1 O le sefulu ma le valu o tausaga o Iosefatu le tupu o Iuta na fai ai Ioramo le atali‘i o Aapo ma tupu o Isaraelu i Samaria. E sefulu ma le lua tausaga na fai ai o ia ma tupu.
2 ‘Ua ia faia fo‘i le amio leaga i luma o le ALI‘I, ‘ae le‘i ausia le amio a lona tamā ma lona tinā, auā na ia ‘ave ‘ese le tupua o Paala na faia e lona tamā.
3 A ‘ua pipi‘i pea o ia i agasala a Ierepoamo le atali‘i o Nepata o lē na fa‘atupu le agasala ‘iā Isaraelu, na ia lē liliu ‘ese ai lava.
4 O Mesa fo‘i le tupu o Moapi e tele lona lafu, na ia avatu fo‘i i le tupu o Isaraelu o tama‘i mamoe e selau afe, ‘atoa ma mamoe po‘a e selau afe, ‘atoa ma o latou fulufulu.
5 A ‘ua mavae ‘ona oti o Aapo, ‘ona fōua lea e le tupu o Moapi o le tupu o Isaraelu.
6 O ona po fo‘i ia na alu atu ai le tupu o Ioramo nai Samaria ma na faitau ‘iā Isaraelu uma.
7 ‘Ua alu fo‘i lana fe‘au ‘iā Iosefatu le tupu o Iuta, ‘ua fa‘apea atu, “‘Ua fōua a‘u e le tupu o Moapi, pe tā te ō ‘ea ma a‘u e tau ma Moapi?”‘Ona fai mai lea o ia, “Tā te ō a‘e lava, o a‘u e pei o oe, o lo‘u nu‘u e pei o lou nu‘u, o a‘u solofanua e pei o au solofanua.”
8 ‘Ona fai atu lea o ia, “O le fea ala tatou te ō a‘e ai?”‘Ona tali mai lea o ia, “O le ala e ui i le vao o Etoma.”
9 ‘Ona latou ō ai lea, o le tupu o Isaraelu ma le tupu o Iuta, ‘atoa ma le tupu o Etoma. ‘Ua po fitu o latou o fa‘ata‘amilo ai i le ala; ‘ona leai lea o se vai e inu ai ‘au, ‘atoa ma manu ‘ua ‘iā te i latou.
10 ‘Ona fai atu lea o le tupu o Isaraelu, “‘Oi talofa! ‘ua fa‘apotopoto e le ALI‘I nei tupu e to‘atolu e tu‘uina atu i latou i lima o Moapi.”
11 A ‘ua fai mai Iosefatu, “E lē o ‘i‘inei ‘ea se perofeta a le ALI‘I, tatou te fesili ai i le ALI‘I?”‘Ona tali atu ai lea o le tasi o ‘au‘auna a le tupu o Isaraelu, ‘ua fa‘apea atu, “O lo‘o ‘i‘inei Elisaia le atali‘i o Safata, na na liligi le vai i lima o Elia.”
12 ‘Ona fai mai ai lea o Iosefatu, “O lo‘o ‘iā te ia le afioga a le ALI‘I.” ‘Ona ō ifo lea ‘iā te ia o le tupu o Isaraelu ma Iosefatu, ‘atoa ma le tupu o Etoma.
13 A ‘ua fai mai Elisaia i le tupu o Isaraelu, “O le a le mea ‘ua e mana‘o mai ai ‘iā te a‘u nei? ‘Inā maliu atu ia oe i perofeta a lou tamā ma perofeta a lou tinā.”‘Ona fai atu lea o le tupu o Isaraelu ‘iā te ia, “‘Aua, auā ‘ua fa‘apotopoto e le ALI‘I nei tupu e to‘atolu e tu‘uina atu ai i latou i lima o Moapi.”
14 ‘Ona fai mai ai lea o Elisaia, “O lo‘o soifua le ALI‘I o ‘au, ‘ou te tu atu a‘u nei i ona luma, ana le se anoa le afioga a Iosefatu le tupu o Iuta ‘ou te e‘e i ai, po ‘ua ‘ou le tepa atu ‘iā te oe, pe va‘ai atu ‘iā te oe.
15 A o lenei, ‘ia ‘aumai ‘iā te a‘u se tagata ta la‘aupese.”‘Ua na ta le la‘aupese, ‘ona i ai lea i ona luga le ‘a‘ao o le ALI‘I.
16 ‘Ona fai atu ai lea o ia, “O lo‘o fa‘apea ‘ona fetalai mai o le ALI‘I, ‘‘Ia ‘outou fai ni utu, ‘ia so‘oso‘o utu le vanu nei.’
17 Auā o lo‘o fa‘apea ‘ona fetalai mai o le ALI‘I, ‘Tou te lē iloa atu se matagi, tou te lē iloa atu fo‘i se timu; ‘ae tumu le vanu nei i vai, tou te feinu ai, o ‘outou ma o ‘outou lafu, ‘atoa ma a ‘outou manu.’
18 ‘Ae itiiti lea mea i le ALI‘I, ‘ae tu‘uina mai fo‘i e ia o Moapi i o ‘outou lima.
19 Tou te fasia fo‘i ‘a‘ai uma e nofo ‘olo, ‘atoa ma ‘a‘ai silisili uma, tou te tatu‘uina fo‘i la‘au lelei uma, tou te tanumia fo‘i vaipuna uma, tou te fa‘aleaga fo‘i fāsi fanua lelei uma i ma‘a.”
20 ‘Ua o‘o i le taeao, ‘ina o fai o le taulaga, fa‘auta, ‘ua tafe mai le vai i le ala o Etoma, ‘ua tumu ai le nu‘u i le vai.
21 ‘Ua lagona e Moapi uma ‘ua ō a‘e tupu e tau ma i latou, ‘ona latou fa‘apotopoto ai lea o i latou uma o ē fa‘ato‘ā lavā tau ma ē matutua ai, ‘ua latou tutū i le tuā‘oi.
22 ‘Ua latou tula‘i mai i le taeao lava; ‘ua alu a‘e fo‘i le lā i le vai, ‘ona iloa ai lea e Moapi o le vai i o latou luma ‘ua mūmū pei o le toto.
23 ‘Ua latou fa‘apea ane, “O le toto lenā; ‘ua fasia lava ia tupu, ‘ua fefasia‘i i latou. O lenei, Moapi e, tatou ō ia e vete.”
24 ‘Ua latou o‘o i le toagalauapi a Isaraelu, ‘ona tutū ai lea o Isaraelu i luga, ‘ua fasi ‘iā Moapi, ‘ona latou sōsōla lea ‘iā te i latou; a ‘ua latou fasi pea ‘iā Moapi, ‘ua o‘o i lo latou nu‘u.
25 ‘Ua latou lepetia ‘a‘ai, ‘ua ta‘itasi fo‘i ma lafo e tagata uma lana ma‘a i fanua lelei uma, ‘ua tūtūmu ai, ‘ua latou tatanu vaipuna uma, ‘ua tatu‘uina fo‘i la‘au lelei uma; a ‘ua totoe o ma‘a o Kiriaresa, ‘ae peita‘i ‘ua fa‘ata‘amilo i ai le ‘au a ma‘atā ma fa‘ataugā i ai.
26 ‘Ua iloa e le tupu o Moapi ‘ua faia‘ina o ia i le tau‘a, ‘ona ‘ave lea e ia o tagata e fai pelu e to‘afitu selau, ‘ina ‘ia sofa‘i atu i le tupu o Etoma; a ‘ua latou lē mafaia.
27 ‘Ona tago ai lea o ia i lona atali‘i ulumatua, na fai e sui ai o ia i le nofoa‘iga, ‘ua fai a‘i le taulaga mū i luga o le pā. Sa tele fo‘i le ita ‘iā Isaraelu. ‘Ona latou tu‘ua lea o ia, ‘ae fo‘i atu i lo latou nu‘u.#