1 ‘Ua iloa e Atalia le tinā o Aasaia ‘ua oti lana tama, ‘ona tula‘i ai lea o ia, ‘ua fasioti i le fānau uma a le tupu.
2 ‘Ae peita‘i o Iosapa le afafine o le tupu o Ioramo, le tuafafine o Aasaia, na ia ‘ave ‘iā Ioasa le atali‘i o Aasaia, ‘ua āisola ‘iā te ia i atali‘i o le tupu ē na fasiotia; ‘ua latou na ‘iā te ia, o ia ma lē na fa‘asusu ‘iā te ia, i le afeafe moe, ‘ia lē iloa e Atalia; ‘ona lē fasiotia ai lea o ia.
3 Sa i ai fo‘i o ia ‘iā te ia ‘ua natia i le fale o le ALI‘I i tausaga e ono. ‘Ua fai fo‘i Atalia ma tupu i le nu‘u.
4 A o le fitu o tausaga ‘ua alu ai le fe‘au a Ieoiata, ‘ua ‘a‘ami i ali‘i o ta‘ito‘aselau ma le ‘au keri, ‘atoa ma le ‘au e fa‘afeao, ‘ua na ‘aumai i latou ‘iā te ia i le fale o le ALI‘I; ‘ona fai lea o le feagaiga ma i latou, ma fai atu ‘ia tautō i latou i le fale o le ALI‘I, ‘ona fa‘aali atu ai lea ‘iā te i latou o le atali‘i o le tupu.
5 ‘Ona fai atu ai lea o ia ‘iā te i latou, ‘ua fa‘apea atu, “O le mea lenei tou te faia; o le tasi vaega, o ona vaega e tolu o ‘outou o ē ulufale mai i le sapati, e fai i latou ma leoleo o le fale o le tupu;
6 e i ai fo‘i le tasi vaega i le faitoto‘a o Sura, e i ai fo‘i le tasi vaega i le faitoto‘a i tua o le ‘au e fa‘afeao; tou te leoleo ai le fale, ne‘i osofia.
7 E lua vaega fo‘i o ‘outou uma o ē ulufafo i le sapati, latou te leoleo i le fale o le ALI‘I e latalata i le tupu.
8 Tou te vagavagai fo‘i i le tupu ‘ia so‘o ai, o le tagata ma lana ‘au‘upega i lona lima; o sē sau fo‘i i totonu o ‘au e fa‘aatusolo ‘ia fasiotia o ia; ‘ia ‘outou i ai fo‘i i le tupu i lona ulufafo atu ma lona ulufale mai.”
9 ‘Ona faia lava lea e ali‘i o ta‘ito‘aselau e tusa ma mea uma na fai atu ai Ieoiata le ositaulaga; ‘ua ta‘itasi ma ‘ave i ona tagata o ē ulufale mai i le sapati, ‘atoa ma ē ulufafo i le sapati; ‘ua latou ō mai ‘iā Ieoiata le ositaulaga.
10 ‘Ona avatu ai lea e le ositaulaga i ali‘i o ta‘ito‘aselau o tao ma talitā le tupu o Tavita na i le fale o le ALI‘I.
11 ‘Ona tutū ai lea o le ‘au e fa‘afeao, o le tagata ma lana ‘au‘upega i lona lima, e amata i le itū taumatau o le fale, e o‘o i le itū tauagavale o le fale i tafatafa ane o le fatafaitaulaga ma le fale ma le tupu e so‘o ai.
12 ‘Ona ‘aumai ai lea e ia o le atali‘i o le tupu, ‘ua fa‘aeaina atu fo‘i ‘iā te ia le paleali‘i ma tu‘uina atu i ai le tulafono; ‘ua latou fai ai o ia ma tupu, ‘ua fa‘au‘u fo‘i ‘iā te ia; ‘ona latou taufaipatilima lea ma fai atu, “‘Ia soifua le tupu.”
13 ‘Ua fa‘alogo Atalia i le vāvāō o le nu‘u e tamomo‘e, ‘ona sau ai lea o ia i le nu‘u i le fale o le ALI‘I.
14 ‘Ua na va‘ai mai, fa‘auta, o le tupu ‘ua tu i le pou e fa‘apei o le tu ma ali‘i ma ē ili pū o latalata i le tupu ma tagata uma o le nu‘u ‘ua ‘oli‘oli ma ili pū; ‘ona saei ai lea e Atalia ona ‘ofu, ‘ua ‘alaga, “O le fouvale, O le fouvale.”
15 ‘Ona fai atu ai lea o Ieoiata le ositaulaga i ali‘i o ta‘ito‘aselau, o ali‘i o ‘au, ‘ua fa‘apea atu ‘iā te i latou, “‘Ia ‘outou ‘ave ‘iā te ia i tua o ‘au ‘ua fa‘aatusolo, o sē mulimuli atu fo‘i ‘iā te ia ‘ia fasioti i le pelu.” Auā na fai atu le ositaulaga, “‘Aua ne‘i fasiotia o ia i le fale o le ALI‘I.”
16 ‘Ua latou pu‘e ‘iā te ia, ‘ona alu ai lea o ia i le ala e ui mai ai solofanua i le fale o le tupu, ‘ua fasiotia fo‘i o ia i lea mea.
17 ‘Ona faia lea e Ieoiata o le feagaiga a le ALI‘I ma i latou, o le tupu ma le nu‘u, e ‘avea ai i latou ma nu‘u o le ALI‘I; o le feagaiga fo‘i a le tupu ma le nu‘u.
18 ‘Ona ō atu ai lea o tagata uma o le nu‘u i le fale o Paala ma latou lepetia; ‘ua latou matuā tu‘imomoia ona fatafaitaulaga ma ona tupua; ‘ua latou fasioti fo‘i ‘iā Matana le ositaulaga a Paala i luma o fatafaitaulaga.‘Ona tofia ai lea e le ositaulaga o ē leoleo i le fale o le ALI‘I.
19 ‘Ona ‘ave lea e ia o ali‘i o ta‘ito‘aselau ma le ‘au keri ma le ‘au e fa‘afeao, ‘atoa ma tagata uma o le nu‘u, ‘ona latou ō ifo ai lea ma le tupu nai le fale o le ALI‘I i le fale o le tupu, ‘ua ui mai i le ala o le faitoto‘a o le ‘au fa‘afeao. ‘Ona ti‘eti‘e ai lea o ia i le nofoāli‘i o tupu.
20 ‘Ona ‘oli‘oli ai lea o tagata uma o le nu‘u ‘ua filemū fo‘i le ‘a‘ai; a ‘ua fasia Atalia i le pelu e latalata i le fale o le tupu.
21 ‘Ua fai ma tupu Ioasa i le fitu o ona tausaga.#