai le ALI‘I, ‘e te iloa ai e faia e le ALI‘I le mea ‘ua na fetalai mai ai, Pe alu i luma ‘ea le ata o le la i vaega e sefulu, pe fo‘i atu i vaega e sefulu?”
10 ‘Ona fai atu ai lea o Esekia, “O le mea itiiti ‘ona alu ifo o le ata o le la i vaega e sefulu; ‘aua ne‘i fa‘apea, a ‘ia fo‘i atu i tua le ata i vaega e sefulu.”
11 ‘Ona vala‘au atu ai lea o Isaia le perofeta i le ALI‘I, ‘ona fa‘afo‘i atu ai lea o ia o le ata i vaega o sefulu na uma ‘ona alu ifo ai i le mea a Aasa e vaevae ai itūlā.
12 O ona po ia na ‘a‘auina mai e Perota-palata le atali‘i o Palata le tupu o Papelonia nisi e ‘aumai tusi ma le mea alofa ‘iā Esekia; auā na ia fa‘alogo na ma‘i Esekia.
13 ‘Ua talia fo‘i i latou e Esekia, ‘ua na fa‘aali atu ‘iā te i latou le fale uma o lana ‘oloa, o ario ma auro ma mea manogi ma le u‘u lelei; ‘atoa ma le fale uma o lana ‘au‘upega ma mea uma sa i ana mea e teu ai ‘oloa; e leai lava se mea i lona fale ma lona nu‘u uma e le‘i fa‘aali atu ai e Esekia ‘iā te i latou.
14 ‘Ona sau ai lea o Isaia le perofeta i le tupu o Esekia, ‘ua fa‘apea mai ‘iā te ia, “Pe se a na fai mai ai ia tagata? O fea fo‘i na latou ō mai ai ‘iā te oe?”‘Ona tali atu ai lea o Esekia, “Na latou ō mai i le nu‘u mamao, o Papelonia lava.”
15 ‘Ona fai mai ai lea o ia, “Pe ni a mea ‘ua latou iloa i lou fale?”‘Ona tali atu ai lea o Esekia, “‘Ua latou maimoa i mea uma o i lo‘u fale, e leai se mea i a‘u mea e teu ai ‘oloa ‘ou te le‘i fa‘aali atu ai ‘iā te i latou.”
16 ‘Ona fai mai ai lea o Isaia ‘iā Esekia, “Fa‘afofoga mai ia i le afioga a le ALI‘I.
17 O lo‘o fa‘apea mai le ALI‘I, Fa‘auta, e o‘o mai ona aso e ‘aveina atu ai i Papelonia o mea uma o i lou fale, ‘atoa ma mea ‘ua fa‘aputuina e ou tamā ‘ua o‘o mai i le aso nei; e lē toe i ai se mea e tasi.
18 Latou te ‘ave fo‘i nisi o ou atali‘i e tutupu mai ‘iā te oe, e fānaua e oe, e ‘avea fo‘i i latou ma eunuka i le maota o le tupu o Papelonia.”
19 ‘Ona fai atu ai lea o Esekia ‘iā Isaia, “‘Ua lelei le afioga a le ALI‘I ‘ua e fai mai ai na;” ‘ua fai atu fo‘i ia, “E lē i ai ‘ea le manuia ma le fa‘amaoni i lo‘u olaga?”
20 O toe fo‘i o mea na faia e Esekia ma lona fitafita uma, ma le vailepa ma le alāvai na ia faia, na ta‘i mai ai le vai i totonu o le ‘a‘ai, e le‘i tusia ‘ea ia mea i le tusi o tala i nofoa‘iga a tupu o Iuta?
21 ‘Ua ta‘oto fo‘i Esekia fa‘atasi ma ona tamā, ‘ona soloa‘i ane ai lea o lona atali‘i o Manase e fai ma tupu.#