2 Tupu

O Hosea le Tupu o Isaraelu

¹O le sefulu ma le lua o tausaga o Aasa le tupu o Iuta na fai ai Hosea le atali‘i o Ele ma tupu o Isaraelu i Samaria i tausaga e iva. ²Na ia faia fo‘i le amio leaga i luma o le ALI‘I, ‘ae le‘i ausia amio a tupu o Isaraelu ē na muamua ‘iā te ia. ³‘Ua si‘i mai le tau‘a ‘iā te ia e Salemanesa le tupu o Asuria, ‘ua fa‘ato‘ilalo fo‘i Hosea ‘iā te ia ma ‘ua fai taulaga i ai. ⁴A ‘ua iloa e le tupu o Asuria o Hosea a fouvale, auā na na ‘auina le sāvali ‘iā So le tupu o Aikupito, ‘ua na lē avane fo‘i le taulaga i le tupu o Asuria, fa‘apei o lea tausaga ma lea tausaga; o le mea lea na puipui ai ‘iā te ia e le tupu o Asuria ma na fusifusi ‘iā te ia i le fale puipui.

O le Fa‘atafunaga o Samaria

⁵‘Ona alu a‘e lea o le tupu o Asuria i le nu‘u uma, ‘ua alu a‘e lava i Samaria, ‘ua si‘o ai i tausaga e tolu. ⁶O le iva o tausaga o Hosea na ā‘ea ai Samaria e le tupu o Asuria, ‘ua na fa‘atāfeaina fo‘i Isaraelu i Asuria ma tu‘uina atu ‘iā te i latou i Hala ma Havoli e lata ane i le vaitafe o Kosane, ‘atoa ma ‘a‘ai o Metai. ⁷Na o‘o ia mea ‘ina ‘ua agasala le fānauga a Isaraelu i le ALI‘I lo latou Atua, o lē na ‘aveina a‘e ‘iā te i latou a‘i le nu‘u o Aikupito a‘i lalo o le lima o Farao le tupu o Aikupito ma ‘ua latou matata‘u i atua ‘ese. ⁸‘Ua sāvavali fo‘i i tu a nu‘u ‘ese sa tulia e le ALI‘I i luma o le fānauga a Isaraelu, ‘atoa ma tu a tupu o Isaraelu sa latou faia. ⁹Na fai fa‘alilolilo e le fānauga a Isaraelu mea e lē tusa i le ALI‘I lo latou Atua; na latou faia fo‘i mo i latou mea maualuluga i o latou ‘a‘ai uma, o le pae o tagata leoleo ‘atoa ma le ‘a‘ai nofo ‘olo. ¹⁰‘Ua latou fa‘atūina fo‘i mo i latou tupua ma tupua o Asaira i luga i mauga maualuluga uma ma lalo o la‘au lauolaola uma. ¹¹‘Ua latou fa‘amū ai mea manogi i mea maualuluga uma, fa‘apei o nu‘u ‘ese ē ‘ua fa‘atāfea e le ALI‘I i o latou luma, ‘ua latou faia fo‘i mea leaga e fa‘a‘ono‘ono atu ai i le ALI‘I; ¹²auā ‘ua latou ‘au‘auna i tupua, o le mea na fetalai mai ai le ALI‘I ‘iā te i latou, “‘Aua tou te faia lea mea.” ¹³‘Ua a‘oa‘i mai lava le ALI‘I ‘iā Isaraelu ‘atoa ma Iuta e le ‘au perofeta uma ma tagata va‘ai uma, ‘ua fa‘apea mai, “‘Ia ‘outou liliu mai i o ‘outou ala leaga, ma ‘ia ‘outou tausi i a‘u poloa‘iga ma a‘u sauniga, ‘ia tusa ma le tulafono uma na ‘ou poloa‘i atu ai i o ‘outou tamā, na ‘ou tu‘uina atu ai fo‘i ‘iā te ‘outou e a‘u ‘au‘auna o le ‘au perofeta.” ¹⁴A ‘ua latou lē fa‘alogo lava, ‘ae peita‘i ‘ua latou fa‘ama‘a‘a i o latou ua, fa‘apei o ua o latou tamā, o ē na lē talitonu i le ALI‘I lo latou Atua. ¹⁵‘Ua latou tia‘i fo‘i ana sauniga ma lana feagaiga na osi ma o latou tamā, ‘atoa fo‘i ma ana tulafono na ia fetalai mai ai ‘iā te i latou; ‘ua latou mulimuli atu fo‘i i le mea fa‘atauva‘a, ‘ona amio fa‘atauva‘a ai lea o i latou; ‘ua fa‘aa‘oa‘o fo‘i i nu‘u ‘ese na vagavagaia i latou, na poloa‘i mai ai le ALI‘I ‘iā te i latou e ‘aua ne‘i faia fa‘apei o i latou. ¹⁶‘Ua latou tu‘ua fo‘i poloa‘iga uma a le ALI‘I lo latou Atua, ‘ua latou faia fo‘i mo i latou tupua u‘amea, o tama‘i povi e lua; ‘ua latou fai fo‘i le tupua o Asaira, ‘ua latou ifo fo‘i i ‘au uma o le lagi ma latou ‘au‘auna ‘iā Paala. ¹⁷‘Ua latou fa‘aui ane o latou atali‘i ma o latou afafine i le afi, ‘ua latou fai togafiti fa‘ataulāitu fo‘i, ma sā‘ili fa‘ailoga; ‘ua matuā tu‘uina atu fo‘i i latou e i latou ‘ia fai amio leaga i luma o le ALI‘I e fa‘a‘ono‘ono atu ai ‘iā te ia. ¹⁸O le mea lea na matuā to‘asā mai ai le ALI‘I ‘iā Isaraelu, ‘ua ia ‘ave ‘ese ai ‘iā te i latou i ona luma; e leai sē na toe, na o le itū‘āiga lava o Iuta. ¹⁹O Iuta fo‘i na lē tausi i poloa‘iga a le ALI‘I lo latou Atua, a ‘ua latou sāvavali i tu a Isaraelu na latou faia. ²⁰‘Ona lafoa‘i ai lea e le ALI‘I o le fānau uma a Isaraelu ma ia fa‘apuapuagātia i latou, ‘ua na tu‘uina fo‘i i latou i lima o ē na vete ‘iā te i latou, ‘ina se‘ia o‘o ‘ina lafoa‘iina i latou uma e ia. ²¹Auā na ia vavae‘eseina Isaraelu a‘i le ‘āiga o Tavita; ‘ona latou fai ai lea mo latou tupu o Ierepoamo le atali‘i o Nepata; ‘ua mimilo ‘ese fo‘i e Ierepoamo ‘iā Isaraelu ne‘i latou mulimuli atu i le ALI‘I, na ia fa‘atupu ‘iā te i latou le agasala tele. ²²Na sāvavali fo‘i le fānauga a Isaraelu i agasala uma a Ierepoamo na ia faia, na latou le te‘a ‘ese ai lava. ²³‘Ua o‘o ‘ina tu‘u‘eseina e le ALI‘I ‘iā Isaraelu a‘i ona luma, e tusa ma lana afioga i ana ‘au‘auna uma le ‘au perofeta. O lea na fa‘atāfeaina ai Isaraelu a‘i lo latou nu‘u i Asuria, ‘ua o‘o mai lava i le aso nei.

‘Ua Nofoia Samaria e Tagata o Asuria

²⁴‘Ona ‘aumai ai lea e le tupu o Asuria o tagata mai Papelonia, ma Kuta, ma Ava, ma Amato, ‘atoa fo‘i ma Sefavaima, ‘ua tu‘u atu i latou i ‘a‘ai o Samaria, o sui o le fānauga a Isaraelu, ‘ua latou fai mo i latou o Samaria ma latou nonofo i ona ‘a‘ai. ²⁵O le amataga o lo latou nonofo i lea nu‘u ‘ua latou le matata‘u ai i le ALI‘I; ‘ona ‘a‘auina atu ai lea e le ALI‘I o leona ‘iā te i latou, na oti ai nisi o i latou. ²⁶‘Ona latou ta‘u atu ai lea i le tupu o Asuria, ‘ua fa‘apea atu, “O nu‘u na e ‘avea ma tu‘uina i ‘a‘ai o Samaria, ‘ua latou lē iloa le tu a le Atua o le nu‘u; o lea ‘ua ‘a‘auina mai ai e ia o leona ‘iā te i latou, fa‘auta fo‘i, ‘ua oti ai o latou, auā ‘ua latou lē iloa le tu a le Atua o le nu‘u.” ²⁷‘Ona fai mai ai lea o le tupu o Asuria, ‘ua fa‘apea mai, “‘Inā avatu ia le tasi o le ‘au ositaulaga na ‘outou ‘aumaia i lea nu‘u, latou te ō e nonofo ai, na te a‘oa‘o atu ‘iā te i latou i le tu a le Atua o le nu‘u.” ²⁸‘Ona alu atu ai lea o le tasi o le ‘au ositaulaga na latou ‘aumaia mai Samaria, ‘ua nofo i Peteli ma a‘oa‘o atu ‘iā te i latou i le uiga o le mata‘u i le ALI‘I. ²⁹A ‘ua ta‘itasi le nu‘u ma fai o latou lava atua, ma tu‘u ai i fale o i mea maualuluga sa faia e tagata Samaria, ta‘itasi le nu‘u ma fai ai ‘iā latou ‘a‘ai na latou nonofo ai. ³⁰Na faia e tagata Papelonia o Suko-peno, na faia fo‘i e tagata Kuta o Nekala, na faia fo‘i e tagata Amato o Asima, ³¹na faia e tagata Ava o Niveasa ma Tareaka, o tagata o Sefavaima fo‘i na latou susunu ‘iā latou fānau i le afi mo Atameleko ma Anameleko, o atua ia o Sefavaima. ³²Na latou matata‘u i le ALI‘I, ma fai fo‘i mo i latou o ositaulaga i mea maualuluga mai le nu‘u uma, na latou ositaulaga mo i latou i fale o i mea maualuluga. ³³Na latou matata‘u i le ALI‘I, ‘ae ‘au‘auna fo‘i i o latou lava atua, fa‘apei o tu a nu‘u ē na fa‘atāfeaina i latou nai lea mea. ³⁴‘Ua o‘o lava i le aso nei o latou e fai fa‘apei o tu tuai. Latou te lē matata‘u i le ALI‘I; latou te lē fai fo‘i fa‘apei o a latou tu ma a latou sauniga ma le tulafono ma le poloa‘iga na poloa‘i mai ai le ALI‘I i le fānauga a Iakopo, na ia fa‘aigoaina o Isaraelu. ³⁵Na osi fo‘i e le ALI‘I le feagaiga ma i latou ma na poloa‘i mai ai ‘iā te i latou, ‘ua fa‘apea mai, “‘Aua tou te matata‘u i atua ‘ese, ‘aua tou te ifo ‘iā te i latou, ‘aua tou te ‘au‘auna i ai, ‘aua fo‘i tou te faitaulaga ‘iā te i latou. ³⁶A o le ALI‘I, o lē na ‘aveina a‘e ‘iā te ‘outou a‘i le nu‘u o Aikupito i le mana tele ma le ‘a‘ao fa‘aloaloa, tou te matata‘u ‘iā te ia, tou te ifo ‘iā te ia, tou te ositaulaga fo‘i ‘iā te ia. ³⁷O sauniga fo‘i ma tu ma le tulafono ma le poloa‘iga na ia tusi mai mo ‘outou, tou te tausi i ai ‘ia faia i aso uma; ‘aua fo‘i tou te matata‘u i atua ‘ese. ³⁸O le feagaiga fo‘i na ‘ou osia ma ‘outou, ‘aua ne‘i galo lea ‘iā te ‘outou; ‘aua fo‘i tou te matata‘u i atua ‘ese. ³⁹‘Ae peita‘i o le ALI‘I lo ‘outou Atua ‘ia ‘outou matata‘u i ai; ‘ona lavea‘i lea o ia ‘iā te ‘outou i lima o i latou uma lava o ē ita mai ‘iā te ‘outou.” ⁴⁰‘Ae le‘i fa‘alogo lava i latou, ‘ae peita‘i ‘ua latou faia lava fa‘apei o a latou tu tuai. ⁴¹O lea na matata‘u ai ia nu‘u i le ALI‘I, ‘ae ‘au‘auna fo‘i ‘iā latou tupua ‘ua ta. O a latou fānau fo‘i ma fānau a latou fānau, fa‘apei ‘ona faia e o latou tamā e fa‘apea ‘ona faia e i latou, ‘ua o‘o mai lava i le aso nei.#